إحساس الشخصية الاعتمادية بنفسها وتقدير ذاتها (الاعتمادية ٢)
بصي حقول لك كلام انتي لأول وهلة حتقولي لا انا مش كدة بس لحظة صدق كدة وشجاعة وفكري بالراحة وهدوء وانتي حتلاقي حاجات كتير فعلا صح
١) أولا هي بتكون من اسرة فيها مشاكل اما نرجسية او ادمان او امراض عضال بتحتاج رعاية شديدة زي الاعاقات او السرطان ، ،أوان الابوين او احدهما اعتمادي
٢) هي بتنكر تماما ان اسرتها فيها مشاكل ،
٣)بتلوم نفسها على كل شيء
٤) تغضب من النقد وتدافع عن نفسها لو حد لام عليها في حين ان هي طول الوقت تنتقد وتلوم نفسها
٥) بترفض المجاملات او المدح ، وفي نفس الوقت تحبط لو مفيش مجاملات ومدح
٦) بتحس انها مختلفة عن بقيت العالم ومتخيلة ان مفيش حد زيها محدش بيضحي زيها ومحدش بيدي زيها ، ومع ذلك تفكر انها مش جيدة بما فيه الكفاية
٧)بتحس بالذنب لو صرفت فلوس على نفسها او عملت أي حاجة ترفيهية وممتعة لنفسها
٨) طبعا بتخاف من الرفض ،وتاخد الأمور كلها بشكل شخصي ،
٩) هي ضحية للعنف الجنسي او الجسدي او الحرمان العاطفي والإهمال والهجر او الإدمان ، ودايما حاسة انها ضحية
١٠)دايما تقول لنفسها انتي عمرك ماحتعرفي تعملي حاجة صح ، وبتخاف من انها تغلط ، ومش فاهمة ليه مش بتعرف تاخد قرار ، وبتتوقع من نفسها انها تعمل كل حاجة برفكت من غير ولا غلطة
١١)علطول تقول كنت مفروض اعمل كذا ، وعندها إحساس دائم بالذنب ،وحاسة بالخجل من كونها نفسها ، وحاسة ان حياتها ملهاش أي قيمة ، فبتساعد الناس انهم يعيشوا حياتهم بدل ماتساعد نفسها ،فتحصل على شعور سطحي بالقيمة عن طريق مشاعدة الاخرين
١٢) بتتمنى حاجة كويسة تحصل لها وفي نفس الوقت مقتنعة ان مفيش حاجة كويسة حتحصل ابدا ومعتقدة انها ماتستحقش ان حاجة كويسة تحصل لها وانها لاتستحق السعادة
١٣) بتتمنى ان الناس تحبها وفي نفس الوقت مقتنعة ان الناس مش بتحبها ولا هي بتعجبهم أصلا فبتحاول تثبت للجميع انها كويسة
بتقمع مشاعرها وتكبتها وتدفنها في قاع الذاكرة هربا من الشعور بالذنب ، بتخاف تسمح لنفسها تكون نفسها ،
دايما قلقانة ع الاخرين ، أحيانا مبتقدرش توقف تفكير وكلام عن مشاكل الاخرين ، علطول معندهاش طاقة لانها مستنفذة للغير وعلطول بتسيب اللي وراها عشان الناس وعلطول مش بتنجز حاجة في حياتها لانها مش فاضية لنفسها
بتحاول تسيطر ع الاخرين بالنصيحة وبتحس ان هي متسيطر عليها من الاخرين او انهم بيحاولوا يسيطروا عليها
الشخصية الاعتمادية عندها مشكلة الانكار لكن مش زي النرجسي ،هي بتنكر وجود المشاكل في حياتها وتتظاهر ان الموضوع بسيط وتقول لنفسها بكرة الدنيا حتكون احسن ، وتشغل نفسها بأي حاجة عشان تهرب من المشكلة اللي تخصها ، طبعا بتوصل للاكتئاب والمرض العضوي بتصدق الأكاذيب وبتكذب على نفسها
مش بتعرف تشعر بالساعدة ودايما تدور عليها خارج نفسها ، دايما حاسة انها مش محبوبة ولا مقبولة من ابويها ودة غالبا بيكون إحساس صحيح ، طبعا مش بتحب نفسها ، اذا حبت حد بتفقد كل الشغف بحياتها الخاصة وبتتمحور حوالين حياته هو ، بتستمر في العلاقات المسيئة واذا خرجت منها بتدخل في علاقة جديدة مسيئة برضه ، التواصل مع الاخرين بيكون مش مظبوط لانه امش بتعرف تعبر عن احتياجاتها ومش بتعرف تطلب وبتخاف تطلب
حدودها مفتوحة وبتسمح بالأذى وتتقبله بالتدريج
مش واثقة في نفسها ولا في حد عدا الناس اللي مش اهل للثقة ، مش واثقة في ربنا ودايما تحس انه تخلى عنها
شوفي فكري شوية وشوفي انتي عايزة تتغيري وتكوني شخصية سوية قوية واثقة من نفسها وتعرف تعيش الحياة بحدود صحية وتستشعر السعادة في جميع نواحي حياتها حتى لو فيها النرجسي؟
هل عندك القدرة على التغير
هل عندك استعداد تتعبي على نفسك وتحسني حالك وتقربي من نفسك وتصالحيها وتحبيها ؟
اذا اه تابعي حلقات الشخصية الاعتمادية حنزل كل أسبوع حلقة ان شاء الله