هو النرجسي بيكون مقتنع من جواه بالكلام اللي بيقوله للضحيه لهز ثقتها بنفسها أو تشويهها أمام الآخرين ولا هو بيكون عارف قيمتها بس مش بيقول دا؟
تعالي بقى أقول لك النرجسي بينتقدك في ايه فيكي وليه وانتي حتعرفي إجابة السؤال لوحدك . انتي راقبي ولاحظي وكل واحدة تكتب لنا في التعليقات اكتشفت ايه ، مثلا على حسب ماشفت في الحالات واحدة أمها نرجسية وهي ممشوقة وطويلة وجسمها رشيق وتقريبا زي عارضات الأزياء فكانت أمها دايما تنتقد فيها ايه ؟ جسمها تنقي أي حاجة فيه تكون حاسة ان الابنة حتقتنع انها عيب فيها وتركز عليها فكانت أحيانا تقول لها ياطويلة انتي حنجيب لك عريس طويل كدة منين ، واحيانا كانت تقول لها انتي مليانة من المكان الفلاني بزيادة ، زرعت فيها ان فيه مشكلة في جسمها ولما اتجوزت نرجسي هو كمان لقط من أمها وعرف نقطة الضعف فبدأ يقول لزوجته انتي رفيعة بزيادة وانتي معندكيش وسط ليه مع انها كل صاحباتها كانوا بيمدحوا في جسمها وبيحسدوها عليه الا انها للأسف اتأثرت باللي اتزع فيها من الصغر وبعد ماكبرت ، المهم واحدة تانية ذكية جدا ومتقدمة في دراستها ودخلت سلك التدريس الجامعي يعني بقت دكتورة في الجامعة ولما اتجوزت نرجسي كان دايما يقول لها انتي غبية ، انتي مش فاهمة حاجة أصلا ، انتي لسة بدري عليكي لما تفهمي ، طيب واحدة ثالثة طباخة ملهاش حل حلو وحادق وعزومات والناس تشكر في اكلها وتورتات وجاتوهات واعياد ميلاد وكان النرجسي دايما يقول لها ايه ،لا انتي ملكيش في المطبخ أصلا ودايما كل ماتعمل اكلة مميزة يقول لها لا مش زي نفس ماما ، وممكن يسيب الاكل ويقوم عشان يقنعها انه وحش ، ولما مرضت ووقعت ومبقتش تطبخ له وكأن ربنا حرمه من النعمة اللي اتأمر عليها ؟ فهم؟ ولا اتعظ؟ لا بقى يقول للها انتي طول عمرك مش بتعملي لنا اكل ، على أساس انهم كانوا عايشين ع المية يعني ، المهم محفظة قرآن وبتدي دروس فقه وشريعة للسيدات في المساجد يقول لها انتي أصلا بتعرفي ربنا ولا عمرك حتوردي على جنة ، هو انتي فاكرة اللي بتعمليه دة حتضحكي بيه على ربنا زي مانتي بتضحكي بيه ع الناس ؟ كل دي حالات حقيقية وكلام اتقال وحصل وممكن كله يحصل مع حالة واحدة عندها كل المميزات دي بيتقال لها كل الكلام دة ، ايه دة طب ليه وازاي؟
اظن كدة الإجابة بقت واضحة هو بينتقد فيها ايه وليه ؟ هو بينتقد ليه أصلا ؟ هو بينتقد ويحقر عشان يهد ويخرب الثقة بالنفس وحب الذات طيب عشان تهدي حاجة مش لازم تكون موجودة عشام تهديها؟ طيب الشخصية دي عبارة عن قواعد واعمدة والقواعد والاعمدة دي هي مقومات موجودة عندك بتكون الشخصية بتاعتك ولو المقومات دي او الاعمدة دي اتهدت خلاص اتهدت الشخصية ولو هي مهدومة أصلا فالنرجسي مش محتاج ينتقد ولا يحقر ولا يهدم حاجة مش موجودة ، فهو بييجي ع الاعمدة الرئيسية في شخصيتك واللي هي مميزاتك والحاجات الحلوة اللي فيكي واللي بتميزك واللي بتعتبر أعمدة رئيسية في شخصيتك ويبدأ يشتغل عليها عشان يهدها ، بس فلو هو مش مقتنع انها موجودة طيب حيتعب نفسه ليه في محاولة تخريبها وهو أصلا كسول ومبيحبش يهدر طاقته ، والدليل على كدة انه اول مابتنهار صفة كويسة فيكي وتختفي بيبدأ يشتغل ع اللي بعدها وعمره عمره ماحيقول لك انك غبية لو انتي فعلا غبية الا اذا خلص ع الحلو كله وحوله لوحش حيبدأ بقى يتسلى عليكي لما يعوز ياخد وقود يعني انتي رفيعة جدا يفضل يقول لك اتخني انتي جسمك وحش ولما تتخني وجسمك يبوظ يقول لك بقى انتي فشكلتي وانا حدور على واحدة رفيعة ، ودة بنقول عليه الضربة القاضية يعني بعد ماهدم كل جميل بيشوه بقى الصورة الناتجة عشان يقضي تمام عليكي ودة غالبا بيعمله قرب نهاية العلاقة او لما بيكون بيخون عشان يبقى عنده حجج ادام الناس وعشان كمان يقنعك ان انتي السبب في انه بيخون