رقم حجز الاستشارات وكورس كوني ملكة : ٠٠٢٠١١٥٠٥٨٦٠٥٢
الاعتمادية ١٤
اذا كنتي بتخافي تاخدي قرار شراء علبة كريم من السوبر ماركت وبتقفي ادامها ربع ساعة عايزاها وخايفة تاخديها ومترددة في اتفه القرارات ،مهما كان السبب في التردد سواء هو الكريم كويس ولا نوعه وحش او انك مش عارفة رد فعل النرجسي لو اشتريتيه فخايفة تقرري تشتريه او أي سبب مخليكي تترددي ،في النهاية انتي كمعتقلة في سجن النرجسي فانتي مش بتثقي في عقلك ولا في تفكيرك وبالتالي بتكون النتيجة المؤذية انك تفضلي عدم التفكير وتسيبي اللي حواليكي ياخدولك قراراتك واحيانا دة بيكون من ضمن أسباب الرتباطك بالنرجسي بس بيكون السبب دة في اللاواعي وانتي مش مدركاه
طيب ايه اللي وصلك لكدة ،ايه اللي خلاكي مش بتثقي في عقلك وتفكيرك؟
التوتر والفوضى اللي بتعيشيها مع النرجسي وكذبك على نفسك طول الوقت وانكارك لاحتياجاتك ولمشاعرك وكبتها ، قلقك من رأي الاخرين فيكي وسعيك انك تكوني كاملة ولازم ماتغلطيش ابدا وبالتالي خوفك من انك تاخدي قرار غلط تتلامي عليه فتوقفي تفكير أصلا ، دة غير الكلام اللي بيتقال لك انك ماينفعش تفكري ،انتي تعملي أي حاجة غير انك تفكري ،انا لما الاقيكي بدأتي تفكري اقلق وطبعا دة يا اما بيتقال لك وانتي طفلة او من الزوج النرجسي ، او انهم دايما يقولوا لك انك غبية باستمرار لحد ماصدقتي وكمان هم دايما عايزين ياخدوا القرارات بدالك من باب السيطرة فعشان يعملوا دة لازم ينتقدوا قراراتك بشكل دائم ومستمر ، وطبعا اذا كان عندك مشاكل دراسية او حد من مدرسينك كان دايما يقول لك انك مش نافعة ولا حتنفعي او انك فاشلة او غبية . كل الحاجات دي بتوصلك في الاخر انك تخافي تفكري أصلا وتعتقدي انك لو فكرتي او اخدتي قرار حتبوظي الدنيا
طيب ازاي تتغلبي ع المشكلة دي ازاي تتعلمي تشغلي مخك وتثقي فيه وتقدري تاخدي قرارات بهدوء وبدون خوف؟
١- اول حاجة لازم تحققي السلام لعقلك وتدي نفسك الهدوء وتفصلي نفسك عن الاحداث واللي بيحصل والفوضى اللي حاصلة في حياتك وتهدي تماما وبعدين تبدأي تقرري ،واذا لقيتي نفسك مش عارفة تاخدي القرار النهاردة مش مشكلة اكيد دة مش الوقت المناسب ولما تكوني مستعدة حتاخديه
٢- اللجوء لربنا وصلاة الاستخارة خطوة مهمة جدا في قرارتنا ودي نعمة ربنا انعم بيها علينا لانها بتدينا سكينة واطمئنان للقرار اللي بناخده لننا عارفين اننا استخرنا ربنا وانه بيساعدنا وبيختار لنا
٣- بطلي تسيئي استخدام عقلك ازاي بطلي قلق واندفاعية ،القلق والاندفاعية بيخلوكي تسيئي استخدام عقلك بيعطلوه أصلا
٤- غذي عقلك . دلوقتي انتي عايزة تاخدي من عقلك قرار وهو مش فاهم حاجة عن الموضوع اللي حتاخدي قرار بشأنه ولما عقلك يقف تتهميه انه سيء وتتهمي نفسك بالغباء ودة مش عدل ، لما تكوني عايزة تحلي مشكلة او تاخدي قرار لازم تغذي عقلك بالمعلومات الكافية عن المشكلة دي اقرأي وابحثي وافهمي كل الملابسات وكل المعلومات الكافية عشان تعرفي تختاري . من حق عقلك عليكي انك تغذيه زي مابتغذي جسمك العقل محتاج علم ومعرفة عشان ينمو لازم تقرأي
٥- بطلي تتكلمي عن عقلك بالسوء ماتدعميش الشخصيات السامة اللي كانت بتسيء لعقلك وتفكيرك ،غيري الحوار الداخلي اللي هو كلامك لنفسك طول الوقت بدل ماتقولي انا غبية قولي انا اقدر افكر كويس انا نسبة ذكائي عالية ، انا اقدر اخد قرار سليم انا اقدر ابدع واحسن التفكير ،صدقيني مع التكرار عقلك حيصدق وحيبدأ يشتغل بالشكل اللي انت عايزاه
٦- دربي نفسك على انك تفكري وتاخدي قرارات ولو بسيطة وبالتدريج حتاخدي القرارات المهمة ، كوني رأي من خلال القراءة الكتير حتلاقي انك قادرة تكوني رأي عن موضوع معين ، اتعلمي تعيدي استخدام مخك ،اكيد انتي كنتي بتعرفي تعملي دة قبل ماتعرفي النرجسي ولو ماكنتيش فجه الوقت انك تعمليه
دلوقتي مين بياخد لك قراراتك وايه شعورك تجاه دة
مين اللي قال لك انك ماتعرفيش تفكري ولا تاخدي قرار
اقرأي كل يوم حاجة زودي معلوماتك يوميا ،اليوم اللي يعدي من غير مانتعلم فيه حاجة جديدة بيؤخرنا عن العالم يوم ان مكانش سنة
#النرجسي #الحرب #التعايش #الخداع #اللؤم #الكتمان #الحماة #النرجسية #القوة #الذكاء #مشاكلـزوجية #زواج #ازواج #زوجات #اسرة #اسرية #الخفي #النرجسيالخفي #حبينفسك #كونيملكة #القوة #الثقة #الاكتئاب #الصحة #النفسية