رقم حجز الاستشارات والكورسات : ٠٠٢٠١١٥٠٥٨٦٠٥٢
اكبر مشكلة بتواجه ضحية النرجسي انها بتوصل لمرحلة بتكره نفسها الاعتمادية ٩
شوفي انتي عيشتي حياتك غالبا فيها معاناه سواء رفض من الابوين او واحد منهم او ان حد في الاسرة كان مريض مرض خطير فمكنش فيه مجال ان حد يهتم بيكي ويشبعك حب ويمنحك القبول في طفولتك او انك عيشتي في بيئة فيها حد شديد السيطرة او حد مدمن كحول او مخدرات ،المهم ان الشخصية الاعتمادية في الغالب بتنشأ نتيجة خلل في الطفولة وغالبا بيكون نقص القبول ونقص الحب او الحصول على حب مشروط ،لما تعملي كذا ححبك . ودة بيزرع جواكي انك قليلة وانك انتي شخصيا لاتستحقي الحب لكن اللي يستحق الحب افعالك وبالتالي بتنشأي مقتنعة تماما انك مش حيكون لكي قيمة غير لو اعطيتي وراضيتي وراعيتي وانتي في نفس الوقت متخيلة انك ماتستحقيش انك تتحبي ولا حتى منك انتي يعني بتشوفي انك ماتستاهليش انك تحبي نفسك وفي نفس الوقت مش قادرة ترضي عن نفسك ، واحيانا دة بيحصل لو انتي اتعرضتي لتحرش او اعتداء جسدي من أي نوع وانتي طفلة دة بيولد عندك كره لجسدك واحساس بالرخص ودة بيولد كره الذات دا غير المجتمعات الذكورية الكارهة للمرأة اللي بتزكي الإحساس دة عندك ودة غالبا بيكون في المجتمعات القبلية والريفية في الوطن العربي كله
في النهاية انتي بتلاقي نفسك مش بتحبي نفسك لا شكلا ولا موضوعا ، انتي اتعلمتي كمان ان اللي يحب نفسه دة لازم يكون اناني
لما بتكوني مش بتحبي نفسك بتكوني مش حابة افكارك ومش قابلاها ولا حابة مشاعرك ولا معترفة بيها واذا اعترفتي بيها بتهمليها وتقولي انها مش مهمة ودايما شايفة انك لازم تدي عشان تحافظي على علاقاتك وبتتخيلي ان مش لازم تاخدي المهم تدي وبس ودي قيمتك قيمتك في العطاء والخدمة والمراعية ودة بيساعدك على انك تبقي في العلاقات السامة لان الاسوياء بيدوا زي مابياخدوا اما اللي بياخد بس وانتي مستمتعة بعطائك له فدة انسان غير سوي ولقى حد عبيط فبيستعبطه ،هي كدة بالظبط ومش حقول لقى حد طيب لان الطيبة مش عبط والطيبة مش انك تسيبي الناس تستغلك والطيبة مش انك تتنازلي عن حقك ، لا الطيبة حاجة تانية خالص ،ان الله طيب يحب الطيب وربنا قوي ومعطي وشديد العقاب ورحيم ووهاب وشديد البطش ورحمن وقاهر فوق عباده ،يعني الطيبة لاتتعارض مع القوة ابدا والطيبة مش معناها انك تسيبي الناس تاكل حقك .
طيب يعني اعمل ايه ؟ لازم تكَرَمي نفسك وعشان تكرميها لازم تكوني عندك وعي بيها وعشان يكون عندك وعي بيها يبقى لازم تراقبي افكارك وتعرفي انتي بتفكري في ايه وبتشعري بإيه ومحتاجة ايه وماتنكريش مشاعرك واحتياجاتك ،كمان لازم تقبلي نفسك زي ماهي مش مهم الناس تقبلها المهم انتي تقبليها ولما تحبيها وتقبليها الناس حتقبلك زي ما انتي ، اقبلي نفسك من جوة مش بس شكلك وشعرك ولبسك لا اقبلي قلبك وروحك ومشاعرك ، ارفضي الإحساس بالذنب اللي بيزرعه جواكي النرجسي ارفضي تشيلي ذنب مش بتاعك
التمريين الأول : لازم طول النهار تسألي نفسك محتاجة ايه اجيب لك ايه تشربي تاكلي تنبسطي محتاجة حضن محتاجة طبطبة وادي نفسك احتياجها بنفسك ماتستنيش حد يلب الاحتياج دة
لما يكون احتياجك في ايد حد غيرك لازم تناقشيه وتطلبي منه ينفذ لك احتياجك دة لو كان من حقوقك عليه ماتتنازليش عن حقك
التمرين التاني
اكتبي دلوقتي انتي حاسة بإيه تجاه نفسك سواء سلبي او إيجابي وبعد ماتخلصي كتابة اقرأي كل اللي كتبتيه وحكمي نفسك فيه هل كله صح؟ هل حكمتي بالعدل ولا جيتي على نفسك ، وبعدين وري الكلام دة لصديقتك المقربة السوية وخليها تقول لك اذا كنتي عادلة في الحكم على نفسك ولا جيتي عليها