المجال ممتع جدا انك تذاكر فيه مع نفسك وتتعلم حاجات اكتر من المقرر عليك في الكلية وأكثر تطورا
لأن البيزنس يوم عن يوم بيتطور وبتتضاف ليه حاجات جديدة ..فلازم تكون المعلومات موجودة ومتجددة عندك باستمرار خصوصا في مجال التجارة
لأن لو انت داخل الكلية ومعتمد على المراجع والملازم ..وقت ما تتخرج منها هتلاقي فيه فجوة كبيرة بينك وبين الشغل والتوظيف ..ودي مش حاجة كويسة ولا حاجة تتمناها
-ذاكر أول بأول ..دة مش كلام مثالي ..فعلا لو ذاكرت اول بأول هتجيب تقدير بسهولة ومش هتضيع في آخر السنة
مش شرط انك تجيب كل الملازم وترهق نفسك جدا من البداية في المذاكرة ..لأ بس على الأقل اعرف مطلوب منك ايه , ايه اللي اخدته في المحاضرات والسكاشن واعرف عنه ولو فكرة بسيطة
-المحاسبة ..مادة عملية بتحتاج حل كتير جدا ..وبتلخبط جدا وبتلاعبك بالألفاظ فعشان كدة بتحتاج فهم جدا بردو
وفي الامتحان بيقيس سرعتك أكتر ما بيقيس مدى فهمك للأسف
فلو انت مش متعود على انك تحل مسائل محاسبة وعارف ايه اللي ممكن يخدعك فيه مش هتعرف تحل في الامتحان كويس
خد بالك كويس منها من أول السنة وماتهملهاش وتسيبها وتذاكرها في ليلة الامتحان بس
-المواد النظري بتحتاج فهم مش بس حفظ ..افهم قبل ما تحفظ واعرف كل جزئية بتتكلم عن ايه بالضبط لأنك هتلاقي حاجات تشبه بعضها كتير فلو مش فاهم كويس هتتعب .
وأخيرا
انت في كلية زي ما قلنا مجالها واسع جدا ..ناس كتير مابتكتشفش دة غير بعد ما بتدخلها وتشوف المواد والأقسام وتعرف انها بتدرس كل حاجة في البيزنس وان كل حاجة هي بتدرسها مطلوبة
علم نفسك بنفسك ..كورسات اونلاين ..احضر workshops كتير عن المجال اللي انت حابّه من مجالات الكلية الكتير ..طوّر نفسك فيه باستمرار لأن كل مجال منهم مطلوب جدا في سوق العمل فماتستهونش بأي مجال فيهم ..اشتغل على نفسك كتير واسعى انك تنزل تدريب واحد عى الأقل
انضم لأنشطة طلابية واتعلم منها ال Teamwork بشكل عملي وازاي تتعامل مع Leader وازاي تشتغل تحت ضغط وازاي تشتغل مع كذا حد على Project واحد وتطلعوه احسن ما يمكن
آخر نصيحة ..اعرف كل حاجة عن حاجة ..واعرف حاجة عن كل حاجة
وقت ما تطبق النصيحة دي صح ..هتنجح جدا في كليتك وفي شغلك..
فى النهاية كلية تجارة من اهم الكليات و علمها من اهم العلوم اللى بيكامل حياتنا و بيعمل على تطويرها ....
