الحل ايه مع الزوج اللى ممكن يعاكس واحدة قدامى من زمايله فى الشغل
واما يدخل عليا بهديه فى ايده ويقولى واحدة جابتهالى النهاردة اقوله بعفويه مين يعنى اللى جبتهالك ديه ذوقها حلو عشان ميحسش بالغيرة منى يقولى وانتى مالك انا براحتى اعمل اللى انا عايزه واكلم اللى انا عايز اكلمه انتى مالك بيا
انا محرووووقه جدا من افعاله بحس انى مليش حساب عنده ولا قيمة ودي حاجة مموتانى
النرجسي دايما بيقصد يعمل الحركة دي فيكي لما يكون شايفك واثقة من نفسك او لما تكوني جميلة وحاسة بجمالك دة او هو بيشوف نظرات الاعجاب في عيون الناس سواء رجالة او ستات وممكن تكوني منتقبة أصلا بس بيشوف نظرات الاعجاب بجمالك من اهلك او هم بيعلقوا عليكي او على أي حاجة حلوة فيكي ، المهم انه مش بيعمل كدة عادة الا اذا حاسس انك شايفة نفسك زي مابيقولوا او انك مش شايفاه والاتنين بالنسبة للنرجسي واحد لان معنى انك شايفة نفسك انك مش شايفاه وبالتالي بتكون مهمته انه يخليكي تتهزي ويوصل لك انه مش شايف فيكي أي ميزة أصلا وانك مش مهمة ولا لكي قيمة عنده والنرجسي الغبي بيعمل الحكاية دي عن طريق التثليث زي ما عمل الغبي اللي بيعاكس زميلته ادامك طيب انتي عشان تتخلصي من حاجة بيعملها فيكي النرجسي انك ماتديهوش رد الفعل اللي هو عايزه ، النرجسي كسول جدا زي ما انتي عارفة ومش بيعمل أي حاجة في حياته الا لو حيستفيد منها فلو الاعيبه ماجابتش له فايدة منك حيبطلها ويدور على غيرها ، وطبعا هو بيكون عايز يهز ثقتك في نفسك وفي نفس الوقت ياخد منك وقود سلبي عن طريق رد فعلك عليه ، طيب تعملي ايه ، لما يتبجح ويعاكس زميلته ادامك اقلبي الوموضوع ضحك وقولي له ايه دا ايه دا ادامي طب استنى لما امشي ، واضحكي ،او قولي لها اوعي تصدقيه ياما قال لي اكتر من كدة واديكي شايفة بيعاكسك ادامي وانتيب تضحكي جدا ، لازم يكون عندك ثبات انفعالي جامد عشان تفسدي عليه تخطيطه ( حالة جوزها النرجسي كان معاها في فرح فحب يعمل فيها كدة شاور لها على واحدة حلوة وقال لها اهي دي كانت عاجباني وكنت حخطبها ردت عليه ايه بضحك جدا يابنت ال..... نفدتي ) طبعا عملت له صدمة وبالتالي ماخدش حاجة ومرة على مرة بطل ،هو نوع من التقليل ولازم انتي بنفسك تقضي عليه ، وبعض أنواع النرجسيين لازم يتاخد معاهم موقف في موضوع المعاكسة ادامك دة بس لما تروحي وبعد ماتعملي اللي قلتهولك برضه تفهميه انه لوعملها تاني وانتي معاه حتهزأيه ادام الناس ومش حتسمحي بدة يحصل تاني وهدديه ان الناس حتعرف قذارته وحيتفضح ، ساعتها حيبطل
اما بقى لما يقول لها واحدة جابت له هدية فالمفروض الرد الصحيح ، الله حلوة اوي مبروك وتكملي اللي بتعمليه وكأنه مش موجود ادامك ولا كلمة زيادة ، لانك مجرد ماسألتيه مين اللي جابتها فانتي الموضوع فارق معاكي وبياخد بيه وقود فانتي ماتديهوش دة ومع الوقت حيحس انه بيتهان لانك مش مهتمة وحيبطل ، الغيظ اللي جواكي دة سببه انك مش فاهماه كويس ، انتي لو فهمتي انه قاصد يغيظك ويستفزك وان اللي بتجيب الهدية دي لو مكانك حيتعمل فيها نفس اللي بيتعمل فيكي ، يعني باختصار هي مش عاجباه ولا حاببها ولا اي حاجة هو بيستغلها زي مابيستغلك بالظبط وهي للاسف مغفلة ومش محترمة عشان تجيب هدية لواحد متجوز ، ماعلينا المهم انتي لازم تسمعي التشافي وتنفذيه والثقة بالنفس عشان تعالجي الاحساس دة ، هو مش انتي لوحدك اللي ملكيش حساب ولا قيمة اي حد وكل حد عنده ملوش قيمة