لماذا يطلب الزوج النرجسى العلاقه الحميمه عند مرض الزوجه وخاصه اذا اشتكت له حتى الكرونا مااثرت وطلب منها؟؟
النرجسي بيعمل كدة ليه ؟ أسباب كتيرة
١- النرجسي الجسماني والنخبة العلاقة الحميمة بالنسبة لهم مهمة جدا واحتياج ملح واحنا متفقين ان النرجسي ميعرفش مايلبيش احتياجة مهما كان التمن وطبعا التمن دة بيدفعه الاخر مش هو ، احنا عارفين ان النرجسي ملوش أي سيطرة على نفسه هي اللي بتسوقه فميقدرش يمنع عنها أي احتياج ، وفي نفس الوقت برضه عارفين ان انتي بالنسبة له الة مكنة قهوة يعني لما يعوز يشغلك يشغلك ولو عطلتي حيشغلك بالعافية ،فاكرين زمان التلفزيونات القديمة لما كانت تعلق نخبطها تشتغل اهو انتي بالنسبة له كدة حتعلقي حيخبطك وحتشتغلي ، فمفيش بقى انسان ادامه عشان يمرض او غيره . ودة مع فرض احسن نية للنرجسي
٢- النرجسي بيخاف زي مااتفقنا من أي حاجة ومن كل حاجة ومن ضمن الحاجات اللي بتخوفه انه يفقد أي حاجة بيستخدمها يعني تلاقيه بيخاف على عربيته جدا ويحسس عليها وانتي برضه بيخاف عليكي بس مش اد مابيخاف على عربيته عارفة ليه عشان عارف انك اقوى من عربيته وعشان تصليحك مش حيكلفه فلوس اد ما عربيته حتكلفه ، انتي حتتصلحي بشخطة ولا شتمة ولا ضربة انما عربيته حتكلفه فلوس ، المهم هو بيخاف انك تعطلي ولو مرضتي مش حيعرف يصلحك غير بفلوس زي العربية وبعد الشر عنك يارب هو ممكن بعد الشر تموتي ويفقد مكنة القهوة انما العربية مش حتموت فلما انتي تمرضي هو بيحاول ينكر دة أصلا هو مش عايز مرضك دة يحصل ابدا عشان كدة دايما ينكره ويقول لك انك بتدعي المرض او يهون ويقلل من مرضك دا غير ان مرضك بيحطك في بؤرة الاهتمام بداله ودا كمان مرفوض تماما ، فهو بيحل المشكلة دي ازاي؟ انه ينكر وجودها ويتعامل على انك مش مريضة ابدا وبالتالي مهما كنتي مريضة حياخد منك اللي هو عايزه
٣- دلوقتي لو انتي كل ماتتعبي حتقولي له مش عايزة العلاقة وهو حيسمع كلامك دة معناه انه حيفقد سيطرته عليكي في جانب من جوانب حياتك ، حيفقد السيطرة على جسدك وكمان حيريحك ويديكي حرية انك ترفضي وتقولي لا مش عايزة دلوقتي فهو حيخاف اللا دي تنسحب على حاجات تانية في حياتك وحيخاف يفقد السيطرة بقى واحدة واحدة على بقيت نواحي حياتك معاه وفعليا دة بيحصل اول ماتقوي وتعرفي تقولي لا هو فعلا بيفقد السيطرة عليكي تماما وهو عارف كدة فمستحيل حيسمع كلامك بشكل مباشر او بدون مقابل ، ومستحيل حيديكي فرصة تخرجي من تحت سيطرته
٤- رابع حاجة بقى ان النرجسي عادة بيستخدم العلاقة الحميمة في اذلالك وتحقيرك بكل الطرق ودة مشروح بالتفصيل في حلقة اسمها "ازاي النرجسي بيذلك في العلاقة الحميمة " وفيه كذا حلقة عندنا عن العلاقة الحميمة كلهم مهمين بالنسبة لزوجة النرجسي أيا كان نوعه اللي مشافتهمش تشوفهم ، يعني هو بيستغل العلاقة الحميمة في مرحلة التحقير والتقليل وخصوصا بقى لو اخد العلاقة بالعافية ويشوف القهر اللي بتكوني فيه اثناء علاقة انتي مش عايزاها او حتى تعبانة ومريضة ومش قادرة عليها
٥- النرجسي في اثناء العلاقة بياخد منك وقود نرجسي قوي جدا ومهم جدا بالنسبة له ، يعني اما يكون غدنفر او يكون مش راجل دة بالنسبة له فانتي ردود افعالك وتجاوبك معاه في العلاقة بيعتبر وقود نرجسي من اقوى أنواع الوقود واللي النرجسي ميقدرش يستغني عنه خصوصا الجسماني والنخبة برضه شوفي حلقة "ازاي النرجسي بيتلاعب بيكي في العلاقة الحميمة ، مرحلة التحقير" برضه الكلام دة مشروح فيها بالتفصيل
٦- النرجسي السادي ودة بيتلذذ بتعذيب ضحيته ويستمتع اكتر من استمتاعه بالعلاقة نفسها وفي الحالة دي بيكون اقصى مناه انه يقيم معاكي علاقة وانتي مريضة لان دة مزيد من التعذيب وبالنسبة له مزيد من المتعة