النرجسي ابن الشيطان ،عرفناها طيب انتي بنت النرجسي؟
النرجسي دخل عليكي بالحب والكلام المعسول وخدعك وضحك عليكي وعلى اهلك واتجوزتيه وبدأ يحقر فيكي باي طريقة من اول الضرب لحد الكلام والتثليث والجازلايتينج وانتي كنتي مخدوعة وحبيتيه فلما بدأ يؤذيكي كنتي متلخبطة وبتلتمسي له اعذار ،طيب دلوقتي بعد مافهمتيه وعرفتي انه انسان شرير وعرفتي انك كنتي ضعيفة وانك كنتي فاتحة حدودك ومبيحة نفسك وروحك له ولاهله . بعد مافهمتي كل دة هل في يوم وقفتي كدة مع نفسك وكلمتيها وقلتي لها احنا شاركنا في المهزلة اللي حصلت لنا احنا هنا انتي ونفسك ، النهاردة انتي حسيتي ان لكي يد في اللي حصل لك ولا لسة قاعدة تلومي النرجسي والدنيا وليه يارب واشمعنى انا ؟ بعيدا عن الإحساس بالذنب ولوم النفس اللي بيكون عند الضحية اللي هو انا اللي وحشة وهو عنده حق مايحبنيش او انا اللي نرجسية وهو مظلوم معايا بعيدا عن كل العبط دة مش دة اللي انا اقصده خالص ،اللي بقصده انك كنتي مع الوحش وماكنتيش بتشغلي مخك ، كنتي عايشة مع الشيطان وكنتي لما تشوفي حاجة غلط تغالطي نفسك وتقولي لا مش قصده ، كنتي تبقي عارفة انه بيعصي ربنا بالكبائر وتقولي ضعف والانسان خطاء ومكنتيش تفكري تربطي بين كل الحاجات دي عشان تفهمي انك كنتي عايشة مع شيطان ، انا عارفة ان دة كان غصب عنك وانك كنتي مخدوعة وانك كنتي ضعيفة وانك كنتي خايفة كل دة انا فاهماه لكن اللي انتي لازم تفهميه انك ساعدتي النرجسي انه يبلعك لازم تفهمي انك انتي كمان عندك عيوب وانك مش كاملة وان عيوبك دي هي اللي اخرتك في اكتشاف الكارثة اللي انتي فيها ، وتخيلي ان عيوبك دي هي مميزات الناس الاسوياء !! ايه دة يعني انتي بتقولي عليا مش سوية طب انا حخرج من قناتك ومش حسمع لك تاني ، انا سامعة نفسك وهي بتقول لك كدة ، استني بس ومتجريش خلينا نحل المشكلة ،انتي مش سوية لانك صبرتي على اللي مش مفروض تصبري عليه وانتي مش سوية عشان بتحبي زيادة عن مستوى الاسوياء ،انتي مش سوية عشان ذكائك اعلى من المتوسط ، أي حاجة بتزيد عن المتوسط في علم النفس بيتقال عليها خرجت من السواء يعني كلمة مش سوية دي مش شتيمة انا عن نفسي معترفة اني بخرج عن السواء في حاجتين الحمد لله رب العالمين عادي بس انا عارفة اوظفهم صح فبيكونوا نعم من الله واللي مش بيوظفهم صح بيكونوا نقم من عند نفسه ، هم أي بالنسبة لي الذكاء والتعاطف والحمد لله لما وظفتهم صح بقيت صح انتي كمان لو وظفتي التعاطف صح حتكوني صح لكن انتي وظفتيه غلط فخرجتي كمان عن السوية اكتر مني لانك دخلتي في دايرة اذى النفس لارضاء الاخرين او قبول الأذى لعدم اغضابهم ودة اللي ساعد النرجسي انه يقضي عليكي . طيب انتي يعني جاية تبكتيني بعد ما العمر خلص وبعد ما النرجسي قضى عليا وانتي جاية تكملي عليا؟
لا ياحبيبة قلبي انا جاية افتح لك قلبك وعقلك واوريكي انتي واقفة فين وبتعملي ايه ومفروض تتحركي وتروحي فين وتعملي ايه هناك عشان تصلحي اللي ضاع وتحولي حياتك الرمادية القفرة الخالية من الألوان لحياة ملونة وفيها هواء نقي وروايح النسيم والزهور ، لحياة نظيفة حتى لو النرجسي فيها ، حياة متشوفيش غير نفسك واللي بيحبوكي وبتحبيهم وتخلصي من النرجسي حتى لو قاعد جنبك وبيسمعني معاكي دلوقتي ، جايز تستغربي الكلام وماتصدقيهوش لكن انا اقسم لك بالله ان كتير من الحالات وصلت لكدة بس مش بسهولة ومش في يوم وليلة ومش وهي قاعدة تبكي وتحكي وتشكي لا بمجهود وصبر وجهد ومحاولات وفشل أحيانا ونجاح كتير
لو عرفتي مشكلتك حتقدري تحليها ، مشكلتك جواكي انتي مشكلتك مش في النرجسي مشكلتك في ضعفك وخوفك وقلة حيلتك ورعبك من الناس والنرجسي والمجتمع والوحدة والفلوس ، والله والله والله لو تعبتي نفسك معايا عشان نفسك حتحلي كل المشاكل دي ، اسمعي فيديوهات التشافي والثقة بالنفس ولو كنتي متعاطفة كمان شوفي فيديوهات المتعاطفة وبعدين انضمي لجروبات التشافي بتاعة الزوم بكمل معاكي لحد ماتقفي على رجلك والجروبات الى الان مجانية لكن اذا حسيت فيها بعدم الاتزام حضطر اعملها بمقابل عشان مايدخلهاش غير الجادين أتمنى انكم تساعدوني اني استمر فيها مجانية بانكم تلتزموا وتشتغلوا على نفسكم عشان تساعدوا نفسكم ، ادخلوا جروب ادرس عدوك النرجسي واسألوا عن جروبات الزوم واحجزوا دة اللي عايزة فعلا تخرج من الجحر اللي هي فيه ،وسامحوني ان كنت قسوت عليكم بس أحيانا الجراحة بتكون الحل الوحيد للعلاج