التخلص من الشخصية الاعتمادية "الاعتمادية (٤)"
اول خطوة للتخلص من الشخصية الاعتمادية هي فك التعلق
فك التعلق
فك التعلق بأي شيء انتي متعلقة بيه سواء اشخاص قريبة منك او حتى مشاكل انتي عايشاها ليل نهار (وهو فيه حد بيتعلق بمشاكل؟ تخيلي ؟ وحنروح بعيد ليه هو انتي كزوجة للنرجسي مش كنتي او مازلتي متعلقة بيه وهو اكبر مشكلة في العالم؟ مش انتي طول الوقت تتكلمي عن مشكلتك معاه وطول الوقت تفكري فيها وليل نهار مفيش في دماغك غيرها ؟ هو دة التعلق بالمشكلة .وطبعا مفهوم ايه هو التعلق بالاشخاص ، وكمان فيه التعلق بمساعدة الناس والتعلق باسعاد الاخرين والتعلق بحل المشكلات والتعلق بالإصلاح كل دي تعلقات عشان نتخلص من الشخصية الاعتمادية لازم نتعلم نتخلص أولا من التعلق بصفة عامة لازم نوصل اننا مانتعلقش بحد ولا بحاجة تعلق مرضي
فك التعلق هو الخطوة اللي لو عملناها حنلاقي بقيت الخطوات بتمشي لوحدها بدون أي مجهود مننا
زي مادايما أقول لك أصلا ماينفعش تاخدي قرار غير لما تتخلصي من ادمان النرجسي ،نفس الكلام مش حتقدري تشتغلي على نفسك وتطوري نفسك غير لما تخلصي من مشكلة التعلق
طيب تعالي نفهم اكتر معنى التعلق عشان نعرف ازاي حنقدر نتخلص منه ، يعني مثلا
١- انك تكوني قلقانة زيادة عن اللزوم وبالك مشغول طول الوقت بشخص او بمشكلة ،ودة حال ضحية النرجسي ،
٢- والدرجة الأعلى انك يكون عندك هوس السيطرة على شخص او مشكلة ما ودة اللي بيوصل له النرجسي واحيانا ضحيته برضه اذا الموضوع كبر معاها ،
٣- او ممكن توصلي انك تكوني مجرد رد فعل لكل اللي بيحصل حواليكي وعمرك ماتكوني فاعل ابدا ،
٤- او انك تكوني معتمدة تماما على اللي حواليكي في تنظيم مشاعرك واحساسك بنفسك ودي حاجة مشتركة بين النرجسي وضحيته بغض النظر عن طريقة التنفيذ ، ٥- او بقى انك تبقي كيرتيكر ،اللي هو بيعتني بكل حد واي حد والمنقذ والمساند لكل اللي حواليه
الحاجات دي كلها بتخلي الشخصية الاعتمادية مركزة كل طاقتها على الاخرين ودة بيخلي مفيش أي طاقة تعيشي حياتك انتي . الارتباط الشديد والتعلق الزيادة دة بيوصلك انك تنفصلي عن نفسك ،بتفقدي الاتصال بنفسك وبتفقدي القوة والقدرة على التفكير والاحساس والتصرف والاعتناء بنفسك ،انتي بتفقدي السيطرة تماما على نفسك وعلى حياتك . ومين اللي بيكون معاه التحكم والسيطرة دي ؟ الشخص اللي انتي متعلقة بيه طبعا
الكاتبة بتقول انها بتعالج الشخصية الاعتمادية ولما بتسألهم عن مشاعرهم او تفكيرهم مش بيعرفوا يجاوبوا لانهم مش عارفينها لان تركيزهم مش بيكون على نفسهم أصلا
في حالة حياتك مع النرجسي وتعلقك بيه غالبا بتكوني مقتنعة انه ماكنش عندك اختيارات غير انك تتعلقي بيه وغير انك تكوني مهووسة بيه وبالمشاكل معاه
وللأسف البعض منكم بتوصل لانها تكون مهووسة بالسيطرة على أولادها وعلى مشاكلهم وتقريبا مش بتديهم مساحة يعيشوا حياتهم ولا يشيلوا مسئولياتهم ولا يحلوا مشاكلهم بنفسهم ودي بتكون خطر ع الأولاد زيها زي النرجسي ،
معنى كدة ان الشخصية الاعتمادية بتتعلق بحد غير النرجسي وتدمنه ؟ طبعا هي مدمنة أولادها وصديقتها ومدمنة اصلاح ومدمنة اسعاد كل الإدمان دة عبارة عن تعلق ،يعني المقصود بفك التعلق هنا مش بس عن النرجسي لا فك التعلق بأي حاجة تكوني متعلقة بيها بشكل مرضي لان دة حيساعدك تعيشي حياتك هنا والان
فك التعلق بيتطلب منك تقبل الحقائق زي ماهي وتقبل الحقائق بيتطلب الايمان بنفسك وقدراتك والايمان بالقدر (تسليم وتفويض ) والايمان باولادك وبانهم يقدروا يديروا حياتهم لوحدهم ،
فك التعلق بيديكي الفرصة انك تكوني مسئولة عن نفسك بس وتبطلي تشيلي مسئوليات غيرك وفي نفس الوقت كل واحد من اللي حواليكي يتمكن من انه يشيل مسئولية نفسه ، بتحرري نفسك من هموم اللي حواليكي ومن محاولة حل مشكلات مالهاش حل وبيعلمك تفوضي وتسيبي الحاجات الخارجة عن ارادتك لربنا وهو يحلها ،ودة بيتوقف على مدى ثقتك بربنا ،عشان كدة بنقول ان القرب من ربنا بيطمن بيخليكي تبقي فاهمة ان فيه حد قوي وقادر وعارف حيحل المشكلة ازاي وبتكوني مؤمنة ان مش واجبك انك تحليها طالما خارجة عن قدرتك وارادتك
فك التعلق مش انسحاب بارد من العلاقات ولا عدم حب للي حواليكي بالعكس فك التعلق هو حب للي حواليكي ولنفسك كمان
فك التعلق حيخليكي تقدري تاخدي قرارات صائبة ،وتقدري تحلي مشاكلك ، حتحسي انك بقيتي حرة وحتقدري تحبي اللي حواليكي صح وتحبي نفسك في نفس الوقت
تمرين الحلقة :
١- اكتبي عن الشخص اللي انتي متعلقة بيه او المشكلة ، اكتبي على اد ماتحسي انك عايزة تكتبي وركزي علي افكارك انتي بتفكري في ايه وحاسة بإيه
٢- حاسة بايه بالنسبة لفك التعلق سواد بالشخص او بالمشكلة واللي هي اكيد متعلقة بالشخص (النرجسي اكيد) ، ايه اللي ممكن يحصل لو فكيتي التعلق دة
على مدار الحلقات لما نخلص الكتاب ان شاد الله حنكون اتعلمنا ازاي نفك التعلق تماما باي حد واي حاجة مش بس النرجسي ولا بس مشكلة النرجسي