هل النرجسي الخفي يقدر يقنعك ان العيب فيكي؟ تكتيك تركيز الضوء
النرجسي في بداية علاقته بيكي بيعمل معاكي تكتيك خطير جدا ، بيعمل ايه؟
١- اول حاجة بيحطك تحت نظره وكأنه ماسك كشاف نور وموجهه في وشك فهو يشوفك كويس جدا وانتي ماتبقيش شايفاه ، بتلاقيه طول الوقت باصص عليكي وبيراقب تصرفاتك وحركاتك ويعرف عيوبك العادية اللي موجودة عند كل الناس ويبدأ في الحوارات معاكي يركز كل مرة على عيب من العيوب دي وفي نفس الوقت مستحيل يذكر ميزة فيكي ولو حس ان حد قال فيكي ميزة لازم يطلعه غبي ومش فاهم حاجة او عايز منك حاجة مصلحة يعني او انه بيجاملك ، المهم ان كل دة غالبا بيكون بدون خناق واحيانا بطريق الهزار وطبعا ممكن في الخناقات بيقول كل اللي نفسه فيه لكن في البداية مش بيقول الكلام دة في الخناق دايما في الأول يقوله في الهدوء عشان يكون مقنع لكي يعني من باب النصيحة فانتي تقتنعي انه انتي فعلا فيكي العيب دة وهو بينصحك عشان بيحبك ، ومع الوقت انتي كمان بتركزي على عيوبك واخطائك ،المشكلة بقى انه مش بيكتفي بكدة لا دة كمان بيبدأ يركز على مميزاته بشكل مبالغ فيه طبعا ويبين لك بقى هو اد ايه عظيم وبيرسم في مخك صورة خياليه له ولمثاليته ويلخبط لك مخك ولما يبدأ يسيء الادب بتكوني انتي اقتنعتي انك كلك عيوب وان انتي عندك مشاكل وان هو عنده حق انه يتعصب وانه يغلط لان انتي فعلا عندك مشاكل ،
٢- تاني حاجة بيعملها النرجسي انه لما تتكلمي في أي موضوع او تتعاتبي معاه او تعملي أي تصرف هو بيفسره بمنتهى السلبية واللامنطقية يعني مثلا قلتلكم زمان عن حالة بتقول للنرجسي فلان بيقول عليك انت اللي في اخواتك يعني انتي احسن حد في اخواتك فهو فسر الكلام ايه يعني انا اخواتي وحشين يعني هو كان شاف منهم ايه يعني هو أصلا انتي ازاي تسمحي له يقول كدة وهو أصلا الراجل كان قاصد يمدحه وهي رايحة تقول له كدة عشان تقرب بينه وبين الراجل دة وهو أصلا مش عايز يقرب منه وعايز يطرده برة حياتهم أصلا فلجأ لتفسير الكلام على انه ذم واهانة وعمل غضب نرجسي وبعد اكتر عن الراجل دة وممكن يكون ابوها اخوها المهم ان هو رد فعله غير منطقي وراح للتفسير السلبي والمهم والسيء في الموضوع انه بيتمسك بالتفسير السلبي جدا بمنتهى القوة والثقة اللي تخلي الضحية تشك في المنطق نفسه وتشك في القواعد والبديهيات وتبدأ تكره الاخر اللي زعله وبتوصل انها بتكره نفسها وتصرفاتها لانها بتقتنع انها فعلا بتغلط وانها مش بتعرف تعبر عن اللي جواها صح لانها كل ماتعبر يطلعها بتقصد حاجة وحشة وهي أصلا بتقصد خير ، والمشكلة انه مش بيقبل أصلا وجود احتمال لتفسير تاني لكلامها ويقول لها انتي مش بتفهمي انتي غبية لو سألتي أي حد حيقول لك انك قصدك كذا ولو قالت له تعالى نحكم حد يعمل غضب نرجسي ويقول لها انا مابدخلش حد وانا مبروحش لحد وفي النهاية لازم يطلعها اتصرفت غلط بناء على التفسير المضلل اللي هو اتمسك بيه وهي فعلا نتيجة تمسكه بتشك في قدراتها العقلية فعلا وخصوصا النرجسي الخفي كارثة في الحكاية دي ، في النهاية بتلاقي نفسك السبب في كل حاجة وحشة بتحصل وهو السبب في كل حاجة حلوة بتحصل وانتي استسلمتي لدة وخلاص اقتنعتي انك صغيرة اوي وضئيلة اوي وبقيتي عاجزة عن التفكير في ابسط أمور حياتك ، ولما بتفوقي على خيانة او مصيبة عملها فيكي بتبدأي تقولي هو انا السبب ولا هو اللي وحش ولما تبعدي ويرجع يحاول يرجعك يتك على نفس أسلوب اللخبطة بس بالمقلوب يبدأ يتصرف تصرفات كلها بتقول انه انسان شهم وجدع ومش ندل وقبل يطلق بسهولة واداكي كل حاجتك وبيراعي أولاده وهي أصلا طلقة رجعية وهو عامل فيها الفارس النبيل عشان بيخطط يرجعكك ومش حيقدر يرجعك الا اذا لخبطك وحسسك ان العيب فيكي وانه راجل زي الفل اهه وبان ساعة الاختلاف واداكي حقوقك يبقى اكيد العيب فيكي وتنسي انه كان بيخوض في عرضك وضاربك في اخر لقاء بينكم وتنسي انه خانك وراح مش مع واحدة متجوزة مثلا ، طيب كل دة اسمه ايه اسمه الإحساس بالذنب ولوم النفس ودة عرض من اعراض الحياة مع النرجسي ، وايه الحل طيب؟
الحل في حلقات التشافي والثقة بالنفس ،اشتغلي على نفسك بما يرضي الله وماتستسلميش ابدا ولازم تفهمي انك انتي اللي صح وان العيب مش فيكي والعيب الوحيد اللي فيكي انك طيبة زيادة عن اللزوم وسلمتي عقلك وقلبك لحليف الشيطان