أسلوب جديد من أساليب التلاعب النرجسي
دايما نقول النرجسي بينشر حالة من التوتر والقلق والطاقة السلبية فجأة وبدون مقدمات واحنا أصلا كويسين ومفيش أي مشاكل وتلاقيه فجأة كدة بيجز على اسنانه ومكشر وبيقول ياشر اشتر وطبعا انتي اول مابيعمل كدة بتعرفي ان الحرب حتقوم ، ياترى بقى النرجسي بيكون فعلا متوتر ومتغاظ ومتعصب والطاقة السلبية دي بتخرج منه من غير قصد ولا هو بيمثل وبيخلق جو من الرعب عشان بيجهز لمسرحية جديدة تنتهي بغضب نرجسي ؟ وليه هو بيعمل المسرحية دي أصلا؟
الأول حقول لك هو بيعمل كل دة عن قصد ولا لا؟ أحيانا واحيانا ، ايه دة بقى؟ شوفي انتي الوحيدة اللي تعرفي ايه الحكاية انتي بس اللي عارفة اذا فيه سبب حقيقي ورا نذير الشؤم اللي جاي دة ولا دي تلكيكة ،يعني مثلا انتي امبارح بالليل رفضتي العلاقة الحميمة فصحي بيقول ياشر اشتر فهنا فيه سبب ،او مثلا انتي بالليل رديتي على امه او رفضتي تتصلي بيها لاي سبب او مردتيش على تليفونها ،المهم انك قلتي لا لاي سبب وفي أي حاجة فطبعا بتكوني متوقعة منظره الصبح ، فهنا بتكوني عارفة انه فيه سبب وهو قاصد يعمل غضب يؤدبك بيه بس هو فعلا غاضب ومتغاظ والعياذ بالله مولع من جواه ، اما بقى لو لاقتيه فجأة وبدون مقدمات صاحي كدة بيجز على سنانه ومكشر وبيقول ياشر اشتر وانتي عارفة ومتأكدة ان مفيش سبب للحالة دي فلازم تفهمي انه بيوترك وبيخوفك وبيجهزك للمعركة ، هو بيعمل لك زي القط مابيعمل في الفار بيخبطه على دماغه كذا خبطة عشان يدروخه فيعرف ينقض عليه ويفترسه ، هو نظراته لكي اللي مليانة غيظ وغضب وتكشيرته وجزه على سنانه بيتترجم في مخك ايه؟ فيه اذى جاي نذير شؤم نذير شؤم وبما انك طبعا بتخافي منه فحتبدأي تتوتري وجسمك يبدأ يرفع الادرينالين لان فيه خطر بالخارج ولانك لازم تدافعي عن نفسك وتبدأي تتحطي في حالة الضغط العصبي وبالتالي انتي بتبقي زي الي ضرسه ملتهب ولو جه عليه نقطة سكر او تلج حيصوت وهو دة اللي بيوصلك له النرجسي خلاص بقيتي مشاعرك مؤججة ومستعدة للحرب وفي نفس الوقت خايفة ومرعوبة ومش عارفة الخبطة حتيجي منين والحالة دي بتخليكي يكون رد فعلك غير محسوب وعشوائي ومفهوش ثبات انفعالي يعني ايه يعني حتصوتي وتهبلي وتبقي شبه المجانين ويشهد عليكي أي حد او يسجل لك ، او انك تشتميه وتغلطي فيه ويمسك عليكي غلطة او انك لو ضعيفة جدا تنهاري وتترعشي وتبكي وياخد منك جرعة وقود فظيعة ويهدى ويرتاح وينبسط وبعدين لما يرتاح من المجهود اللي عمله يبقى ييجي يصالحك لو هو له مصلحة معاكي .
طيب ليه كدة ليه هو بيعمل كدة ؟ ليه من غير سبب ؟
١- ممكن جدا واخد له المين برة البيت امبارح او امه هزأته في التليفون او مثلا زوجته الأولى او التانية او اللي ماشي معاها أيا كان الطرف التالت مين المهم انه يكون واجهه بكارثة هو عاملها وكشفه ادام نفسه وعرى الايجو الهش بتاعه فلازم هو يعالج دة عن طريق أي حد وطبعا مفيش غيرك ،
٢- ممكن جدا تكوني انتي حققتي نجاح في أي حاجة ودة بيقلقه جدا ويخوفه لانه عارف انك لو استقليتي عنه حتسيبيه فبيحاول يكسرك ويحسسك انك مهما نجحتي فانتي فاشلة وضعيفة وفي نفس الوقت ينكد عليكي لان مجرد فرحتك بالنجاح بتنمي ثقتك بنفسك وتطور ذاتك وهو مش عايز دة يحصل
٣- حس ان الأولاد ملمومين حواليكي ومش طايقينه او شافكم قاعدين مع بعض ومبسوطين ودة حاجة بتوجعه جدا فبينتقم لنفسه
٤- لو حس انه بدأ يفقد السيطرة عليكي وانتي بدأتي تتغيري وتقوي فطبعا بيخطط انه يرجعك في القالب بالإرهاب اللي بيعملهولك
٥- عايز منك حاجة وانتي رافضة تديها له زي مرتبك او ورثك او حاجة حرام المهم ان دي وسيلة من وسائل الضغط النرجسي
طيب ايه الحل؟
الحل انك تفهمي انه شخص هش وضعيف ولو زعقتي في وشه حيخاف ويتهز لو حس انك مستبيعة ومش عايزاه حيخاف ، والحل انك تشوفي فيديوهات التشافي وتنفذيه وتتعبي على نفسك التشافي عندنا ع القناة مجموعة فيديوهات وكمان عندنا كورس التشافي بالتفريغ الوجداني وان شاء الله حدمج التشافي برفع الهرمونات مع التفريغ الوجداني ونعمل كورس اكبر ولو الوقت سمح حبدا وان تو وان لايف كوتش للتشافي بالكامل بس كل دة ممكن تحضريه كله وماتستفيديش أي حاجة لو انتي مانفذتيش اللي بقوله لكي ،عشان تتشافي لازم تشتغلي على نفسك مفيش دوا بيخفف ويعالج من النرجسي انتي الدوا بس