النرجسي بياخد اذنك في كل حاجة وحشة بيعملها معاكي وانتي مش واخدة بالك
ايه الكلام دة ياست انتي انتي بتقولي كلام غريب جدا النهاردة ، ايوة النهاردة فعلا حقول لك كلام عجيب غريب وانتي فكري معايا كدة واحكمي بنفسك . عندي حالة معايا من سنين من أيام ماكانت مخطوبة وكان النرجسي يقول لها ايه؟،طبعا انا نفسي ماكنتش لسة عرفت أي حاجة عن النرجسية بس كنت شغالة في الارشاد الاسري انتي ليه ماروحتيش لماما في عيد الام وجبتي لها هدية ، انتي ليه اما اخدتيش اختي الصغيرة تفسحيها وتجيبي لها حاجات حلوة ولما حاجة ماتعجبوش من ردودها عليه كان يشتمها ويطول لسانه وكنت أقول لها يابنتي ماتكمليش معاه دة من أولها باين بيقل ادبه ،المهم ربنا قدر انها كملت والنهاردة بقالها خمس سنين متزوجاه طبعا وصلنا للضرب والشتيمة بألفاظ أسوأ مما تتخيلوا ، فهم في البداية خالص اخد الاذن منها بانه يشتم لما جرب وهي كملت ، الموضوع مش واقف بقى على اول الجواز او الخطوبة وبس ،لا دا بعد عشر سنين جواز ممكن تلاقي النرجسي بيقول لك مثلا فلان اتجوز على مراته ويتكلم كتير في الموضوع فهو عايز يعرف رد فعلك ورأيك في الموضوع ، او مثلا عرفت ان فلان والعياذ بالله بيروح بيوت مش تمام وزوجته طلبت الطلاق وأهلها يقولوا لها نزوة وسامحي وعيشي وماتخربيش البيت ، او مثلا يقول فلان ضرب زوجته أصلا عصبته وعلت صوتها عليه او ماسمعتش كلامه ويقول سبب هايف أصلا عشان هو عايز يجرب الضرب من غير مايكون فيه سبب لانه عارف انه مش حيعرف يغلطك لدرجة الضرب ، المهم كل دي مواضيع النرجسي بيفتحها معاكي فجأة وبدون مناسبة عشان ياخد منك الاذن انه حيعمل الحاجة دي واللي فعلا بتسيب الأمور عايمة ومش بترد رد قاطع عليه في الكلام دة بيروح ينفذ بالكلمة اللي بيقوله ، زي بالظبط اللي قال لخطيبته انا طول عمري البنات بتجري ورايا ويتمنوا لي الرضا وانا بحاول اقاوم بس للأسف أحيانا بتدبس ، ايه اللي حصل هي كان ايه ردها ؟ منتهي العبط فرحت بيه عشان هو حد عظيم وهي اللي فازت بيه وقالت له انت بتتدبس عشان انت طيب وانا حاخد بالي منك واواوا واللي حصل انه بعد الزواج منين مايروح يلاقي واحدة ويحصل بينه وبينها استلطاف ويروح يقول لزوجته هي اللي حتموت عليا ،مش انتي اديتيه الاذن من الأول ،طيب هي لو بنت واعية ومركزة وفاهمة الدنيا كان مفروض ردت عليه ايه ؟ لا ياحبيبي انت مش بيبي عشان تتدبس ،محدش بيتدبس في علاقة غي بمزاجه وانا مش حقبل الكلام دة ما انا كمان الشباب حيموت علي بس مااتدبستش ومش حتدبس ، وموضوع البنات دة مش مقبول وممكن مانكملش بسببه ولو معايا عشر عيال ، هي كدة عرفته ان دة خط احمر وملوش رجعة . كدة هي مادتوش الاذن وفهمته ان دة فيه خسارة كبيرة فهو عمره ماحيقرب من النقطة دي او لو خان ع الأقل حيخاف انها تعرف وحيموت في جلده لو عرفت لكن غالبا مش بيدخل في علاقات توصل لانه يتفضح عندها ، حالة عندي من اول يوم جواز قالت له حاجتين مفهمش عندي فصال لو خرجت من البيت غضبانة مستحيل حرجعه تاني ولو مديت ايدك عليا مستحيل حعيش معاك يوم واحد وقد كان النقطتين دول فضل مايجيش عندهم لمدة ٣٠ سنة جواز لا سمح لها تخرج غضبانة وكان يستقتل ويصالحها عشان ماتخرجش ولا عمره مد ايده عليها وبعدين على مر السنين دايما يقول لها انا مش بضرب زي بقيت الرجالة ، ترد تقول له عشان انت لو ضربت مرة مش حتلاقي حد تضربه التانية ولا حتلاقي بيت ولا عيال ، وهكذا،ونفس الحالة قالت له انا مش بحب الصوت العالي والزعيق احب لما نزعل نتناقش زي الناس ، وكانت النتيجة ان مفيش مناقشة بتحصل من غير صوت عالي وزعيق وإرهاب ،اكيد الفرق واضح بين الطريقتين بين الحسم والقوة وبين اللين والعدم الحسم فرق كبير بين الموضوعين الاولانيين وبين انا مش بحب الصوت العالي يعني سابت له الاختيار وكمان عرفته نقطة ضعفها ، ادته الاذن
خدي بالك لما يقول لك فلان ضرب زوجته لازم يكون ردك وبعدين اتطلقت ولا لسة. فلان خان زوجته تقولي وبعدين طردته من البيت؟ طيب هي لسة على ذمته ،ايد مستحيل حترجع له ، ولو طول في الكلام وجاب سيرتك وسيرته قولي له لا الا دي ملهاش عندي حل مستحيل اسامح واستمر معاك اذا عملتها ، حتبقى دي النهاية ، كل اللي فات كوم والشيء دة موضوع تاني خالص ، فهميه ان مش حتقبلي دة عشان مايعملوش
خدي بالك مش كل اللي بيتكلم لازم يكون بياخد الاذن ممكن يكون عايز يعرف حدودك ايه لكن خدي حذرك واعتبريها اذن عشان ماتديهولوش