49 نصيحة لازم تعرفهم لو عندك جيش قريب

لو انت داخل الجيش جديد وحابب تعرف تاخد اية معاك اول يوم من كل أدوات لازمة لك ، اقرا الـ 49 نصيحة بعناية وركز واكتب فى ورقة وربنا معاك ، بمناسبة اليومين الى جايين فى دفعة جديدة داخلين الجيش ربنا معاكم وترجعوا بالسلامة ان شاء الله .

 

احفظ النصايح دى وخليها في بالك كويس - نصائح واشياء هامة وانتوا رايحين مركز التدريب او الجيش
 

  1. فلوس اكتر من 600 جنيه مش أقل
  2. مصحف 
  3. أدوية البرد و الكحة الإسهال والإمساك والصداع واستحلاب للزور ومراهم كدمات ومسكن
  4.  اكتر من قفلين كمبيوتر بسعر كويس علشان ميتكسروش بحجم متوسط وبلاش الكبير
  5. غيارات داخلية
  6. بودرة للقدمين
  7. مزيل عرق 
  8. فرش واحد جزمة طبى ممكن يكون بـ 10 جنية تقريبا عند اى حد - للبيادة لانها ناشفة
  9. مكن حلاقة على قد تقدر زى جيليت بلو 2 وهاتو الكيس الكبير تقريباً هتحلق مرة كل يومين لو دقنك خفيفة لو دقنك تقيلة كل يوم تحلق
  10. فوم حلاقة او جيل للسرعة بديل كريم الحلاقة والفرشة وهات معاك افتر شيف لللاتهابات بعد الحلاقة
  11. فلاشة اسنان لانك هتغسل سنانك فى الجيش 
  12. ومعجون سنان 
  13. معلقة ودى من اهم الاشياء للاكل ودايما حافظ عليها وسيبها فى جيب الافارول علشان متنسهاش لو دخلت الميس "ودا المكان ال فية الاكس" من غيرها هتاكل بالكارنية
  14. خرتوم متر للحمام بس الاحسن شطافة حمام ب 110 جنية فى اى صيدلية كبيرة
  15. ليفة للاستحمام
  16. صابون وصبانة بغطا وشامبو اكياس للاستخدام مرة واحدة وترمى الكيس
  17. فوطة
  18. اربطة جزمة بيج للبيادة لو الروباط اتقطع
  19. ممكن معلبات بس مش كتير وممنوع الاكل العادى طالما مفيش علية صلاحية مش هيدخل من البوابة
  20. هتحتاج سندوتشات فى يوم الترحيل لانة هيبقى طويل
  21.  شريحة خط موبايل وفيها رصيد وصرف نفسك هناك لو معرفتش بيبقى فية كابينة تليفون واشترى كرت مرحبا من المصرية للاتصالات
  22.  ممكن تاخد موبايل صغير بتاع الجيش من غير كاميرا يكون معاك - بحيث تتطمن اهلك لما تترحل وهيتسلم فى الامانات - سلمة احسن لو اتقفش معاك هيتكسر قدامك - ولما تترحل للقوة الاساسية هيكون معاك موبايل عادى من غير كاميرا 
  23. لما تيجى تلحق احلق على 1 او نص مش اقل ولا اكتر علشان هضطر تلحق فى الجيش بالمكنة بتاعتهم
  24. يكون معاك اكياس اريال صغيرة تغسل بيها ايدك
  25. قصافة
  26. وايبس و ديتول
  27. كشاف صغير - الدنيا بتبقى ضلمة بليل فى العنبر بيتباع ب 2.5 فى اى مكتبة
  28. ساعة بتنور علشان كل حاجة هناك بمواعيد
  29. شرابات وبلاش تلبس الشراب الميرى ولا يوم والاحسن لو شراب تقيل وطويل علشان البيادة
  30. شبشب او كروكس مقفول من الجناب 
  31. دوبارة للمفاتيح
  32. محفظة بسوستة يكون فيها كل حاجة مهمة
  33. مراية صغيرة - لو الحمامات زحمة تعرف تحلق دقنك
  34. ولما تدخل الجيش هتعرف مصطلحات جديدة " ميس و كحوول و جيشك حلبة ومستجد و رديف و جراية و زريير و سيكا " و اخر واحدة دى الاسم اللي بيطلع علي اي حد إجازاته مستريحة و متخدش ف بالك
  35. الجيش فية شباب محترمة كتير جدا ورجالة واتعامل على اساس كدا 
  36. هتقابل ناس جدعة من كل مكان وهتبوا صحاب بدون مصلحة وانتوا فى مركز التدريب واختار الناس الي تقعد معاهم وخلى المقياس الوحيد الرجولة مش دا منين والمؤهل اية
  37. بلاش كذا شنطة وانت رايح مركز التدريب - مش هتبقى عارف تشيلهم ولا تشيل المخلفة ولا بطاطين
  38. لو داخل الجيش فى الشتا خد معاك دفاية تحطها تحت البطاطين بتاعت الجيش 
  39. هتسمع كتير ان موجود حكايات عن جن وعفاريت فى العنبر والحمامات سيبك من كل الكلام دا وكبر دماغك
  40. حاول تجدد علاقتك بالتونة والجبنة لانها هتكون الدائمة فى الجيش
  41. البس حاجة مريحة وانت رايح يوم الترحيل - هتقعد كتير وحافظ عليها علشان لو نزلت اجازة مركز التدريب
  42. أدخل الحمام بليل لان مافيش وقت الصبح وبيبقى زحمة
  43. لو كبائن التليفون على طول عليها ناس ومشغولة اصحي بليل الساعة 1 او 2 واتكلم براحتك
  44. لما تترحل للوحدة الاساسية اسال العساكر القديمة عن النظام ماشى ازاى علشان تبقى فاهم وعارف هتعمل اية
  45. لو عارف كومبيتر او فاكس دور على المكاتب والعساكر بتوع الكمبيوتر واتصاحب عليهم علشان ياخدوك معاهم المكتب لان شغل المكتب اريح مكان فى الجيش
  46. فى مركز التدريب بيحضر مناديب من الاسلحة ياخدو ناس ابعد تماما عن مناديب الصاعقة والمظلات والقوات الخاصة
  47. ونصيحة لو لسة هيقدة ولسة مراحش الكشف الطبى لو روحت كشف طبى فى مكان اسمة الانتقاء والتوجية هيكون فية اسالة عن فيك حاجة - قولهم ايوة وقولهم اى حاجة علشان متتقبلش هناك - الناس دى بتبعت على طول على حرس الحدود والصاعقة والقوات الخاصة 
  48. لو عندك شكوي طبية حقيقية لازم تتمسك بالامل ومتتكسفش وتقولها لان فى ناس بتطلع من التظلمات دى
  49. متسبش حد يضايقك فى مراكز التدريب لان دوسيهك بيكون مقفول - وبتتحاسب لما تترحل للقوة الأساسية

ليصلك منشورتنا وكل جديد على الفيس بوك اضغط هنا

اقرأ ايضا

دروس هامة من واقع الحياة لحديثي التخرج

المقالات

الدورات التدريبية