المتعاطفة ١٠
قبل مانبدأ في حلقة النهاردة عايزة اجاوب على سؤال اتكرر كتير وطبعا لهم حق يسألوه
ليه الشخصية المتعاطفة عنها حدس عالي واحساس بالناس ومع ذلك مقدرتش تميز النرجسي ولا فهمته طول سنوات حياتها معاه؟
أولا : أي متعاطفة اول ماشافت النرجسي استغربت ملامحه وحست بحاجة غريبة فيه لكن الحب الهائل اللي بيمثله النرجسي بيلعب على التعاطف اللي عن المتعاطفة واللي هو اقوى بكتير من حدسها او أي استبصار أصلا
ثانيا :المتعاطفة أصلا مشاعرها متأججة بتحب أي حد وكل حد وبتوصل انها بتحب الحيوانات والنباتات والجماد فلما تلاقي واحد بيموت فيها مش حتحبه ومش حتصدقه ، كتير جدا جدا من الحالات تقول كنت حاسة انه فيه حاجة غلط من اول يوم لكن هو غطى على احساسي بتصرفاته اللي نفت الإحساس تماما
ثالثا : المتعاطفة بتكون محتاجة لحد تسعده وتساعده وتعالجه وهو دة مصدر سعادتها فممكن جدا تكون عرفته وفهمته وعايزة بقى تعالجه وتستمر معاه لانها مدمنة أصلا وبرضه حالات كتير حصل معاها كدة
رابعا : مش كل الشخصيات المتعاطفة عندها الاستبصار الحدسي اللي تعرف بيه الشخص اللي ادامها وحنا قلنا في حلقة (المتعاطفة 3) أنواع الاستبصار شوفوها تاني
في النهاية عايزة أقول ان المتعاطفة نقطة ضعفها الحب فلما حد ييجي يقولها انه حيموت من كتر مابيحبها لو كان وحش حتحبه شوفتوا الجميلة والوحش . اهي دي المتعاطفة
طيب نبدأ بقى في حلقتنا من كتاب المتعاطفة
المتعاطفة لها احتياجات زيها زي أي شخص لكن مشكلتها انها مش بتعرف احتياجاتها او بالاصح مش بتكون شايفاها ليه؟ لانها شايفة احتياجات اللي حواليها وتخيلي بقى لما يكون اللي حواليها وبتدور في فلكه نرجسي دة اللي هو بيفرض احتياجاته على أي حد وكل حد ، فحيكون ازاي مع المتعاطفة . طبعا هو بيلاقيها عايزة حد تراعيه وتلبي له احتياجاته فبيستغل الكلام دة أسوأ استغلال
طيب دلوقتي لازم نحل المشكلة دي ازاي ؟ لازم تتعلمي تحددي احتياجاتك
تمرين
اكتبي سمات شخصيتك سمة سمة واحتياجاتك بناء على كل سمة . ازاي ؟ حديكي كذا مثال تكتبي زيهم
١- من سماتي كمتعاطفة استيعاب من حولي واحتوائهم وحل مشاكلهم
١- احتياجي اني اختلي بنفسي فترة من الزمن لاعادة شحن طاقتي
٢- من سماتي كمتعاطفة الاستبصار الحدسي (يعني بعرف اللي بيتكلم اذا بيكذب ولا لا)
٢- ان زوجي يكون صادق معايا واي حد يتعامل معايا يكون صادق
٣- من سماتي كمتعاطفة اني بحس بالمشاعر السلبية بطريقة زيادة عن الناس
٣- احتياجي ان زوجي يستجيب لطلبي لما اطلب اغادر مكان ما لاني ممكن أكون حاسة بحاجة بس مش عارفة ايه هي وفي الاخر بيحصل مشكلة او أي حاجة فعلا
... اكتبي عشر سمات وبالتالي عشر احتياجات بالطريقة اللي قلتها لكم دي
طبعا انتي كزوجة نرجسي وكمتعاطفة فانتي التمرين دة مهم جدا جدا لكي ، عارفة ان فيه ناس حتقول طب وايه فايدة اني اعرف احتياجاتي اذا النرجسي عمره ما حيلبيها ولا يسيبني البيها ، عايزة أقول لك لا مفيش الكلام دة اذا تعافيتي كل الناس اللي تعافت قدرت تاخد اللي هي عايزاه من النرجسي او سابته وقدرت تعيش وتلبي لنفسها كل احتياجاتها بمساعدة أهلها وصديقاتها . بعد ماتخلصي العشر سمات والعشر احتياجات اكتبي قصاد كل احتياج مين ممكن يساعدك في تلبيته اذا محتاجة مساعدة واكتبي ازاي حتطلبي المساعدة دي حتقولي ايه ؟
طيب ازاي تحمي نفسك من انك تصبحي شخصية اعتمادية؟
في حلقة الشخصية الاعتمادية قلنا ان الشخصية الاعتمادية هي تطور للشخصية المتعاطفة بس للأسف تطور للأسوأ ،وقلنا كمان ان الشخصية المتعاطفة لما بتعيش فترة طويلة مع النرجسي بتتحول لشخصية اعتمادية . طيب تعملي ايه عشان دة ميحصلش ؟
دة اللي حنقوله الحلقة الجاية ان شاء الله
جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress/
رابط حلقة السيرة
https://youtu.be/8i1UjTF7aEI