هل ينفع تهديد النرجسي بأي شكل من الاشكال يعني تهديد بالسجن او بتوريطه او الإنفصال
2/كيف نستغل النرجسي ونجعله يخضع لطلباتنا
3/عن النرجسي المسافر لفترة طويله فوق السنة،كيف نتعامل معه لما يمنع مصروف ويعمل صمت عقابي او إلقاء وتخلي .بس يتصل كل يوم ليطمئن على ولاده فقط يعني مش مهتم بتحركتنا وتفاصيل اليوم مطلقا.
هل ينفع تهددي النرجسي؟
طبعا هو أصلا التفاهم معاه مش بينفع فيه غير التهديد ، لكن التهديد دة امتى تعمليه وازاي وبايه؟ أولا امتى لما تكوني اده ،يعني تكوني مستبيعة واد أي رد فعل يعمله ، يعني مش حتخافي من الغضب النرجسي ولا حتخافي من تشويه السمعة ولا حيهمك انه يروح يتجوز عليكي وعندك يقين ان رزقك ورزق عيالك في يد الله وحده سبحانه وتعالى
طيب حتهدديه ازاي ؟ لازم يكون معاكي دليل مادي عليه تسجيل او شات او أي حاجة وتأكدي لو هو نرجسي مصيرك توصلي لدليل اذا بيخون واذا مش بيخون سجلي له خناقة من اللي مش بتححصل غير وانتم لوحدكم اللي هو الوضع اللي بترعب ان الناس تعرفه عنه ، وتهدديه امتى؟ لما توصلي لمرحلة انه خلاص التلاعب مش نافع او هو عايز ياخد منك حاجة بالعافية زي دهبك او ورثك وبيضغط عليكي بقلة الادب والشتم والضرب في الحالة دي لازم تهدديه ، او لو عايزة تعملي تسوية طلاق ودية بدون محاكم ، يعني في حالة انه زودها بقى ومفيش حل غير التهديد تهددي ، ليه بقى لانك لو هددتي ومانفذتيش حرقتي ورقتك ، خلاص مهما عملتي بعد كدة هو واثق انك اضعف من انك تنفذي تهديدك فمش بيستجيب ولا التهديد بيجيب أي نتيجة بعد كدة ،فالافضل انك ماتلجأيش للتهديد الا في الظروف اللي انتي خلاص فعلا مش حينفع تكملي لو ماظبطش معاكي وفي نفس الوقت تكوني جاهزة تماما لأي رد فعل منه لازم يكون عندك ثبات انفعالي
خدي بالك التهديد بالانفصال لازم تكوني جادة جدا فيه وابدا ماتهدديش بيه الا اذا ناوياه فعلا لانه بيحسك وبيعرفك وبيكون فاهم فعلا انتي ناوية ولا لا فالاحسن انك ماتهدديش بالانفصال الا اذا كنتي فعلا تقدري تنفصلي
السؤال التاني ازاي نستغل النرجسي ونخليه يخضع لطلباتنا؟
برضه بعد التشافي بتستخدمي معاه أسلوب مكسب مكسب هو دة اللي يخليه يخضع لطلبك لانه حيكسب حاجة في المقابل ، مش شرط يكسب منك انتي شخصيا ممكن يكسب من تحلية الصورة ادام المجتمع لو حيشتري لك لبس انتي بتقولي له الفايدة اللي حتعود عليه لو اشترى ان الصورة حتطلع حلوة وطبعا مش بتقوليها بشكل مباشر بتقولي زي ماقلنا قبل كدة ،فلانة بتقول لي يابختك بجوزك بيجيب لك احسن لبس ، او فلان العظيم أيا كان أي حد هو بيحترمه بيجيب لمراته لبس من المكان الفلاني ، حاجات زي كدة قلناها في فيديو اظن ازاي تروضي النرجسي ، وتقدري تستغلي النرجسي حلو اوي عن طريق الوقود الإيجابي أحيانا بس مش كل النرجسيين الخفي الخفيف والمتوسط والظاهر مستوى اول ، وممكن كمان في مرحلة الهوفرينج ولو مسكتي عليه حاجة تستغليه بس لمجرد ان الحاجة دي في ايدك حيساومك عليها ياخدها ويديكي مقابل وانتي ماتبدأيش المساومة استني لما هو اللي يطلب الحاجة الأول وبعدين لمحي انك عايزة مساومة ،
السؤال الثالث : النرجسي المسافر لما يعمل صمت عقابي ويمنع المصروف ومايتصلش . في حالة انه يستمر على كدة وكمان لما ينزل إجازة يظل على نفس وضعه مفيش بينكم أي كلام ولا علاقة ولا حتى الخدمة عايزها منك او انه بيروح اجازته كلها عند اهله ، يعني دة بيقول لك اطلبي الطلاق عشان انا مش حدفع لك أي حق من حقوقك ،انا شايفة انك تشتغلي وتجهزي نفسك للرحيل او انك تاخدي حق اولادك بالمحكمة وكمان تمنعي مكالماته أصلا نهائيا مع الأولاد ، ليه كل دة ، لانه كدة مش بيقوم بأي واجب زوجي ولا ابوي ، لا موجود معاكي ولا بيصرف عليكي وعلى اولادك ولا بيسأل عنك طيب هو فين واجباته اللي مفروض بيها ياخد حقوقه ؟ كدة ملوش عندك أي حاجة انتي لو رفعتي نفقة او طلاق للضرر حتخلصي في ثانية منه وحتاخدي منه حقوقك كلها ، هو أصلا لو التخلي نهائي وخلاص شاف له مصدر جديد فبيكون كدة بيطفشك بيحاول يدفعك انك تطلبي طلاق خصوصا لو منع المصاريف فانتي ايه اللي مستنياه ؟ لو مستنية فلوسه تبقي بتحلمي ،طالما منعها خلاص شوفي مصلحتك ومصلحة اولادك تاخدي النفقة بالمحكمة وتشتغلي وتتوكلي على اللي خلقك وهو حيرزقك ويرزق اولادك وان شاء الله اللي عمل كدة يبقى يصرفهم على صحته