رقم حجز الاستشارات وكورس كوني ملكة : ٠٠٢٠١١٥٠٥٨٦٠٥٢
اتكلمنا الحلقة اللي فاتت عن معنى الغضب وعن بعض الأسباب اللي بتخلي الشخصية الاعتمادية ماتعرفش تتعامل صح مع مشاعر الغضب
النهاردة حنتكلم عن اهم سبب بيخلينا كلنا نتعامل مع غضبنا بطريقة غلط
اللي هو مكتسباتنا من التربية والمعتقدات الخاطئة عن مشاعر الغضب واحيانا الفهم العام المغلوط عن المشاعر دي ،الحلقة اللي فاتت اتكلمنا عن الغضب اللي نهى عنه سيدنا النبي عليه الصلاة والسلام واتكلمنا عن الغضب المحمود اللي الغضب لانتهاك حرمات الله والغضب لدفع الأذى قبل وقوعه ،طيب خلينا نتعرف علي الأفكار المغلوطة الل اتعلمناها عن الغضب
(١) الناس الطيبين والمحترمين والمهذبين مفروض مايشعروش بالغضب مفروض مايغضبوش لان الغضب مش مقبول ومش حاجة كويسة (في حين انه مشاعر بتيجي غصب عننا وماينفعش نقول لحد ماتحسش او ماتشعرش.. دا غير ان الغضب مشاعر ضرورية للحفاظ على النفس والنوع والكرامة والعرض ،لكن الصح هو ليس الشديد بالصرعة انما الشديد هو من يملك نفسه عند الغضب ،وحنقول ازاي في اخر الحلقة
(٢) الغضب معناه فقدان السيطرة على النفس ،يعني عشان نغضب يبقى لازم نكسر ونزعق ونفقد اعصابنا ودة للأسف بنتعلمه واحنا أطفال من اللي حوالينا وبنكتسبه بالتعلم مش بالفطرة
(٣) لو غضبنا من حد حيهجرنا ويتخلى عنا ويرفضنا ودة برضه بنتعلمه من التربية الغلط بدل مابنهذب سلوك الطفل بنقول له ماتشعرش ولا تعترف بمشاعرك ولا حزعل منك او والا حتتعاقب
(٤) مش مفروض نغضب من حد مهما عمل فينا عشان مفروض نكون عندنا حلم وربنا بيحب الحليم ، ايوة ربنا بيحب الحليم لكن اذا شفت محارم ربنا بتنتهك وماغضبتش تنطبق عليك مقولة الامام الشافعي (من استغضب ولم يغضب فهو حمار ومن استرضي ولم يرضى فهو شيطان) وسيدنا النبي عليه الصلاة والسلام كان له مواقف كتير غضب فيها لانتهاك حرمات الله .طيب مش من ضمن حرمات الله قذف المحصنات والظلم والتجويع ، اغضبي لحقوق ربنا فيكي لكن ماتكونيش زي النرجسي وتغضبي عشان نفسك .كوني زي سيدنا علي لما مارضيش يقتل عمرو بن ود في المبارزة عشان عمرو بصق في وجهه الكريم وقام وتركه فلما عمرو هم بقتل سيدنا علي بادره علي بضربة قتلته فلما سألوه رضي الله عنه انت ليه ماضربتوش من قبل قال لاني لو قتلته ساعتها كنت حقتله غضبا لنفسي لبصقه في وجهي ،
انا عارفة ان الموضوع مش سهل ومحتاج شغل كتير على نفسنا لكن المشكلة أصلا اللي بتعانيها الشخصية الاعتمادية انها أصلا بتخاف تقول انها غضبانة ومش بتظهر غضبها وبتكبته .
(٥) مش مفروض نخلي حد يغضب مننا لان اكيد لو حد غضب مننا فاحنا حنكون غلطنا واحنا مش مفروض نغلط ، طيب في حالة النرجسي هو غضبان لوحده وبيحسسك انه غضبان منك فمش شرط ان لو حد غضب منك انك تكوني فعلا السبب او انك تكوني غلطتي ممكن حد يغضب منك عشان اخدتي الترقية وهو لا وهي من حقك فين غلطك هنا ؟
(٦) لما نغضب من حد لازم نعاقبه وننتقم ولو حد غضب مننا فبرضه لازم يعاقبنا وينتقم مننا ودة لا شرعي ولا أخلاقي وهو دة الغضب اللي النبي عليه الصلاة والسلام نهى عنه وقال لاتغضب
طيب كدة عرفنا كل الأسباب اللي بتخلينا مانعرفش نتعامل مع غضبنا عايزين بقى نتعلم ازاي نعمل دة ازاي نتعامل مع الغضب واحنا اللي نتحكم فيه مش هو اللي يتحكم فينا ، ان شاء الله الحلقة الجاية حنقول الكلام دة