مصير النرجسي
خدي بالك انا حتكلم عن النرجسي الخبيث الثالوث الرباعي يعني اللي مفيش فيه أي امل يتصلح وان كان الامل بيد الله وحده
اية النرجسي ثلاث .... هل النرجسي منافق؟
الفيديو دة معمول ليه ؟
عايزة أقول لك مصير النرجسي اذا فضل على ماهو عليه ، انا مش بخص بكلامي زوجك او ابوكي او أي حد تعرفيه شخصيا يعني انا مش بخصص حد بكلامي لان محدش ينفع يقول فلان رايح الجنة ولا رايح النار دة حرام لكن انا بوصف تصرفات بتودي جهنم والشخص اللي بيعملها وميتوبش ويموت عليها يعني يموت وهو مقتنع انه بيتصرف صح اومصر انه يستمر عليها وهو عارف انها غلط حيكون مصيره جهنم ان شاء الله
طيب برضه انتي حتستفيدي ايه لما تعرفي الكلام دة ؟
حتستفيدي انك تعرفي ان حقك مش حيضيع وانا متأكدة انك حتاخدي حقك في الدنيا قبل الاخرة لكن اذا انتي مفهمتيش او معرفتيش ان دة حقك وان ربنا بيخلص لك منه فكدة كدة اذا ماتابش واستسمحك فحتاخدي حقك في اليوم اللي انتي فعلا محتاجة تاخديه فيه ، يعني ايه يعني يوم القيامة مفيش حد فينا ضامن انه مش حيكون محتاج حسنة عشان توزن حسناته ويعدي وساعتها حتلاقي حسنات النرجسي بتتنقل في كفة ميزانك اذا كان عنده حسنات واذا معندوش حتلاقي سيئاتك بتتنقل من ميزانك لميزانه يعني تخيلي ان لو ما اخدتيش حقك منه في الدنيا واتأجل للاخرة حيكون هو منقذك من النار وممكن يكون هو السبب في رفع درجاتك في الجنة ويوصلك لرفقة النبي عليه الصلاة والسلام ، ركزي وفكري بالراحة واوعي تقولي ليه يارب وعدتني بالنرجسي لان طالما هو كتبه عليكي يبقى دة خيرك وصلاحك بس احنا مش بندرك لان عقلنا قاصر ،شوفي بقى اثبات انه رايح جهنم وان اللي عمله فيكي وفي غيرك حيتحاسب عليه واكتر كمان لانه عنده خصلتين ربنا بيحاسب عليهم حساب عسير ، أيه هم ؟ النفاق والكبر
شوفي سيدنا النبي عليه الصلاة والسلام قال ايه :
جاء نصان عن رسول الله صلى الله عليه وسلم في شأن علامات المنافق، أولهما قوله: “آية المنافق ثلاث: إذا حدّث كذب، وإذا وعد أخلف، وإذا اؤتمن خان”. والنص الآخر: “أربع من كن فيه كان منافقا، ومن كانت خصلة منهن فيه كانت فيه خصلة من النفاق حتى يدَعها: من إذا حدّث كذب، وإذا وعد أخلف، وإذا خاصم فجر، وإذا عاهد غدر”.
تعالوا ناخدهم واحدة واحدة
النرجسي كذوب مش محتاجين نتكلم فيه اكتر من كدة
اذا وعد اخلف ، دي أصلا علامة من علامات النرجسي طبعا في أيام الخطوبة بيوعدك كل الوعود الوردية وبعدين يقلب على تحقير
بعدين طول حياتك معاه بيوعد اول ما يبقى معايا فلوس حجيب لك كذا وكذا وحعمل لك كذا وكذا وأول مايبقى معاه فلوس يسيبك ويروح يتجوز
اذا قعد في قاعدة رجالة عشان يصلحوكم بيوعد بالإصلاح والتغيير والالتزام بالمصاريف وبمجرد رجوعك بيبدأ ينتقم منك أصلا عشان اضطرتيه يقعد مع الرجالة اللي هو مش منهم
واذا خاصم فجر
انا مشفتش فجر في الخصام زي فجر النرجسي ،سيبك من الغضب النرجسي والصمت العقابي خالص الأسوأ منهم بكتييير تشويه السمعة والخوض في الاعراض وبعضهم ممكن يسجن زوجته وبعضهم ممكن يكسر لها ايد او رجل واللي بيضرب فيها كأنه بيضرب راجل واللي بيلفق لها قضية دعارة واللي بيسلط عليها صاحبه يعاكسها عشان يثبت عليها تهمة خيانة ،يعني بصراحة فجر ملوش مثيل
اذا اؤتمن خان
قطعا اهلك استأمنوه عليكي وخانهم وحالات بتقول ابويا وصاه عليا قبل مايموت وطبعا خان ، عهد الزواج اللي مفروض قائم على الإخلاص برضه خان ، فلوسك اللي بيقول لك حستلفها واخدها امانة وحردها ودهبك اللي بيبعهولك برضه على سبيل الأمانة ، شقاكي اللي بياخده منك برضه على سبيل الأمانة علي انه حيرجعهولك اول ماتفرج وأول ماتفرج بيرميكي
طيب كدة النرجسي منافق ولا لا دة هو عنده فوق النفاق صفة الكبر ودي أصلا النبي عليه الصلاة والسلام قال فيها ايه
لا يَدْخُلُ الْجَنَّةَ مَنْ كَانَ فِي قَلْبِهِ مِثْقَالُ ذَرَّةٍ مِنْ كِبْرٍ، قَالَ رَجُلٌ: إِنَّ الرَّجُلَ يُحِبُّ أَنْ يَكُونَ ثَوْبُهُ حَسَنًا، وَنَعْلُهُ حَسَنَةً، قَالَ: إِنَّ اللَّهَ جَمِيلٌ يُحِبُّ الْجَمَالَ، الْكِبْرُ بَطَرُ الْحَقِّ، وَغَمْطُ النَّاسِ))
يعني ايه غمط الناس يعني احتقارهم وازدرائهم والتقليل من شأنهم يعني وصف دقيق للنرجسي ، طيب عقابه ايه يايدخل الجنة طول ماهو في قلبه ذرة كبر ذرة مش ميت كيلو كبر ،
طيب كدة كارثتين مدخلينه جهنم مالم يتوب عنهم تفتكري دة مش كفاية يخليكي تهدي كل مايضايقك تبصي له وتقولي معلش بكرة حتفرج عليك يوم القيامة ،بكرة عند الله تجتمع الخصوم ،
صبري نفسك اه لكن مش تستسلمي وتسيبيه يبهدلك وتقعدي في الذل بتاعه ابدا اشتغلي على نفسك وحاربيه ومتستسلميش ابدا لكن كوني عندك يقين انه حيتحاسب