- بجد يادكتورة مهما كان جوزي غلطان مش بقدر أتكلم معاه خالص أي حوار بندم اني اتكلمت معاه
ليه ؟ ليه بتندمي لما بتدخلي في حوار مع النرجسي ؟ لان النرجسي حواراته ومناقشاته مش زينا مش بياخد ويدي يعني مينفعش في الحوار مع النرجسي انك تتكلمي وبعدين هو يرد او هو يتكلم وبعدين انتي تردي ،النرجسي شايف ان الحوار او المناقشة المفروض تمشي ازاي؟ هو يتكلم وهو يرد وهو يرشد وانتي تقولي كلمات محدودة جدا زي حاضر مظبوط كلامك عندك حق انت صح وهكذا هو دة الحوار المثالي بالنسبة للنرجسي وطبعا دة بسبب احساسه بالاستحقاق والعظمة ،المهم انتي فاهمة دة كويس وعيشتيه معاه طيب ليه تدخلي معاه في حوار من اصله ، ابعدي عن الكلام مع النرجسي ومحاولة إقناعه بوجهة نظرك لانه حتي لو اقتنع مش حيعرفك انه اقتنع واحنا قلنا قبل كدة انه بياخد ارائك ووجهات نظرك ويدعي للناس انها بتاعته ،طيب يبقى اسهل حاجة انك تقللي حوارات ومناقشات معاه
عارفة انك حتقولي لي انك أحيانا بتضطري عشان مصلحة البيت والأولاد طيب حقولك تعملي ايه .
١- ماتدخليش ابدا في مناقشة مع النرجسي غير في فترات الهوفرينج واللي حتقول لي مفيش هوفرينج حقول لها فيه بس انتي مش واخدة بالك ازاي؟ لكا بيكون النرجسي بخيل جدا حالته صعب جدا ومسيطر جدا يعني النرجسي البشع اللي مش بيعمل هوفرينج والخبيث والناس دي هي بتعمل هوفرينج فعلا من وجهة نظرهم اللي هو انه يوقف اذاه عنك وعن أولاده او انه يبطل تحقير شوية او انه يلبي طلبات البيت او انه يصلي ويمسك المصحف او انه يسمح لك تخرجي .كل دا هوفرينج بس احنا فاهمين غلط ، المهم في الفترات دي بس تقدري تدخلي مناقشة انتي مضطرة تدخليها
٢- تاني حاجة لازم تكوني مجهزة حاجة تديها للنرجسي في مقابل الحاجة اللي انتي عايزاها منه لان النرجسي مستحيل يوفقك على حاجة بدون مقابل وانتي ادرى واحدة بايه اللي ممكن تقدميه للنرجسي انتي بس اللي تعرفي هو عايز ايه وانتي تقدري تديه ايه ،أحيانا الموضوع بيكون صعب واحيانا بتحسي انك لو ادتيه اللي هو عايزه حيكون انتصر عليكي بس في حالة انك حتديه حاجة قصاد حاجة في الوضع دة بتكونوا انتم الاتنين كسبانين ،نظام مكسب مكسب . للأسف دي الطريقة الوحيدة اللي ممكن تاخدي بيها حاجة من النرجسي سواء فلوس او انك تقنعيه بمصلحة للأولاد زي التمارين او الدروس او مدرسة معينة
٣- النرجسي بيخاف على صورته ادام الناس وبيحب دايما يلمعها وانتي لازم تستغلي النقطة اما بالتلميع او بالتهديد ،يعني ايه يعني اما تقولي له فلان وفلان ودوا أولادهم كذا او عملوا لاولادهم كذا او بيقولوا المدرسة الفلانية ممتازة دي فيها أولاد فلان وفلان من المشاهير ، المدرس الفلاني بيدي لاولاد فلان المدرب الفلاني وهكذا حطية في صفوف المشاهير وهو حيعمل لك اللي انتي عايزاه ولو لابس لك عباية الدين اتكلمي عن أولاد الشيوخ بيودوهم يدرسوا كذا في المكان الفلاني وبيودوهم فروسية ولازم رياضة ، يعني شغلي مخك معاه شوفي ايه اقصى حاجة عايز يوصل لها ومنيه بيها دة التلميع وطبعا التهديد انتي عارفاه وقلنا كتير هدديه ان الناس حتشوفه بخيل او حتعرف انه مش محترم او او أي حاجة مش عاجباكي
اما لو جوزك غلطان فتأكدي انه عمره ماحيعترف ويقول لك انا غلطان الا اذا حس انك حتمشي وتسيبيه واحيانا ميقولش انه غلطان بس ع الأقل بيبطل اذى لفترة ، لما يكون غلطان ماتدخليش في مناقشات وحوارات لانه حيلف بيكي العالم ويرجعك بدون أي فايدة انتي لو مضطرة تواجهيه قولي انت عملت كذا كذا والنتيجة كذا كذا واقفلي الكلام ومهما حاول يلف بيكي ولا يطلعك انتي السبب او انتيب تفتري بدون تعليق نهائيا لان أي مناقشة مش حتطلعي منها غير بانهيار او لو عندك ثبات انفعالي حتطلعي منها مصدعة ، يبقى وقفي أي جدال قولي اللي عندك واسكتي وسيبيه يخبط دماغه في الحيط والشطارة انك ترمي الجملتين وانتي نازلة الشغل او توصلي الأولاد المدرسة او الدرس المهم مشوار مهم ماينفعش يتأجل عشان لما الكلام يطول تعرفي تهربي