رقم حجز الاستشارات وكورس كوني ملكة : ٠٠٢٠١١٥٠٥٨٦٠٥٢
المتعاطف الهيوكا
ايه هو المتعاطف الهيوكا واحنا المتكلمين عن النرجسية مهتمين ليه بيه ؟
أولا الاهتمام بالهيوكا لانه فعلا يقدر يقهر النرجسي ويقدر يعالجه اذا كان ممكن يتعالج .
الهيوكا او المهرج المقدس عند الهنود الحمر اللي هم الشعب الأمريكي الأصلي ،
المهم خلينا نشوف ايه موضوع الهيوكا دة
احنا اتكلمنا أصلا عن الشخصية المتعاطفة وقلنا في اكتر من عشر حلقات صفات الشخصية المتعاطفة وقلنا ازاي المتعاطفة تنمي الهبات اللي ربنا اداها لها وتبقى متعاطف قوي اللي بيقولوا عليه السوبر امباث وانا بشوف ان الهيوكا هو المتعاطف القوي واللي بيشتغل دايما على تقوية حدثه
طيب ايه صفات المتعاطف الهيوكا دة ؟
١- هو شخص متعاطف جدا عنده طاقة حب لو اتوزعت على العالم تكفيه ، عنده حب مهول لكل الوجود البشر والحيوانات وحتى الجمادات يحبها وتحبه ، الهيوكا شخص صافي جدا ومش بيعرف ولا يقدر يكره ،هو ممكن ينفر لكن مايكرهش ، ينفر يعني يرفض التواجد مع الشخص الكريه لكن مايعرفش يكرهه
٢- الهيوكا شخص حاد الذكاء ، مش كدة وبس كمان عنده حكمة وثبات انفعالي مهول ،يعني مش ذكي ومتهور او ذكي ومندفع او ذكي ويجازف فيخسر لا الهيوكا ذكي وعنده بصيرة عجيبة وبيشوف حلول المشاكل مش بيفكر فيها ويجهد في التفكير فيها اد ماهو بيرزقها من عند الله بيلهمه ربنا بحلول المشاكل بشكل سلس وعجيب ،الأفكار بتنط في دماغه فجأة لما بيكون حد بيتكلم في مشكلة او أي حاجة ودة بيخليه يقاطع اللي ادامه بطريقة عشوائية لانه بيحس ان لقى له ضالته ولأنه فعلا بيكون عنده معلومة قيمة فالناس غالبا بتعذره ع المقاطعة اللي بيعملها لحديثهم
٣- الهيوكا شخص مرح مش مهرج زي ما الهنود الحمر سموه هو حكيم والحكيم عمره مايكون مهرج ،هو مرح وضحوك ودائم الابتسام وبيحول المحن لمنح دايما يبص على الجانب الإيجابي للموقف مهما كان الموقف عصيب . عنده قدرة على ابهاج الناس هو نفسه بيكون مش عارف انه عنده القدرة دي لكن بيسمع الناس تقول له انه بيمنحهم طاقة إيجابية وبيبهجهم بمجرد انه يتجاذب معاهم اطراف الحديث ودة لان ربنا مديه قلب صافي خالي من الغل والحقد والبغض
٤- الهيوكا شخص مش بينكسر لانه مرن والمرن ماينكسرش لكن بيحزن وبيخسر من صحته كتير لكن في النهاية بتلاقيه يقف تاني وبقوة ،بيتعرض لصدمات مهولة عصيبة ويضعف وتضعف قوته كهيوكا واحيانا يضيع حدسه منه لكن لانه مرن بيرجع يسترد نفسه تاني .وبالرغم من كل المرونة دي والصبر والحلم اللي عنده دة لكن فيه نقطة فظيعة ،الهيوكا لو ادار وجهه عنك واخد طريقه مش بيرجع نهائيا ودة حنتكلم فيه باستفاضة لما نتكلم عن الهيوكا والنرجسي
