رقم حجز الاستشارات وكورس كوني ملكة : ٠٠٢٠١١٥٠٥٨٦٠٥٢
ازاي تتعاملي مع مشاعر الغضب وازاي تعبري عن غضبك بشكل صحي من غير ماتؤذي نفسك ولا تؤذي غيرك؟
أصلا الشخصية الاعتمادية طول الوقت معرضة لانها تغضب ليه؟ لانها دايما بتدخل في مثلث الدراما اللي قلناه في حلقة ( الاعتمادية ٦ ) حقولك بسرعة مثلث الدراما دة ايه دة ياستي انقاذ اضطهاد ضحية يعني ايه يعني انتي مدمنة انقاذ يعني بتنقذي اللي حواليكي من مشاكلهم وتساعديهم وتقويهم وتضحي بنفسك عشانهم وبعدين لما تحتاجيهم متلاقيش حد منهم جنبك فتحسي انك ضحية وتبدأ مشاعر الغضب تتملكك وهكذا طول ما انتي شخصية اعتمادية طول كما انتي في مثلث الدراما اللي بينتهي بيكي في حالة غضب وانتي تكبتي الغضب وتلومي نفسك انك غضبانة فتغضبي اكتر وهكذا وطبعا بما انك عايشة مع نرجسي او أي شخصية مستغلة ومسيئة فانتي دايما موجودة في مثلث الدراما دة وفوق الكلام دة الحزن والخوف وهم الاتنين بيتحولوا أحيانا لغضب
احنا فهمنا من الحلقات اللي فاتت ان الغضب المحمود له فايدة اللي هي دفع الأذى قبل وقوعه او إيقاف وقوع الأذى المستمر . كمان من فواذده انه بيساعدنا أحيانا اننا نحس اننا اقل ضعف واكثر قوة
لكن للأسف اللي بيحصل اانك مش بتتعاملي معاه صح وكمان بتشعري الذنب لمجرد انك غضبتي ،ولما بتكبتي الغضب ويتراكم خصوصا في الحياة مع النرجسي بتوصلي لمرحلة الغضب المنهي عنه واحيانا تنفجري وتكسري وتصرخي ويكون غضبك شبيه بغضب النرجسي وطبعا دة بيديه الفرصة يثبت عليكي انك مجنونة زي ماهو طول الوقت بيقول عليكي،
طيب حنعالج الكلام دة ازاي؟ لازم ناخد وقتنا الكافي عشان نعيد برمجة دماغنا ونصلح مفاهيمنا ومعتقداتنا الغلط ازاي؟
١- شوفي المقولات اللي قلناها الحلقة اللي فاتت (الاعتمادية ١٢) شوفي انهي فيهم انتي مصدقاها وبتتعاملي مع غضبك بناء عليها وابدأي تفكري فيها وتغيريها للصح يعني تبدلي الفكرة الغلط بفكرة تانية صحيحة وانا كل مقولة قلت لكم الصح بتاعها لو اقتنعتي يبقى كدة اتخلصتي من المعتقد الخطأ وبالتالي حتدي نفسك فرصة تشعري بالغضب بدون ماتحسي بالذنب وكمان تسمحي للي حواليكي انهم يحسوا بالغضب من غير ماتخافي من مشاعرهم ولا تمنعيهم منها خصوصا اطفالك بس المهم انك لما تتعلمي تتعاملي مع الغضب حتتعلمي تعلميهم هم كمان ازاي يتعاملوا مع مشاعرهم دي
٢- لازم تفهمي ان مفيش حد ينفع يحكم على مشاعر حد ولا حتى مشاعره هو نفسه ، لكن مفروض نشعر المشاعر بشكل حيادي وبعدين نسمع الأفكار اللي سببتها ونفكر فيها ونشوف الأفكار دي صحيحة ولا لا وبناء عليه المشاعر ممكن تتغير ،يعني ايه الكلام دة ؟ يعني انا دلوقتي اشعر بالغضب لازم افكر ايه الفكرة اللي في دماغي خلتني اشعر بالغضب ممكن تكون الفكرة نتجت عن موقف زي مثلا قرأت تعليق فيه هجوم على كلامي ونقد لازع فالفكرة اللي جت لي فورا انه بيهاجم شخصي يعني بيعيب فيا انا شخصيا فلما افكر في الفكرة دي اشوف هي صح ولا غلط لو فكرت بموضوعية حلاقي ان هو مايعرفنيش هو مش عاجبة كلامي مش عاجبة الموضوع ومش متفق معايا في الرأي فبيهاجم بس فلما افهم ان الفكرة غلط وانه مش بيهاجم شخصي الشعور بالغضب بينطفئ وممكن يتحول لاي شعور تاني او ميبقاش فيه شعور مكانه أصلا ، يبقى انتي لما تشعري بالغضب ماتقوليش لا ماينفعش اغضب غلط لا فكري في سبب الغضب وشوفي هو سبب يستحق الغضب ولا لا راقبي افكارك عندنا حلقتين تقريبا في الموضوع دة التفكير في افكارك
٣- خدي قرار بشأن تصرفاتك لما بتغضبي وشوفي ايه الحاجة اللي دايما بتكون سبب غضبك وحاولي تاخدي خطوة إيجابية تجاها يعني لو الغضب سببه عدم تلبية احتياجاتك لازم تتعلمي تطلبي وتلحي على تلبية احتياجاتك اذا كانت مسئولية غيرك واذا كانت مسئوليتك اتعلمي تحطي احتياجاتك اول أولوية عندك ،تجنبي الدخول في مثلث الدراما ، اطلبي حقوقك او احتياجاتك بدون صراخ وهجوم اطلبي بهدوء وحسم ولو ماتمتش الاستجابة لكي ابدأ امتنعي عن تلبية احتياجات الاخر لحد ماتحصلي على حقوقك المهدورة ودة طبعا كلام خاص بالشخصيات المستغلة مش الشخصيات اللي بتقصر بسبب عجز او عدم قدرة
ماتسيبيش الغضب يسيطر عليكي اتعلمي انتي اللي تسيطري عليه عن طريق التفكير في افكارك وكمان عن طريق تفريغ الغضب بشكل صحي زي الرياضة الكيك بوكسينج واحيانا الاسترخاء وتغيير الوضعية زي ماسيدنا النبي عليه الصلاة والسلام قال ، السجود الكتير والاذكار والدعاء
الكتابة والتفريغ الوجداني