النرجسي عايزك ضعيفة ولا بيكره ضعفك؟ عايزك ماشية على قشر بيض ولا بيجن جنونه لما يلاقيكي ماشية على قشر بيض؟
شوفي الحلقة النهاردة فيها غوص اكتر في أعماق النرجسي والغرض منها انك كل مافهمتيه كل ماقدرتي تعامليه بطريقة تضمن لك حقوقك وحقوق اولادك وفي نفس الوقت تضمن استقرار وهدوء الوضع الى ان يقضي الله امرا كان مفعولا ، يعني بعض الناس بتقول احنا فهمنا النرجسي خلاص عايزين نتكلم عن الحلول ، عايزة أقول لهم ان انا بالرغم من الاف الحالات وعشرات الكتب الا اني لسة بكتشف حاجات جديدة عن النرجسي منها معلومة النهاردة انه بيجن جنونه لما يحس انك ماشية على قشر بيض وكنت فاكرة انه بيعمل دة قاصد عشان يذلك لكن اكتشفت من فيديو لدكتور راماني عكس الاعتقاد دة تماما ،فانا لما بديكي معلومة عن النرجسي ممكن كل واحدة تستخدم المعلومة على حسب نوع وطيف نرجسية جوزها ودة بيكون افضل واعم من اني أقول لك اعملي كذا وكذا ، لازم انتي كمان تفكري وتشغلي مخك وتاخدي اللي يناسبك وتسيبي اللي مايناسبكيش ،
المهم النرجسي عايز المستحيل ،اللي هو ايه؟ اللي هو انك تطيعيه وتسمعي كلامه وتكوني معدومة الرأي والشخصية وفي نفس الوقت عايزك قوية وصلبة ومش ضعيفة ومش بتخافي وفيكي كل الصفات اللي اخدك بيها . ايه اللخبطة دي ؟ حنفصل الكلام دة بالراحة عشان نفهمه
هو عايزك تسمعي كلامه وعايزك تكوني ظله وعايزك امتداد له وزي ماكان بيقول لك توأم روحه بس لا الحقيقة هو مش عايز توأم روح هو عايز اندماج روح يعني يلغيكي او بالاصح يمتصك ويبلعك وتبقوا واحد في صورته هو وانتي صورتك تختفي وماتبقاش موجودة لكن قوتك وتألقك ورونقك وشخصيتك تفضل موجودة بس معاه في صفه في مصلحته يستخدمهم في مصالحه وتحسين صورته وتربيه أولاده وزيادة دخله يعني صفاتك دي هو حيعتبرها بتاعته وانتي تستخدميها لمصلحته بس مش لمصلحتك ولا لنفسك هو عايزك تكوني مش موجودة لكن موجودة من خلاله هو محتاج لذكائك وقدرتك على حل المشاكل ومحتاج نجاحك في الشغل عشان يرسم بيكي صورة حلوة ومحتاج انك يبقى عندك فلوس عشان تزودي دخله ومحتاج قوتك عشان يواجه بيها العالم ويخبي بيها خوفه ويتحامى فيكي ،محتاج شخصيتك القوية عشان يعوض بيها ضعف شخصيته فيصدرك في المشاكل مع الناس وممكن يوهمك انه مش عاجبه لكن هو فعليا عايزك تدافعي عنه وتحميه من اهله وبعض النرجسيين طلبها من زوجته ، جميل كدة طيب كل دة هو عايزه منك لنفسه لكن ازاي تتخيلي انك ممكن تستخدميه ضده ساعتها حيقلب عدوك ، عشان كدة الناس اللي بتعيش بالثلاثين سنة والأربعين سنة وهم مش حاسين انهم مع نرجسي لانهم طول السنين دي بيدوا النرجسي نفسهم حرفيا هي بتدوب وتحتفي وتبقى العصايا السحرية بتاعته او جهاز التنفس بتاعه ميقدرش يعيش من غيرها لان هو بالظبط زي البكتريا المتطفلة او زي الخلايا السرطانية اللي بتعيش على غذاء الخلايا الحية فتقضي عليها وتكبر هي ، وبالتالي الخلية الحية بتضعف وبتموت زي زوجة النرجسي بالظبط بعد ماتضعف نتيجة مص الدم اللي هو عامله وروحها بتموت وتصبح خيال بشر هو في الحالة دي بيشوف ضعفها اللي هو صورته اللي هو جواه وهو كان بيخبيه بيها تفتكري في الحالة دي حيعمل ايه حيحس انه اتعرى فجأة وان القوة اللي كان راكن عليها اختفت فأول حاجة بيعملها ويفكر فيها انه يجري يدور على مصدر جديد للقوة وطبعا الوقود في نفس الوقت ، بالظبط زي الخلية السرطانية لما تنهي عضو من أعضاء الجسم وتقضي عليه بتنتقل للعضو اللي بعده لحد ماتقضي ع الجسم كله ، كدة فهمنا هو عايز ايه
وطبعا لو انتي بدأتي تكوني قوية وهو لاحظ التغير وان قوتك دي حتستخدميها ضده حيعمل نفس الكلام وحيروح يشوف حد غيرك
طيب لما انتي فعلا بتتعافي وبتكوني مضطرة تكملي معاه ازاي حتقدري تكملي وانتي اصبحتي شخص تاني وانفصلتي عنه نفسيا يعني مبقتيش خيال بشر مفضلتيش جواه شاربك وهاضمك ولاغيكي ،بقيتي شخص مستقل وهو مش عايز دة وبيخاف منه عشان كدة انتي لازم تكوني ذكية في وقت تغيرك ووقت قوتك وتبدأي تتلاعبي بيه وتحاولي تخلي احساسه بتغيرك تدريجي مش مفاجيء عشان ميحصلش ردود أفعال عنيفة واحنا اتكلمنا في قائمة التجاهل ازاي تعملي دة
الغرض من الحلقة النهاردة اني افهمك ان النرجسي بيكره ضعفك ومش عايز يشوفه ضعفك دة اللي هو بيكرهه اللي هو ايه ؟ اللي هو احساسك بقلة الحيلة وخوفك ورعبك منه ومشيك على قشر بيض ( انما سمعان الكلام والرضوخ والخنوع له دة هو مش بيشوفه ضعف طبعا هو بيشوفه مثالية منك وطاعة لله وان دة من حقه) عشان كدة بقول لك ان هو عايز المستحيل لانك مستحيل حتسمعي الكلام وتخضعي وترضخي وتتذلي من غير ماتترعبي وتمشي على قشر بيض لان الفطرة اللي ربنا خلقنا عليها مفيهاش خنوع وذل وخضوع مستحيل حد يكون خانع وذليل مع حد وقوي وناجح في بقيت حياته الا اذا كان غير سوي ودة اللي بيكون حاصل أحيانا لبعض النرجسيين
المهم ليه النرجسي بيجن جنونه لما يحس انك عايشة معاه بأسلوب ماشية على قشر بيض ، دكتور راماني بتقول ان النرجسي بيحس انك بتتعاملي معاه على انه شديد الحساسية ودي نقطة ضعف عنده هو بيكرهها وبتنشط شعوره بالعار ، وكمان النرجسي بيشوف اد ايه انتي ضعيفة وهشة ودة بيفكره بضعفه الداخلي وهشاشته وبرضه بينشط شعوره بالعار ودة بيكرهه اكتر فيكي وفي نفسه طبعا اللي مضطراه يعيش مع ضعفك دة
الموضوع معقد ومركب وانا حاولت افهمك اكتر أعماق النرجسي عشان تعرفي حتعملي ايه معاه