فى حالة إن حضرتك بتقرأ سواء كتير و لا قليل فلازم تكون عارف الموقع دا
( Goodreads )
هنا: https://www.goodreads.com
الموقع دا بإختصار شديد بيكون مكتبتك الإفتراضية اللى فيها كل حصيلتك من القرآة و دا اللى هوضحه فى النقط اللى جاية ، اللي مش عارف الموقع يركز فى النقط دى و إن شاء الله هتستفيد.
1 - أول حاجة بتعمل اكونت عادى جداً بأى إيميل او الفيس و تحط بعدها اى صورة تعجبك كصورة بروفايل .
2 - عملت الاكونت و الدنيا فل : دور بقا على الكتاب او الرواية اللى عايز تقرأها و ما تقلقش الموقع تقريباً فيه كل الكتب و الروايات العربية منها و الإنجليزية
3 - لقيت الكتاب قول الحمد لله .. لما بتلاقيه بيكون قدامك ساعتها 3 إختيارات للكتاب اللى إنت دورت عليه .. بتختار إنك قرأته و خلاص ، بتقرأه حالياً ، أو عايز تقرأ الكتاب دا .. بتختار اللى يعجبك و الموقع بيحفظلك الكتاب بإختيارك اللى إخترته .
4 - بعد القراءة و دى أهم نقطة ، بتقيم الكتاب من نجمة لخمس نجوم ، و كمان بتكتب رأيك بكل صراحة عن الكتاب أو الرواية من حيث أسلوب الكاتب إستفدت إية ، تقيمك و رأيك إنت بشكل عام ، يعنى ، ممكن تديها نجمة و دا أسوأ تقييم و كمان تقدر تدخل تسلخ الكاتب و تشوط فيه براحتك و ما تقلقش الموقع مش هيديك بلوك
5 - أما لو عايز ترشيح لكتب أو روايات فبتعمل بحث عشوائى و بتلاقى كتب و روايات بالهبل و الأهم إنك بتلاقى تقييم عام من اللى قرأوا الرواية مثلا قبلك فبتحدد إذا كنت هتقرأها و لا هضيع وقتك على الفاضى .
6 - تقدر كمان تتناقش مع ناس فى الموقع و دا عن طريق إنك بتدخل فى جروب زى الجروب دا اللى إحنا فيه .
7 - هتلاقى فى كُتاب كتير هناك على الموقع ، ممكن تضيفهم أو تعمل لايك على صفحاتهم
