رقم حجز الاستشارات وكورس كوني ملكة : ٠٠٢٠١١٥٠٥٨٦٠٥٢
الاعتمادية (١١) هل بتسمحي لنفسك تغضبي من النرجسي؟
قبل أي كلام عايزة أوضح الغضب اللي بنتكلم عنه يعني ايه الغضب معناه لغويا (هو غليانُ دم القلب، طلبًا لدفع الأذي عند خشية وقوعه، أو طلبًا للانتقام ممن حصل له منه الأذى بعد وقوعه)
يعني ايه الكلام دة يعني انك تحسي بغيظ ودمك يغلي زي ما احنا بنقولها بالعامية او دمك اتحرق من الغيظ لانك شايفة اللي ادامك ناوي يؤذيكي وغليان الدم دة بيكون دافع لكي انك تتدفعي الأذى عن نفسك ،او ان يكون الغضب عبارة عن غليان الدم لان الأذى وقع عليكي وانتي عايزة تنتقمي
ودة معناه ان الغضب له وضعين وضع مطلوب او حميد وهو دفع الأذى قبل وقوعه ودة الوضع الفطري والوضع التاني اللي هو طلب الانتقام بعد وقوع الأذى ودة اللي نهى عنه سيدنا عليه الصلاة والسلام
الوضع اللي مقصود النهاردة في كلامناهو الوضع الأول اللي هو دفع الأذى قبل وقوعه او استنكاره بعد وقوعه وعدم الموافقة عليه مش طلب الانتقام ، لازم التوضيح عشان محدش يفهم غلط
طيب ايه فايدة الغضب للإنسان ؟ وايه أنواع الغضب المحمود دة ، الغضب المحمود اول نوع واهم نوع هو الغضب لانتهاك حرمات الله
والتاني الغضب اللي قلت حنتكلم عنه اللي بيه نقدر نمنع الأذى ومن غيره حيفضل الأذى يقع علينا ومش حيكون عندنا اي طاقة لمنع وقوعه . طيب ايه علاقة الكلام دة بالشخصية الاعتمادية؟
عادة الشخصية الاعتمادية مش بتسمح لنفسها أصلا انها تغضب او بمعنى اصح بتكبت غضبها ومش بتحاول لاتظهره ولا تعبر عنه ولا تعترف بوجوده وبالتالي مش بتعرف تتعامل معاه صح طيب ليه دة بيحصل؟ حقول لك النهاردة ٣ أسباب وان شاء الله الحلقة الجاية حقول لك السبب الرابع وانتي لما تعرفي الأسباب حتعرفي ازاي تحلي المشكلة وانا حقول لك تمارين تدربي بيها نفسك على تقبل الغضب والتعامل معاه بشكل صحي
١- لانها بتخاف من عواقب اظهار الغضب سواء بتخاف من النرجسي اللي معاها لانه زرع الخوف جواها منه او لانها اتعلمت من طفولتها انها لو عبرت عن الغضب حيتم ايذائها وتتعنف سواء جسديا او لفظيا
٢- الشخصية الاعتمادية عندها مشكلة الشعور بالذنب وجلد الذات فلو فلت منها الغضب أصلا حتفضل تجلد نفسها انها غضبت واتسببت في اذى لاي حد حتى لو الحد دة اذاها أصلا ، وطبعا بتفضل تقول لنفسها انتي أصلا السبب انه اتهور عليكي انتي استفزيتيه وكلام من دة كتير
٣- لما البني ادم يكبت غضبه فترة طويلة مع استمرار الضغط عليه بيجي عليه وقت ينفجر فانتي لما النرجسي يفضل يضغط وانتي تكبتي غضبك بتيجي في وقت تنفجري وتنهاري وبعضكم بيصوت ويصرخ ويعمل انفجارات رهيبة بتوصل للتكسير والتخريب او ضرب النرجسي ودة بيكون فرصة عظيمة للنرجسي انه يسجل عليكي انك مجنونة ويبدأ يدور على طريقة يثبت عليكي الواقعة عشان يستخدمها ضدك بعد كدة واحسنهم بيروج في محيطك انك بقيتي عصبية ويمهد انه يسيبك او يتجوز عليكي او يعمل أي حاجة فيكي ويكون الكل في صفه عشان انتي عصبية ومضايقاه بعصبيتك ،فلما انتي بتمري بالتجربة دي اول مرة بترجعي تلومي نفسك وتزيدي في كبت الغضب وتتعلمي انها كانت غلطتك انك سيبتي نفسك تغضبي