- زوجتي نرجسية اتعامل معاها ازاي ؟
صفات الزوجة النرجسية هي هي صفات الزوج النرجسي لكن هي بتزيد خطورة عن الرجل انها فاتنة وبتقدر تتحكم في زوجها عن طريق العلاقة الحميمة لان الرجل رغبته في العلاقة اكبر من رغبة المرأة فتأثير العلاقة عليه من الزوجة النرجسية بيكون تأثير خبيث وابشع من تأثيرها على الزوجة اللي زوجها نرجسي ،وفي الحالة دي الإدمان بيكون مضاعف وعشان كدة نستغرب هو ازاي راجل ومش عارف يمشي زوجته ماهو في ايده كل شيء ،الإدمان أسوأ شيء ممكن يحصل للبني ادم .
لما بيكون الزوج هو اللي نرجسي بنقول ان الزوجة مفروض انها تحت طوعه وفي مسئوليته وهو مفروض يصرف عليها وعلى أولادها فبالعربي كدة بنقول رقبتها في ايده وبنقول كمان انها بتكون متعلقة بيه تعلق مرضي ولازم تفك التعلق الأول عشان تقدر تفوق وتقرر تسيبه او تكمل بس بشخصية قوية وتحط لنفسها حدود وتعتمد على نفسها ماديا عشان ماتبقاش تحت رحمته
طيب لما الزوجة تكون هي اللي نرجسية وطبعا مش هي اللي بتصرف لا ع الزوج ولا ع الأولاد يعني هي مش ماسكة زوجها من رقبته زي مالزوج النرجسي ماسك زوجته من رقبتها وعمال يذل فيها ، طيب امال ايه مشكلة الرجل اللي زوجته نرجسية ؟ مشكلته التعلق المرضي ولوم النفس والشعور بالذنب ودة غالبا بيكون شخصية اعتمادية (اللي هي بتعتمد على الاخرين في تقدير نفسها والاحساس بقيمة نفسها) فبيكون جعان حب وعطف وتقدير عن طريق الحب وبالتالي بيتعلق بيها تعلق مرضي وزي ماقلنا في اول الحلقة ادمانه لها وللعلاقة الحميمة ، والمفروض ان دة السبب الوحيد اللي بيخليه مايرميهاش ويشوف حياته مع زوجة سوية ،وبعض الأزواج بيخاف من الطلاق عشان مايسيبش لها أولاده تدمرهم ، واحيانا مايقدرش يطلق عشان حقوقها المادية وعشان حتاخد الشقة وهو حيروح فين ومش حيقدر يتجوز تاني برضه عشان الإمكانيات المادية . في كل الأحوال الزوج دة لازم يفك التعلق المرضي ويتخلص من ادمان زوجته بس مفيش أي كلام ممكن يتقال له او نصيحة غير كدة شوف فيديوهات التشافي او تواصل مع طبيب نفسي فاهم النرجسية واضطراب مابعد الصدمة واتعالج من الإدمان وساعتها انت حتعرف تتعامل معاها وحتقدر تسيطر عليها وحتكسر كبرها وجبروتها وحتقدر تخليها تعيش معاك بما يرضي الله وحتقدر تبعد تأثيرها السيء عن اولادك واذا انت محتاج تتلاعب تقدر تشوف فيديوهات التلاعب والتجاهل الذكي وان كنت اظن ان الرجل مش محتاج لكل دة لان هو اللي في ايده زمام الأمور ومفيش حاجة تضطره للتلاعب ،هو صاحب القرار وهو القوام وهو القائد في البيت طالما يخاف الله ويتقيه ويعطي كل ذي حق حقه حيكون بالقوة والشكيمة اللي تخليه مش محتاج انه يتلاعب ،الزوجة اللي زوجها نرجسي مضطرة للتلاعب لانها ضعيفة وغالبا أهلها ومجتمعها الذكوري للأسف ضدها ومحدش بيفهم وضعها وبالتالي مضطرة للتلاعب اما الرجل فلا حاجة له بالكلام دة كله
الفكرة بس انه لازم يتعالج من اضطراب مابعد الصدمة الناتج مع الحياة مع نرجسية وكمان احتمال كبير يكون احد ابويه نرجسي وكمان لازم يتعالج من الشخصية الاعتمادية اذا كان اعتمادي وطبعا يتعالج من الإدمان وكل دة بياخد شهور ومع الإرادة القوية مش بيطول في الوقت