المتعاطفة ١٣
ازاي تنمي قدراتك الخاصة كمتعاطفة؟
ازاي تقوي الاستبصار اللي عندك أيا كان نوعه ؟
المتعاطفة زي ما اتفقنا ربنا أعطاها مزايا وهدايا غير باقي البشر وعشان نحافظ على الهدايا دي ونقويها لازم نعمل شوية حاجات ، وخصوصا المتعاطفة اللي عانت من الحياة مع النرجسي طبعا بتفقد جزء كبير من موهبتها واستبصارها وبتشك في نفسها اكتر من المتعاطفة اللي ماتعرضتش للاساءة والاستغلال
طيب بالنسبة للاتنين ازاي نحافظ على او نسترد مافقدناه من هبة ربنا لنا؟
١- لازم تكوني مؤمنة بنفسك ، يعني ايه ، يعني مقتنعة من جواكي بانك شخص متميز وربنا مخصصه بهبات مش مديها لكل الناس ، طيب ازاي أصلا تعرفي تعملي دة وانتي أصلا متعرفيش نفسك؟ طيب وهو ينفع تؤمني بحد من غير ماتعرفيه؟
يبقى اول خطوة حنعملها اننا نتعرف على نفسنا ، طب ازاي؟
انا حقولك هاتي كشكولك الجميل واكتبي فيه كل مرة شفتي رؤية واتحققت ، وكل مرة عرفتي فيها حاجة قبل ماتحصل وفعلا حدسك كان صحيح . اكتبي كل مرة شميتي ريحة المطر وكل مرة شميتي ريحة مسك ومفيش أصلا مسك في المكان اللي انتي فيه ، وكل مرة تذوقتي فيها أي اكل او شرب وانتي مش عندك أصلا الحاجة دي . اكتبي كل مرة حسيتي فيها بأي حد بيدعي انه مبسوط وهو في الحقيقة حزين وانتي عرفتي وساعدتيه وقدرتي تخرجيه من حزنه ، اكتبي كل مرة سمعتي فيها بحد بيستغيث بيكي او بينده وهو في مكان بعيد عنك مسافات طويلة ، اكتبي كل المواقف دي وكل شوية تقرأي اللي كتبتيه وشوفي كام مرة ساعدتي حد حسيتي انه حزين او عنده مشكلة ، لما تقرأي الكلام دة حتعرفي نفسك وحتحبيها وحتتأكدي ان ربنا فعلا خصك بهدايا عظيمة
طيب تاني خطوة :
اقعدي مع نفسك شوية وفكري في شيء إيجابي انتي بتتمني انه يحصل لك ومش بيحصل ابدا وفكري كدة شوية لما بتفكري تحققيه بنفسك بيكون تفكيرك ايه وبيكون حوارك الداخلي (يعني حوارك مع نفسك ) بيكون ايه ؟ انا حقول لك : لا انا مش حقدر ، لا الموضوع صعب ، لا النرجسي مش حيسيبني ، لا انا كبرت ، لا انا لسة صغيرة ، لا مش حعرف ، لا معنديش إمكانيات ، لا النرجسي ممكن يطلقني ، ..... كل الأفكار بتكون في الاتجاه دة وفكرة او فكرتين حيكونوا في الاتجاه الإيجابي اللي هو لو عملت كدة حيبقى معايا فلوس ، او اني حقدر اخلص من النرجسي .
وطبعا الكترة تغلب الشجاعة زي ما بيقولوا ، في الاخر الخوف بيغلبك ومش بتتحركي خطوة طيب نخلص من الأفكار السلبية دي ازاي ، ندخل اعمق شوية ونشوف سببها احنا قلنا الكلام دة في حلقات الثقة بالنفس ، هنا بقى حقول لك بالنسبة للمتعاطفة بالاخص ، السبب العميق ورا الأفكار السلبية دي بيكون إحساس المتعاطفة انها لا تستحق انها لاتستحق أي حاجة على الاطلاق ، هي مقتنعة انها مفروض تدي وتراعي وبس . ودة بيكون ايمان على مستوى اللاواعي يعني انتي مش بتكوني مدركة للاعتقاد دة ، ومن دلوقتي لازم تنتبهي انه موجود وتنتبهي انه غلط وانك تفهمي نفسك انك تستحقي اكتر من أي حد لانكب تدي اكتر من أي حد
طيب كمان حاجة لازم تعمليها عشان تعرفي نفسك اكتر .
ركزي مع نفسك وماتركزيش مع الاحداث سيبي الأمور تمشي مع نفسها وانتي ركزي مع نفسك لا تركزي مع الناس وتصرفاتهم وكلامهم ولا مع المواقف اللي بتحصل منهم ولهم خليكي في طريقك وخلي الحياة تمر من حواليكي بأحداثها وماتحكميش عليها ولا على اللي فيها متخليش تفكيرك يتشتت باللي عمل واللي قال ،اجتهدي انك ماتتأثريش بتصرفات البشر وحتى لو غضبتي او زعلتي متخلي شدة يطول ارجعي تاني ركزي في قدراتك واطيلي التفكير فيها لان انشغالك بغيرها بيضعفها وبيشتت افكارك ومتعرفيش تستقبلي الرسايل
من ضمن طرق زيادة الاستبصار :
هي بتقول اربطي نفسك بقوة اكبر واعظم منك عشان لما تضعفي او تقابلي كارثة حياتية او أي مشكلة كبيرة تكوني متأكدة انك حتلاقي حد يقف جنبك ويسندك ،، شوفي الناس دي بتدور لنفسها على رب ، يعني ايه رب ؟ يعني حد بيربي وبيراعي وبيمتلك وبينشيء يعني بيخلق ويتكفل بالمخلوق وبتربيته ، ليه بقى الناس دي بتقول كدة عشان تحمي الجهاز النفسي عشان تحسسه بالأمان اكتر ، شفتي بقى النعمة العظيمة اللي احنا فيها ، النعمة ان احنا لما لما تبقي عارفة وموقنة ان فيه حد عظيم وقادر قوي وجبار ولو طلبتي منه أي حاجة حيديها لك وحيعملها لك عاجلا او اجلا على حسب مصلحتك انتي مش مصلحته هو ، ولما تكوني مطمئنة انك لو اتظلمتي او حد تعدى عليكي حقك مش حيضيع لانه هو مش بيضيع الحقوق ومش بيغفر ولا بيسامح في حقوق العباد ، اد ايه حتكوني مطمنة وهادية وقلبك مرتاح ، وفي الحالة دي ذهنك حيكون صافي ويستقبل كل الرسايل والاشارات اللي ممكن ربنا يبعتها لك عشان يهديكي بيها وحتعرفي تشوفي وقفاته معاكي وارشاده ورعايته لكي
كمان هي بتقول لو انتي مش مؤمنة بوجود قوة عظيمة في الكون فانتي بتحجمي قدراتك الاستبصارية ، هي بتقول ايه بقى اتكمي مع القوة دي ومش لازم تتكلمي بصوت عال اتكلمي بعقلك وهي حتسمعك ، ودة حيخليكي تكوني متصلة بيها وحتستقبلي منها رسايل تقويكي وترشدك للطريق لحياة سليمة صحية سعيدة تخيلي بقى من أولى بالحياة السعيدة الصحية دي اللي معندوش رب ولا احنا اللي ربنا هو ربنا

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress/
رابط حلقة السيرة
https://youtu.be/2lAt9hw9C50