لما انتي مش عاجبة النرجسي هو ليه بيرجع لك ؟
تعالي نشوف واحدة واحدة هو النرجسي أصلا اختارك ليه ؟ الأول شوفي فيديو لما هو النرجسي كاره للمرأة ومش عايز يتحمل المسئولية طيب بيتجوز ليه ، دة كلام لازم تكوني فاهماه عشان تفهمي هو اختارك انتي تحديدا ليه اللي حقولهولك دلوقتي
هو أصلا بيكون عايز يكمل بيكي الصورة للمجتمع وعايز منك وقود وخدمة وعلاقة حميمة وعايز واحدة تجيب أطفال وتربيهم احسن تربية عشان برضه يكملوا الصورة الحلوة ، شوفي بقى هو بيختار واحدة كاملة متكاملة ، حلوة ومتعلمة او ذكية على حسب تعليمه و فرفوشة وقوية ومثقفة ونشيطة يعني بينقي ع الفرازة زي مابيقولوا تمام ؟ تمام .
انتي كدة فيكي كل المواصفات المطلوبة لاي راجل سواء سوي او غير سوي ، لله الامر ،ربنا لحكمة ما رزقك زوج غير سوي المهم ان انتيب تؤدي كل الوظائف اللي هو عايزها منك من ضمن الوظائف دي انك تكوني مصدر مالي كمان فوق كل اللي قلته يعني لو بتشتغلي وبتصرفي معاه حتكوني لكي أولوية في الاختيار ، هنا كل المواصفات المطلوبة دي احنا الاسوياء بنسميها عجبته ، عجبت العريس ، طيب انتي عجبتيه واتجوزتوا وبعدين بعد سنين صحيتي لقيتي نفسك مش دة اللي اتجوزتيه وفهمتي الحكاية والرواية وطلع نرجسي ،وقررتي انه مش عاجبك وعايزة تسيبيه يعني انتي اللي قررتي وطبعا دة في حد ذاته تجاوز عظيم منك وتغيير في المواصفات ، الكتالوج مكنش مكتوب فيه كدة فالمكنة عطلت طيب يعمل فيها ايه ؟ يرميها ويخسر تعبه فيها ويخسر باقي المواصفات والمصالح ولا يصلحها؟ طبعا حيحاول يصلحها بس بطريقته الغبية ، حيعمل ديسكارد فترة طويلة عشان يربيكي ويحسسك ان هو كمان مش عايزك ،وبعدين لو انتي لسة عندك أي فايدة له حيعمل لك هوفرينج مكثف ويسوق عليكي العالم عشان ترجعي له لكن طبعا حتدفعي التمن لما ترجعي ، ذل وقلة ادب ومعاملة زي الزفت وبخل واستخسار وكل اللي يجي على بالك واللي مايجيش على بالك حيعمله ليه عشان يكمل تصليح المكنة عشان ماتعطلش تاني ابدا ، طيب وبعدين لو حس انك تعبتي وحتقولي له تاني نتطلق ونويتي بشدة المرة دي حيهدي الدنيا وحيبدأ هوفرينج خفيف ويفهم ان كدة خلاص كفاية اتصلحتي ، او لو انهارتي تماما وحس انك ضعفتي جدا جدا برضه ممكن يهدي شوية وبيرجع تاني برضه ، المهم اما لو انتي مفيش له عندك مصلحة وملكيش فايدة او لقى بديل لكي فحيرجعك برضه بس مش عشان يصلحك لا عشان يعطلك تماما ويقضي على البقية الباقية ويمص اخر قطرة في دمك وبعدين يرميكي وهو متطمن انك مش حينفع تشتغلي تاني ابدا لانه واثق انه كرهك في عيشتك وفي الرجالة وفي الجواز وبكدة فانتي مش حتشتغلي تاني ابدا وفي نفس الوقت يبقى هو اللي سابك مش انتي اللي سبتيه
النرجسي مش حيرجعك ويبقي عليكي الا لو فيه منك مصلحة ومش حيرميكي الا لو مفيش منك فايدة او لقى حد تاني له فايدة اكتر منك وحياخد منه برضه اللي هو عايزه ويرميه تاني
حالات كتير قالت انهم كانو بيحوشوا مثلا عشان يشتروا شقة وكانت هي بتدفع ٨٠ في المية من الفلوس لحد ما اشتروا الشقة وللأسف كتبوها باسمه وأول ما وضبوها وسكنوا فيها المعاملة اتغيرت تماما وقلب وحش وفضل يطفش فيها وممكن في بعض الحالات توصل للضرب لانه خلاص قضى مصلحته وخلصت وغالبا دة بيكون نرجسي ميكافيلي مش نرجسي بس ، وحالات قالت انها لما سابت شغلها عمل نفس الكلام لانها كانت شايلة البيت والأولاد باكتر من ثلث المصاريف ، وحالات مثلا أهلها اغنيا ولما حاول ياخد منهم فلوس ويستغلهم ومعرفش بدأ بيقلب وحش وفي الحالات دي النرجسي مش بيشغله أولاد ولا غيره ،غالبا الميكافيلي بيكون نرجسي ظاهر اهتمامه بشكله في المجتمع مش بيكون مهم اد كدة وبيكون مفضوح طبعا