٥- الهيوكا والطبيعة قصة التناغم والعشق مابين الهيوكا والطبيعة الهيوكا عنده ارتباط بالبحار وبعدين الخضرة وبعدين الجبال هو بيميل اكتر للمناطق الساحلية لان بينه وبين البحر علاقة استشفائية عجيبة ولاحظو ان ظهور الهيوكا كان في وسط الطبيعة الامريكية قبل الحضارة ماتشوهها ،فهو بيعشق الطبيعة وبيستخدمها في تقوية حدسه وفي علاج الصدمات اللي بيتلاقها من البشر سواء اثناء مابيعالجهم او لو حصل واتعرض لازمات بسببهم
٦- الهيوكا بيحتاج للاختلاء بنفسه عشان يعيد الشحن زي أي شخصية متعاطفة زي ماقلنا قبل كدة عن المتعاطفة ، لكن هو مايقدرش يعيش لوحده وقت طويل لان هو عنده شيء بيدفعه للخارج لانه دايما فيه حد محتاج مساعدته ، هو أصلا فيه بعض الاقاويل عن الشخصيات المتعاطفة انهم ربنا خلقهم عشان يعملوا اتزان للعالم اللي اصبح الشر جزء كبير منه فالشخصيات المتعاطفة دي هي رمانة الميزان فما بالكم بالقوي منهم اللي هو الهيوكا ،فهو دائما متاح للناس وفي نفس الوقت بيحتاج يختلي بنفسه
٧- الهيوكا عنده قدرة مهولة على مساعدة الاخرين ،هو بيسمع للناس وبيفهمهم من قبل مايتكلموا العجيب انه عنده قدرة فائقة على قراءة أفكارهم ومشاعرهم ويقدر يعبر عن مشاعرهم اللي هم مش عارفين يعبروا عنها ،بعض الناس بتكون عندها مشاعر مكبوتة ومش فاهماها والهيوكا بيقدر يفهمها ويشرحها لهم ، عشان كدة عنده قدرة علاجية عجيبة ، ومن هنا هو بيقدر يساعد الاخر على انه يفهم نفسه ويتواصل معاها واعتقد ان دة المقصود بانه مراية عاطفية لانه بيقدر يشوف اللي جواك وبعدين يشرحهولك ويفهمهولك فانت تشوف نفسك في كلامه فتكتشف نفسك وتقرب منها اكتر . ودة بيخلي كل اللي بيقرب منه ويعرفه بيثق فيه وفي رأيه ولأنه صادق ومستقيم ومخلص فهو فعلا اهل للثقة
٨- الهيوكا عشان حدسه قوي يعني بيحس باللي حواليه وباللي حيحصل وبيقرا الأفكار والمشاعر فهو بيعرف اذا اللي ادامه بيكذب او لا وهو أصلا عنده فراسة عالية جدا يعني بيعرف اذا الشخص اللي ادامه طيب ولا لأ ومخادع ولا لا فبالتالي بيعرف اذا بيكذب ولا صادق . ولما بيعرف الأشخاص المتلونين مش بيقدر يتواجد معاهم في مكان واحد فترات طويلة
٩- الهيوكا مش دايما مع القطيع يعني مش دايما موافق على الأفكار المجتمعية اللي الكل بينادي بيها بس هي أصلا مش منطقية ومش صحيحة هو دايما له قناعاته وبيتمسك بيها ولو كان عكس كل الناس
١٠- دايما حاسس انه اصغر من عمره لكن مش متصابي هو حاسس ان قلبه قوي وان نفسه قوية وانالعجز لاينال من القلب والنفس العجز ينال من الجسد وبتلاقيه عنده قدرة على اللعب زي الأطفال ومعاهم وبيستمتع جدا بدة واحيانا يعمل إعادة شحن باللعب مع الأطفال بدل الاختلاء بنفسه