لو قررتي تسيبيه بيمسك فيكي ليه
ايه اللي حيحصل لو قررتي تسيبي النرجسي وايه اللي حيعمله وحيكون ايه رد فعله ؟ وليه بيكون دة رد فعله؟
النرجسي مش عاطفي ومش بيفرق معاه فراق حد واكيد معظمكم شافه لما مات له حد قريب جدا اب او ام او اخ بيكون ازاي الاغلبية العظمى بتقول انه مش بيحزن ولا بيتأثر ، فلو انتي تركتيه تأكدي انه لو اتشقلب ادامك عشان سيبتيه وهوفر وعياط والكلام دة ماتصدقيهوش هو مش عشان حبا فيكي ، هو بيخاف يفقد حاجة مهمة عنده ولها فايدة ، ولو ملهاش فايدة حيبقى عايز ينتقم منك عشان سيبتيه فحيموت نفسه عشان يرجعك عشان ينتقم منك المهم انه حيزعل اه لما تسيبيه لكن على نفسه مش عليكي ، طيب ايه رد فعله بقى طبعا غضب نرجسي وسخرية . شوفي هو النرجسي بيخاف من الهجر ودي نقطة ضعف قوية جدا عنده ، حتى السفر بيعتبره هجر ولو كان هو اللي مسافر مش انتي ، عشان كدة تلاحظي انه قبل السفر بيكون في حالة شد عصبي وخناقات قبل السفر ، حتى لما يرجع بيكون غضبان ولو انتي اللي مسافرة ورجعتي نفس الكلام غضب قبل السفر وغضب بعد الرجوع من باب الانتقام انك بعدتي مهما كان ايه سبب البعد وكل دة بسبب تجربة الهجر العميقة بداخل النرجسي اللي حصلت له من احد ابويه ، طبعا الهجر في الطفولة مش شرط هجر جسدي لكن الاهمال والتخلي وعدم الرضا وجفاف المشاعر كل دة بالنسبة للطفل هجر طبعا ، وفي نفس الوقت النرجسي مش قادر يفهم ولا عايز يستوعب ان الشريك انسان مستقل مش جزء منه ، حتى كتير حالات تقول لما قعد في البيت لازق فيها زي ظلها
كمان هو عنده حساسية الرفض اي نوع من انواع الرفض ولو عزومة غدا بتؤلمه وبيعتبرها اهانة ، في نفس الوقت هو مش بيحب يبان ضعيف عشان كدة لو حصل انفصال هو مش بيبين ابدا انه اتأثر وخسر لكن حيظهر لك غضبه لانك حركتي مشاعر الضعف عنده والخوف من الهجر
طيب لما هو بيخاف من الهجر طيب ليه كتير بنلاقيه يهرب او يرمي ضحيته وممكن بعدها يرجع يعمل هوفرينج ويحاول يرجعها ؟
هو اصلا خايف احسن هي تهجره فبيسبق هو ويحاول يهجر ودة من باب انه يسيطر على خوفه اللي هو وقوع البلا ولا انتظاره ، وبعدين يتراجع لو معندوش بديل او مش عايز يخرج من منطقة الراحة فيرجع يعمل هوفرينج ويحاول يرجعها ، طيب هو ليه بيخاف من الهجر لما هو مش فارق معاه ولا مهتم بيكي ولا عنده مشاعر ؟ الهجر بالنسبة له فقد للقبول و الوقود والسيطرة وفي نفس الوقت الهجر بينشط الاحساس بالعار والخجل من انه تم رفضه في الطفولة وبيعتبر تكرار لتجربة اليمة علي مستوى اللاواعي
معلومة قالتها د. رارماني في الفيديو دة انك لما بتحاولي تكوني لطيفة معاه لما يكون مكتئب او غضبان وتحاولي تهديه بيكون رد فعله عكسي وبيهبشك ويتعفرت بزيادة ودة فعلا حالات كتير قالته ، راماني قالت انك لما بتعملي كدة بتكوني بتعملي سبوت على ضعفه وهشاشته . كمان قالت حاجة لطيفة جدا وانا جربتها فعلا مع حالات كتير ، بتقول ان النرجسي لو عرف انك خايفة من الطلاق حيفضل كل شوية يهددك بيه ويضغط عليكي بيه لما يعوز حاجة انتي مش عايزة تديها له ، فهي بتقول جربي تقولي له تمام طلق حيتراجع ويقولك خلينا نقعد ونحاول نحل ، وطبعا دة في حالة معندوش بديل او كان نرجسي خفي مبيطلقش او كان مركزه الاجتماعي ميسمحلوش انه يخرب الصورة