تعملي ايه لما النرجسي ياخد له ألمين برة البيت وبعدين ييجي يديهم لك
لما النرجسي بيحصل معاه أي حاجة محبطة بعيد عنك انتي أصلا كافية خيرك شرك وساكتة وبعيد عنه أصلا ومع ذلك مش بتسلمي من شره واذاه ،
حالات كتير بتقول بييجي من برة قالب عليا ومش طايقني ويفضل يتلكك لحد مايعمل خناقة كبيرة وغضب نرجسي وممكن يمد ايده او يشتم ويسيء الادب والفاظ ، وبعدين لما انهار يهدا ويبدأ يصالحني او يتكلم عادي ولا كأنه عمل أي حاجة وبحس انه كأنه ارتاح لما بهدلني وانبسط
شوفي انا حفهمك هو ايه اللي بيحصل جوة النرجسي ، هو لما بيحصل له أي موقف برة أيا كان الموقف دة من مين سواء في شغله او في الشارع او عند اهله ، ويكون الموقف دة حسسه انه قليل ،زي مثلا ان حد يطلعه غلطان ومايقدرش يهرب من الغلط دة او ان ربنا يسلط عليه مدير يظلمه او اب يفتري عليه فاللي بيحصل هنا للنرجسي انه بيحس بضعف الطفل اللي جواه وبيتقلب عنده على مستوى اللاواعي ذكريات الطفولة المؤلمة والظلم اللي كان بيحصل له والاعتداءات اللي كان بيعتديها ابوه او امه عليه فبيحصل عنده زي ماانتوا عارفين تنشيط للشعور بالعار والخزي والعياذ بالله ، ويفضل الشعور دة يعتمل جواه وهو مش منتبه له ولا واخد باله ان دة شعور جاي من الماضي هو بيكون مجرد إحساس بالظلم والقهر حتى لو هو غلطان لانه بيتعامل في الماضي ومش بيكون عايز يشوف غلطه اللي عمله دلوقتي ،يعني هو بيحتال على نفسه ويعمل مش شايف ، المهم الشعور بالعار والخزي اللي جواه دة بيفضل يكبر ويغلي طول ماهو ما اخدش حقه من اللي عمل فيه الموقف ، فيعمل ايه هو بيكون على وشك الانفجار في وش أي حد اضعف منه فلما بيروح البيت بيختار اضعف حد يقدر عليه ويفرغ فيه الغليان اللي جواه ويسقط عليه فورا كل احساسه بالعار وبالضعف وطبعا الحد دة بيكون انتي فهو بيدخل لك أصلا بيغلي وبيتهيأ لك انه مش طايقك ، هو في الحقيقة مش طايق نفسه مش مش طايقك وعايز يفرغ وبيستعد انه حيفرغ فيكي او ان وجهازه النفسي وشيطانه يهيأ له ان انتي السبب في اللي هو فيه ،ماهو لازم يكون فيه حد غيره يشيل المسئولية وجهازه النفسي بيصدق على تفكيره بحيل دفاعية عشان يحافظ على جسمه وعلى حياته فيعمل ايه يعمل حيلة الاسقاط اللي هي انتي ضعفك هو اللي بيضعفه وانتي مش بتقفي في ظهره ومش بتسانديه وانتي كل العيب فيكي وانتي موتراه عشان كدة غلط في شغله ،المهم ان انتي لازم تكوني السبب فبيوصل انه عايز ياخد منك انتي حقه لان انتي السبب ودة طبعا حيلة دفاعية بيعملها جهازه النفسي عشان يحل له مشكلة انه ماعرفش ياخد حقه من اللي برة .
طيب انتي تعملي ايه عشان تخلصي من الحكاية دي ومن الخناقات اللي بتيجي لك من برة دي وكفاية عليكي الخناقات الخاصة بيكي وبعيالك .
حاجة من اتنين ، لو انتي تعافيتي تماما وبقيتي قوية وبتعرفي تديري معاه حوار وتكوني انتي اللي متحكمة في الحوار بتراقبي تصرفاته ولما يبدأ في الاستفزاز ويصر على رد منك حتقولي له انت باين عليك جدا انك جاي من برة متضايق وحد زعلك ومحتاج تفضفض (يعني تفرغ بس بالذوق) فلو عايز تحكي ايه اللي مزعلك قول ، لكن لو عايز تتخانق فانا مش حتخانق وبس وتستنيه لو أتكلم أتكلم ماتكلمش حيقوم يدور على حد غيرك يفرغ فيه وغالبا الأولاد فلازم تجنبيهم أصلا التواجد ادامه في الوقت دة ،
اما لو انتي مش واصلة للنقطة دي فلما تلاقيه داخل بيدخن كدة تتجاهليه تماما وكأنه مجاش ، تردي على اد الكلمة وتاخدي بالك انه مايستفزكيش بأي حاجة مش منطقية يعني لو حاول يقول أي كلام قولي حضر وطيب ماتديهوش فرصة ينفجر فيكي ولا في اولادك وبرضه لازم تجنبيهم أصلا التواجد ادامه ،عارفة لو حاصرتيه ومعرفش ياخد منك الوقود اللي يهديه حيتصل بأي حد يعرفه ويتخانق معاه ،صدقيني لازم تكوني هادية وقوية ومرة على مرة حتلاقيه بيدور على حد غيرك ياخد منه وقود سلبي ، بس اذا لقيتيه حياخده من حد من اولادك يبقى لازم تتدخلي وتديه انتي الوقود عشان تحمي اولادك ، وخدي بالك لو انتي بقيتي قوية كفاية وفاهماه كويس حتعرفي تهديه وتخليه يخرج غضبه معاكي بس بدون مايهاجمك حتعرفي تخليه يحكي لك اللي حصل ولازم انتي تكوني في صفه حتى لو غلطان لحد مايخلص ويهدى وبعدين تقولي له غلطته فين وتبدأي تفهميه كأنه طفل بتحاولي تربيه ،بس دة لو كان أصلا فيه بينكم أي نوع من أنواع الحوار ،لكن لو السكة مقفولة يبقى تتمسكي بهدوء الاعصاب وماتديهوش فرصة ينفجر فيكي ودة سلوك ممكن يتعدل مع الوقت لو انتي واعية جدا لتصرفاته وواخدة بالك منها وفهمتيه كويس ،شوفي حلقة ازاي تعدلي سلوك النرجسي