قبل ماتقدم C.V بتاعك في اي مكان لازم تبص علي الملاحظات دي كويس
- إسم الملف مهم جداً
يعني مايبقاش اسم الملف (مستند جديد، أو new document، أو السيرة الذاتية، أو my updated CV، أو مجرد إسمك دون ذكر الوظيفة التي تستهدفها)
مثال جيد لإسم الملف Mohamed Ahmed Mahmoud – Electrical Engineer CV
- السير الذاتية تُكتب باللغة الإنجليزية المتعارف عليها عالمياً وهي الشائعة والمتفق عليها ليمكن لأي جهة أو شركة مراجعتها
يعني ماتكتبهاش بأي لغة تانية إلا إذا كانت الجهة التي تتقدم لها تشترط ترجمتها سواء للعربية، الفرنسية، الأسبانية ، إلخ إلخ ...
- مفيش داعٍ لذكر الديانة إلا إذا اشترطت الجهة التي تتقدم للعمل فيها ذلك نظراً لطبيعة العمل داخل بعض الأماكن المقدسة مثل مكة والمدينة المنورة.
- مفيش داعٍ لذكر نوعك ذكر أو أنثى إلى اذا كان اسمك يصلح للنوعين ويوجد هناك شرط من الجهة المعلنة يتطلب إيضاح ذلك.
- موضوع الصورة الشخصية بالسيرة دا بقى موضوع تاني دي مش صورة بتحطها على موقع تواصل اجتماعي او بتديها لخطابة علشان تشوف لك شريك حياة. يعني بلاش صورتك بالشورت على الشاطئ أو بقميص هاواي أو
متصور بنظارة شمسية (أنت مش طه حسين ولا ويل سميث في Men In Black) ولا وأنت بتقهقه من شدة الضحك وبرضه ماتبقاش صورتك في منتصف الصفحة او حجمها يساوي ربع حجم الصفحة (4 في 6 مقاس كويس)
وبخلفية بيضاء مش خلفية حمراء أو لون غريب
- عنوانك في السيرة ... كفاية اسم المدينة والدولة اللي انت شغال فيها. أنت مش بتملأ بياناتك في استمارة البطاقة الشخصية او بطاقة الأحوال
- الايميل بتاعك اللي انت بتستخدمه ده مهم جداً يعني مش الاقي واحد كاتب carzy girl or shakawa love or hamada mada or
الأسماء دي يا جماعة كنت تستخدمها لما كنت بتعمل ايميل تدخل بيه غرف شات الـ msn زمان او شات مصراوي
الايميل يكون دليل احترامك لنفسك أولاً
- عنوان الايميل اللي بترسله (Email Subject) برضه مهم يعني مش تبعت الايميل وعنوانه فاضي او المحتوى نفسه عبارة عن صفحة بيضاء
يعني حاول تكتب كلمتين عن نفسك مايزيدوش عن سطرين تلاتة. الكتاب بيبان من عنوانه والانطباع الأول يدوم
- لما تقدم السيرة pdf يا ريت تكون مطبوعة من برنامج الـ word مش تكون عامل لها scan
- يفضل دائماً انه تكون السيرة doc يعني مش pdf علشان تساعد نفسك لما اخصائي التوظيف يعمل بحث في الملفات اللي عنده والايميل يوصل لسيرتك الذاتية بسهولة (هو هايدور بكلمات بحث عبارة عن الامتيازات أو
المسمى الوظيفي او الشهادات) فأنت لو باعت ملف scanned ابقى قابلني لو ملفك ظهر ولو لمرة واحدة في بحثه
- البنات اللي مابتحطش رقم التليفون علشان المعاكسات. مش لازم التعميم في الموضوع ده واللي يتصل يعاكسك اعملي بلوك،، لكن تبقى سيرتك الذاتية احترافية ومهنية بشكل عالي
- الناس اللي بتحب تشرح طبيعة عملها roles and responsibilities حاول تختصر وتحط الأمور المميزة مش تروح تجيب job description عبارة عن صفحتين وتحطه انك بتقوم بكل الشغل
- برضه حاول تبقى منطقي في ذكر المهام الموكلة لك، علشان انت مش سوبر مان (في مثل شعبي بيقول عرفت منين انها كذبة، رد عليه قال له " من كبرها".
