هل ينفع تعاتبي النرجسي ؟ ولو عاتبتيه حتكون ايه النتيجة ؟
في حاجه مش قادره افهمها ياريت تساعدوني هو اخر مره لما مد أيده عليا انا غضبت جدا وقاعدت أعاتب فيه والومه بشكل فظيع كان مش بيرد عليا وعمل صمت عقابي تلات اسابيع ورجع بردو لومت عليه بشكل صعب قعد يقولي انتي نكديه ورجع تاني للصمت هو العتاب بيعصبه اوي انا غلطانه اني يعاتب مش عارفه ايه الصح
عشان اجاوبك لازم الأول أقول لك يعني ايه كلمة عتاب دي والمفروض ان احنا في الطبيعي بنعاتب ليه ومين؟
العتاب أن العتاب هو الخطاب على تضييع حقوق المودة والصداقة في الاخلال بالزيارة وترك المعونة
يعني ايه يعني اني أقول لك انتي قصرتي في حق المودة والحب اللي بيننا والصداقة بانك اخليتي او قللتي او امتنعتي عن زيارتي او معونتي ، شايفين المعني عامل ازاي ،طيب المعنى دة نتوجه بيه لمين ؟ لحد فيه بينا وبينه مودة وحب وصداقة يعني حد بيعرف يحب وعنده قلب وبيحس وعنده تعاطف ، طيب هل الكلام دة منطبق ع النرجسي؟
هل ينفع نتوجه بالكلام دة للنرجسي؟ الكلام دة لما يكون الزوج سوي قطعا دة من أسس العلاقات السوية ، لكن مع النرجسي لما تعاتبيه كأنك بتقدمي له نقطة ضعف على طبق من فضة ، وبتديه وقود نرجسي ملوش حدود ،لانه بيتفرج عليكي وانتي بتتعاملي بحب وضعف ومحايلة وبيعرف يدخل لك بقى في حتة انتي نكدية وقلبك اسود ، من ضمن الحالات اللي جربت العتاب مع النرجسي وطبعا قبل ماتعرف انه نرجسي كانت متعاطفة ومتعودة انها بتتعامل بمنتهى الصفاء والتفاني طبعا ولما كان النرجسي يعمل مصيبة ماتعرفش تصفا له غير لما تعاتبه وتتكلم معاه ويصالحها وطبعا النرجسي مستحيل يعترف بغلطه خصوصا لو غلط مفروض يتحاسب عليه ،يعني ايه يعني مثلا النرجسي الخفي ممكن يقول لك معلش كنت متعصب او يصالحك من غير مايبرر بس مصالحته تدل على انه عارف انه غلط في الكلام مثلا يعني في الحاجات البسيطة اللي هي اتعصبت وكلنا بنتعصب ،انما لما يخون مستحيل يعترف انه خان انما في الحاجات الهايفة بيصالح عشان له مصلحة عايز ياخدها وبدون مايتمسك عليه غلط يستلزم عقاب او اذلال المهم هي اكتشفت له خيانات وكل مرة كانت بتواجهه كان طبعا يعمل غضب نرجسي ويخوفها ويرعبها عشان تقفل الموضوع وبعدين يصالحها ببرود صلح ملوش أي لازمة ولا معنى وهي من ضعفها وقلة حيلتها وادمانها له ورابطة الصدمة كانت بترجع وتتعامل ومع الوقت بتنسى الخيانة وقلة الأصل وبعدين تتكرر الحكاية تاني وتالت وهكذا لحد مامرضت وصحتها اتدمرت وبدأت تحس انه بيقضي عليها ووقفت له وطلبت الطلاق وبان انها استبيعت من كتر الضغوط عليها وفي اللحظة دي هو بدأ يضعف ويتراجع ويحاول طبعا الهوفرينج معاها وهي فكرت انه انه اتعدل والدنيا حتكون تمام وبدأت تعاتبه في كل خياناته اللي ملفاتها متقفلتش في ذاكرتها ومازالت مش قادرة تتعايش معاه بسببها وفي كل مرة تحاول تعاتبه يقلب عليها الترابيزة وكان في الاخر يقول لها انتي قلبك اسود ،انتي حتفضلي تعاقبيني بالكلام القديم ، اصل فيه ناس كدة بتحب تتلذذ بالنكد والكلام اللي بينكد ، المهم انه مازال مش عايز يعتذر ولا يعترف بغلطه ولا عايز يصالحها بما يرضي الله ويعوضها عن اخطاؤه عشان الملف يتقفل وهي تنسى اللي عمله وكمان بيطلعها غلطانة عشان بتذكر حاجات بقالها سنين ،ودايما يقول لها كل ماتحاول تعاتبه انتي مش لاقية حاجة تنكدي بيها علينا ،
في النهاية هي عرفت انه نرجسي وانه مضطرب وان العتاب ملوش مكان في العلاقة دي وان مش العتاب اللي حيداويها ولا يداوي روحها وبدأت تشتغل معايا التشافي لحد ما الحمد لله حيدت مشاعرها تماما ورجعت لنفسها واستردت روحها ونجحت في شغلها وهو بقى في حياتها تحصيل حاصل وهو اللي بقى يحاول يحصل على رضاها ،عارفين ليه؟ عشان هي مش عايزاه ولا عايزة حبه ولا رضاه ، الأبحاث العلمية بتقول ان النرجسي بيتلذذ بإيلام الضعفاء واذلالهم ويجري ورا الشخصية القوية اللي بتيرفض حبه ويحب يقرب ويتقرب من اللي يرفض حبه ويتدلل عليه تخيلوا ، عشان كدة هو دلوقتي اللي بيحاول يقرب منها وبيتحايل عليها انها تعاتبه مش تتجاهله ،صدقوني مش ناقصك غير تكوني قوية عشان تحكميه وطول مانتي ضعيفة وخايفة حتفضلي مذلولة له
العتاب للنرجسي وقود نرجسي مهول وفرصة للجاسلايتينج والغضب النرجسي يعني العتاب بالنسبة للنرجسي معركة ضامن مكسبها وانتي اللي بتقدميها له