الشخصية الاعتمادية (١)
عشان نتخلص من الشخصية الاعتمادية لازم نفهم الأول ايه هي ولازم كل واحدة تشوف هل هي فعلا اعتمادية ولا لا وهل هي عايزة تتغير ولا هي مبسوطة كدة ؟
تعريفها : الشخص الاعتمادي هو شخص بيسمح لتصرف شخص اخر انه يؤثر عليه وهو مهووس بالتحكم في تصرفات هذا الشخص
للوهلة الأولى حتقولي اه انا بسمح للنرجسي يعمل فيا اللي هو عايزه ويؤثر على نفسيتي ويهدم ثقتي بنفسي وكل الكلام اللي احنا عارفينه ،لكن حتقولي لا طبعا انا مش بحاول اسيطر على تصرفاته ولا عايزة اسيطر عليها ،طيب تعالي كدة نشوف ، انتي مش طول الوقت عايزاه يكون احسن حد في العالم وعمالة تنصحي فيه وتقولي له اعمل كذة وماتعملش كذا ؟ مش انتي طول الوقت تصححي له اخطاؤه ومفاهيمه خصوصا قبل ماتعرفي انه نرجسي ؟ مش طول الوقت عايزاه يغير تصرفاته الغلط ومش بتقدري تفوتي له غلطة ، مش طول الوقت عايزة تساعديه عشان يشتغل ويكبر وتديه فلوس وتعالجي نقط ضعفه وانتي أصلا كل دة بتعمليه وانتي على مستوى الواعي بتساعديه وبتكبريه وعايزاه يبقى احسن حد في الدنيا لكن على مستوى اللاواعي مش كدة خالص ، على مستوى اللاواعي انتي عايزة تسيطري على تصرفاته كلها عشان يبقى في الاخر الصورة اللي انتي عايزاها وفي نفس الوقت يديكي اللي انتي عايزاه ، انتي طول الوقت بتعامليه على انه ابنك وبعض الحالات بتقول انها كانت بتحبه اكتر من أولادها ،وطبعا بالتالي لازم يكون تحت السيطرة زي الابن بالظبط وهو بما انه شخصية اعتمادية فهو بيستحلى دة جدا وبيكون عايز يعوض رعاية الام اللي افتقدها ، المهم انتي ممكن ماتقتنعيش بالكلام دة غير في اخر الحلقات لما الصورة تتضح لك اكتر
خلينا نقول ان مش معنى انك شخصية اعتمادية انك معيوبة او عسيئة او قليلة ابدا انتي بس نشأتي في بيئة معينة كونت عندك شوية مفاهيم مغلوطة وحسستك بعدم الأمان وخلتك بتحاولي تحمي نفسك بالطريقة دي
تعريف تاني للاعتمادية بيقول انها محاولة الحصول على احتياجاتك بطريقة يستحيل بيها الحصول عليها
يعني انتيب تحاولي تحصلي على احتياجاتك بطريقة غلط تماما ، ودة حيكون اقرب لنفسك اكتر من التعريف اللي فات
طيب تعالي نشوف كدة الصفات الموجودة في الشخصية الاعتمادية وانتي شوفي انتي فين منها ؟
١- طول الوقت حاسة انك مسئولة عن الاخرين وعن مشاعرهم وافكارهم وافعالهم واختياراتهم واحتياجاتهم ورغباتهم ورفاهايتهم ومصيرهم النهائي يعني خايفة على اخرتهم كمان
٢- بتحسي بالقلق والشفقة وكمان الذنب لما يكون حد عنده مشكلة ، بتحسي انك مضطرة واحيانا مجبرة بدافع غير مفهوم انك تحلي له مشكلته واحيانا تقدمي نصايح حتى لو غير مرغوب فيها او تدي سلسلة سريعة من الاقتراحات لحل المشكلة او لتغيير او اصلاح المشاعر السلبية اللي هو حاسس بيها ، وطبعا بتحسي بالغضب لما مساعدتك له ماتجيبش نتيجة او هو مايتقبلهاش
٣- بتتوقعي احتياجات الاخرين ودايما تتسائلي هم ليه مش بيتوقعوا احتياجاتك
٤- بتلاقي نفسك بتقولي اه في الوقت اللي بتكوني عايزة تقولي لا ، بتعملي حاجات انتي فعلا بتكوني مش عايزة تعمليها ، بتشيلي شغل اكتر من طاقتك وبدون عدل في توزيع المهام سواء في البيت او في الشغل في حين ان الاخر مش محتاج انك تعملي الشغل بداله
٥- مش عارفة انتي عايزة ايه ولا محتاجة ايه واذا عرفتي بتقولي لنفسك ان اللي انتي عايزاه ومحتاجاه مش مهم لانكب تحاولي تسعدي الاخرين بدل ماتسعدي نفسك وتلبي احتياجاتهم بدل احتياجاتك
٦- بتلاقي ان الاسهل عليكي انك تحسي بمظالم الاخرين من انك تحسي بالظلم اللي واقع عليكي
٧- بتحسي بالأمان اكتر كل ماتدي اكتر ، وتحسي بعدم الأمان وبالذني لو استقبلتي العطاء من أي حد ،وفي نفس الوقت تحسي بالحزن لانك طول عمرك تدي وماحدش بيديكي (تناقض غريب)
٨- بتلاقي نفسك تنجذبي للي محتاج مساعدة دايما ومش بيعتمد على نفسه ابدا وعايز كل اللي حواليه يدوه وهو مايديش حد (النرجسي والشخصيات المسيئة) وفي نفس الوقت الناس دي بتنجذب لكي
٩- بتحسي بالملل والضيق اذا مفيش مشكلة تحليها او حد تحلي له مشكلته
١٠- عادي تتخلي عن روتينك اليومي او جدولك او اهتماماتك عشان تلبي طلب أي حد .
١١- بتفرضي على نفسك التزامات مش بتاعتك ، وبالتالي طول الوقت حاسة بالضغط وان الوقت مش مكفيكي
١٢- بتعتقدي اعتقاد راسخ ان الاخر مسئول عنك وبالتالي بترمي عليه اللوم في انك اصبحتي اعتمادية (وان كان هو ضليع طبعا بجزء من المسئولية)
١٣- طبعا فيه شعور دائم بالغضب واحساس الضحية والاستغلال من الاخرين