- حالتك الاجتماعية برضه مش مهم تكتبها اوي. خليها لمقابلة الموارد البشرية. في ناس بيبقى ناقص تحط أسماء ابناءها ومدارسهم وهوايتهم بعد ما بيحطوا تواريخ ميلادهم واعمارهم
- رقم تليفون واحد يكفي ممكن يبقوا رقمين لو انت مغترب يعني رقمك في بلدك الأم ورقم في بلد العمل (للاحتياط لو حد حب يكلمك وانت كنت في إجازة) مش تروح تحط دليل التليفون في السي في بتاعك
- ايميل واحد برضه يكفي مش لازم اتنين تلاتة
- الهوايات الشخصية ... عزيزي أو عزيزتي ... أنت بتقدم على وظيفة مش بتكتب عن نفسك في صفحة أصدقاء المراسلة بمجلة ماجد (ماظنش الأجيال الجديدة تعرف الكلمة دي) يعني مش لازم الناس تعرف انك بتحب الطبخ او
كرة القدم او البلايستيشن او القفز بالمظلات وخلافه
- شهادات التخرج وصورة جواز السفر والبطاقة الشخصية وشهادات الخبرة والدورات لا تقدم مباشرة مع السيرة الذاتية الا اذا طلبها منك اخصائي التوظيف بعد قبول سيرتك الذاتية
- حاول تحط لينك لصفحتك على اللينكد إن في الهامش اسفل الصفحة علشان الناس تعرف تدخل تشوف التوصيات عليك والبروفايل الفخم بتاعك اللي اوصيك انك تراعي النقاط السابقة فيه
- حاول تبعد برضه عن الألوان الشيفتيشي في السيرة بتاعك يعن highlights وأخضر واحمر واصفر وفرح العمدة اللي بيحصل ده مش حلو علشانك وبتبقى حاجة مزعجة جداً
- حاول تتفادى برضه البوم الاستيكرات الخاص بشعارات الشركات السابقة اللي انت اشتغلت فيها (ألبوم تان تان موضة أنتهت من زمان ومحدش بيعمل كده وبتاخد مساحة كبيرة من السيرة)
- عدد الصفحات لازم يكون اقل ما يمكن لانه اللي بيراجع السيرة الذاتية ماياخدش اكتر من دقيقة او نص دقيقة في النظرة الأولى ولا يطيل النظر فيه الا اذا كان الكلام مختصر وجذاب ببساطته
- شهادتك الجامعية ممكت تكتب في سطر واحد مش لازم تكتبها في خمس سطور .. سطر لاسم الجامعة وسطر لاسم التخصص وسطر للتقدير وسطر لسنة التخرج وسطر لمكان الجامعة الخ الخ
- بلاش الخلفيات الملونة في السيرة... حلو اللون الأبيض ولو انت مستخدم template حاول متبقاش غنية بألوان السما السبعة
- حجم الخط ونوعه مهمين فبلاش تزود عن الـ 12 points وكمان بلاش الخط العريض الا في العناوين الرئيسية وابتعد تماماً عن الـ underline وايضاً بلاش التظليل للكلام واهتم بالمسافات بين الكلمات والسطور كذلك وتوحيد
نوع الخط المستخدم (يعني نوعين على الأكثر تكون مقبولة .. عدا عن ذلك ملوش لزمة)
- لما تيجي تكتب مهاراتك في استخدام البرامج بلاش تكتب and outlook and emails internet browsing and windows دي حاجة بقت فطرية دلوقتي والأطفال عمر 3 سنين بيعملوها واكيد واحد زيك عامل سيرة ذاتية وباعت
ايميل فهو بيعرف يعمل كل الكلام ده. انت مش جاي من غابات الامازون
- تواريخ عملك كفاية ذكر الشهر والسنة مش لازم التفاصيل الدقيقة باليوم والساعة
- الخدمة العسكرية مش مطلوب ذكرها خلاص الا اذا كنت بتقدم على وظيفة في بلدك
- مش لازم برضه تكتب موضوع رخصة القيادة .... كل الكلام ده بياخد مساحات كبيرة من السيرة الذاتية وبيكبر حجمها في حين اننا بنركز على الاختصار ........ (المختصر المفيد)
- لو شهادتك تتطلب مشروع تخرج فبعد خمس سنين من العمل ممكن تستغنى عن الجزئية دي في السيرة. خليها لحديثي التخرج بس
- الـ references مش لازم تحط أسماء وأرقام التواصل مع مديرينك السابقين ... خلي دي للمرحلة التانية لما الناس تعجب بك ولو طلبوا منك الموضوع ده زودهم به.
- ترتيب الشهادات او سابقة الخبرة او التعليم يكون بذكر الأحدث أولاً ثم تتدرج حتى تصل إلى الأقدم (مش العكس).
- كلمة أخيرة ... الـ cover letter مبقاش في حد بيبص عليه لانه الناس بقت مشغولة بالاهم، ألا وهو سيرتك الذاتية.
تكملة القراءة
