ايه اخبث التكتيكات اللي بيستخدمها النرجسي ضدك ؟
خرق الحدود :
ازاي النرجسي بيخترق حدودك بدون ماتحسي من اول يوم عرفك فيه؟
أولا حاجة بيعملها انه بيحاوطك من كل الاتجاهات ويسألك رحتي فين وجيتي منين وهبل الخطاب اللي كنا بنبقى مش فاهمين ايه الجديد دة اول ماتصحى لازم تعرفه انها صحيت ولا تصحيه وماتنامش الا لما يدخلوا يناموا في نفس الوقت ولوخرجت تقوله ولما ترجع تقول له وفي النهاية اكتشفنا ان دة نوع من أنواع السيطرة المبكرة سواء كان الخطيب نرجسي او لا . المهم ان دي اول خطوة في اختراق حدودك وانتي مخطوبة ، ويليها التقارب الجسدي اللي بيعمله بدون أي وجه حق
طيب بعد الجواز بيكمل اختراق الحدود بحاجات مستحيل تنتبهي انها اختراق حدود بالعكس ممكن تفهميها انها حب ، زي مثلا انتي ليه بتقفلي عليكي الباب وانتي بتغيري هدومك ماهو مفيش حد معانا ، اللي بعدها انتي بتقفلي باب الحمام ليه بالمفتاح متقفليهوش اصلي بخاف تتعبي جوة معرفش افتح خليه مفتوح وشوية شوية تلاقيه يدخل الحمام ادامك والباب مفتوح أصلا مش حتى مواربه لا مفتوح ع الاخر دي حاجات ممكن تتحسب عادية جدا خصوصا في الأول ومفيش أطفال في البيت لكن دي مش طبيعية بالمرة دة اختراق صارخ للخصوصية وماينفعش يحصل ومينفعش تسمحي بيه ابدا وحاجات كتير غير كدة زي انه لو جعتي قبله واكلتي يغضب ويضرب بوز يعني ماتكليش غير معايا يعني تحكم في مواعيد اكلك وطبعا نومك وكل حركاتك ، موضوع الشتيمة والالفاظ قلناها في حلقة (عشر جمل النرجسي بيختبرك بيهم في اول العلاقة وبيختبر حدودك) مش حعيد الجزئية دي تاني
في نفس الوقت بيعمل حاجة قذرة جدا من وراكي اللي هي بيفتش كل حاجة تخصك دولابك وشنطتك ومكتبك وكل حاجة تخصك ، يفتش موبايلك وياخد منك الباسوردات كلها ، وممكن ينزل برنامج يراقب موبايلك او ينزل لك الجي بي اس اللي بيعرفه مكانك ويقول لك بخاف عليكي ، وخدي بالك مهما اكتشف او سمع او عرف عنك من التجسس دة مش بيقول لك عليه ابدا عشان متعرفيش انه بيتجسس الا اذا ناوي يسيبك بس ساعتها بيعرفك انه اكتشف مثلا كلام بينك وبين امك او اختك بتشتكي منه ، او لو انتي اكتشفتي كارثة على موبايله ساعتها حيعرفك انه اكتشف حاجة عنك ويهددك بيها عشان تسكتي عن كارثته .
طبعا اختراق الحدود ملوش نهاية هو بيوصل انه بيتحكم في حركتك وقعدتك والمكان اللي بتقعدي فيه واحيانا يحاصرك لحد ماتقعدي في غرفتك وتقفليها عليكي لو هو مش عايزك تحسي بالحرية في بيتك
في النهاية النرجسي بيستبيحك انتي شخصيا وانتي تقدري توقفي كل دة بس بالتدريج وواحدة واحدة
انتبهي وخدي بالك لو انتي في اول العلاقة مع خطيب او زوج اذا بيتسلل لحدودك بالطريقة دي لازم توقفيه وخدي بالك مش كل مخترقي الحدود نرجسيين بس كل النرجسيين مخترقي الحدود