ضحية النرجسي والانانية الإيجابية
مصطلح جديد وغريب لكن ضروري جدا لضحية النرجسي
المشكلة الكبيرة اننا كلنا اتربينا على ان عيب وحرام وميصحش نحب نفسنا وان اللي بيحب نفسه يبقى انسان سيء ومحدش حيحبه وان ربنا مش حيحبه وممكن كمان يوديه النار ولما بقى كبرنا وشفنا النرجسي وجينا نقول للناس اللي علمونا منحبش نفسنا ان النرجسي وحش عشان بيحب نفسه نلاقي الكلام والقواعد والمبادئ بتتحور وبيعاد تشكيلها وصياغتها في جمل جديدة ومبادئ مختلفة عن اللي علموها لنا ودة ليه بقى ؟ لان زمان لما كانوا بيعلمونا كانوا بيعلمونا اللي يتوافق مع مصلحتهم هم ، اللي هو انتي ماتحبيش نفسك حبيني انا وبالتالي ماتشوفيش نفسك ولا احتياجاتك انتي لازم تشوفيني انا بس وانا حبقى اشوف احتياجاتك والبيها على حسب امكانياتي (دة لو اللي بيربي دة مش نرجسي وربى بجهل ) او اني مش حشوف احتياجاتك لانك ملكيش أصلا حق انك تحتاجي حاجة غير اللي انا بديها لك
اما دلوقتي لما بتشتكي من النرجسي وتقولي انه بيخالف مبادئكم ياناس بتكوني انتي بتخالفي مصالحهم لتاني مرة انتي حتبوظي الصورة لانك رايحة في سكة طلاق ودة فضيحة وفشل وحاجات كتير بيحسها الابوين وخاصة النرجسيين فبالتالي المباديء حتتغير وتتشكل وحيلخبطوكي ويفهموكي انه مضغوط وان كل الرجالة كدة وانك حساسة وانك أصلا انانية ومش حاسة بيه واواوا حاجات كتير في الاخر تلاقي نفسك شاكة أصلا في نفسك هو انتي اللي انانية ولا هو
مش محتاجة افهمك دلوقتي مين الاناني
وليه انتي محتاجة تكتسبي شوية انانية صغيرين عشان تساوي الناس الاسوياء ،انتي محتاجة تحبي نفسك يعني يكون عندك انانية إيجابية ، لازم تغيري مفاهيمك عن الانانية وعن حب النفس عشان تكوني انسان سوي ، لازم تفهمي ان اللي علموهولك وانتي صغيرة غلط ، حب النفس فطرة ربنا خلقها فينا واللي ميحبش نفس مش حيعرف يحب حد واكبر مثال ادامنا النرجسي
انا عملت قبل كدة فيديوهات في حب النفس بس حقول لك باختصار خطوات تحبي بيها نفسك
١- اعرفي نفسك ، محدش بيحب حد مايعرفوش ،لازم تتعرفي على نفسك عشان تحبيها زي مابنقول لك عشان تحبي سيدنا النبي عليه الصلاة والسلام لازم تقرأي السيرة عشان تعرفيه واكيد اكيد لو عرفتيه حتحبيه عشان هو صفاته تستحق الحب وشخصه يستحق الحب ، انتي كمان لو عرفتي صفاتك الحقيقية اللي دفنوها النرجسيين في حياتك حتقدري تحبي نفسك ، ازاي حتعرفي صفاتك ؟ من الناس القريبين جدا منك واللي بيحبوكي ،اسمعي لهم واسأليهم بيحبوا فيكي ايه وصدقيهم لانك لو كنتي صفاتك وحشة صدقيني مكانش النرجسي اختارك ابدا مانتي عارفة هم بينقوا
٢- حقول لك على سر من اسراري ع الملأ ، لما بشوف فيديوهاتي الحمد لله بتعجبني وبحس بصدق مشاعري فيها ودة زود حبي لنفسي ليه لاني شفت الجانب الطيب الناجح المجتهد واللي مكنتش بشوفه ابدا قبل كدة مهما نجحت ومهما الناس قالوا لي عليه كنت مصدقة لكن مش لامساه لما شفت الفيديوهات لمسته وشفته ، دة مش معناه انك مش حتشوفيه غير لو عملتي فيديو لا حتشوفيه مثلا لو عملتي عمل خيري ،حتشوفيه في عيون طفل فرح بحاجة جبتيها له ، في عيون ام محتاجة وقدرتي تلبي احتياجها او احتياج اطفالها ، في عيون مكروب ربنا استخدمك تفرجي عنه ، كل واحدة فينا حتشوف الجانب الجيد من نفسها في حاجات كتير بس خدي بالك انك متسوقيش فيها وتروحي للغرور ولا الانانية السلبية دة كلام لي قبلكم ربنا يعافينا جميعا يارب ، صدقيني طول مانتي شايفة ربنا في كل حياتك وتصرفاتك عمرك ماحتروحي لجانب الغرور والانانية السلبية ابدا
اقعدي مع نفسك وابحثي جواها وانتي حتشوفي حاجات كتير تستحق الحب لازم تعملي دة كتير لحد ماتعرفي كل صفاتك الجميلة ساعتها حتلاقي نفسك عملتي علاقة جميلة مع نفسك وساعتها بس حتعرفي تدافعي عن نفسك وعن حدودها وحتعرفي تتعايشي مع البشر سواء اسوياء او غير اسوياء لانك أصلا عرفتي نفسك وحبيتيها ومش حتسمحي لحد يؤذيها ولا ييجي عليها