- امتى النرجسي الخفي يركب جناحات الملايكة وبيقدر يستمر كدة اد ايه ؟
النرجسي الخفي عنده قدرة على التمويه والاختفاء زي الحرباية بالظبط بتقف على ورق شجر جسمها ياخد اللون الأخضر ،تقف ع الرملة ابقى لونها وهكذا ودة مش عيب فيها لانها بتدافع عن حياتها بتخدع المفترس اللي عايز ياكلها ، انكا النرجسي الخفي بيعمل دة عشان يخدع الفريسة اللي عايز يلتهمها ومش دفاع عن نفسه ، لكن بالنسبة له طبعا هو بيدافع عن كيانه المريض الهش ، امتى بقى النرجسي الخفي ياخد لون الملاك؟ حقولك خمس أسباب واهم سبب هو الخامس فكملي معايا للاخر
١- لما يكون عايز منك فلوس ، او أي مصلحة ،عايزك تعملي حاجة حرام ،عايز علاقة حرام ، عامل عملة سودا وعايز يصالحك عشان ياخد علاقة ، المهم عايز منك مصلحة واهم مصلحة تخليه يركب جناحات الملايكة هي الفلوس
٢- تاني سبب عايز يتجوز بموافقتك ، ودة بيحصل كتير في الأوساط اللي لابسة قناع المشيخة والتدين وقال بقى هو عايز رضاكي عشان يراضي ربنا وطبعا هو لا يهمه رضا ربنا استغفر الله ولا يهمه رضاكي هو عايز يضمن انه يشهد عليكي الناس انك موافقة على جوازه عشان ماتقدريش ترفعي طلاق للضرر ، او عشان هو يحس انه اد كدة راجل خطير مسيطر على قلبك لدرجة انك تقبلي تعيشي معاه وهو متجوز عليكي ،او انه يثبت لنفسه انه عظيم لدرجة انه خلاكي تبقي راضية بقضاء ربنا وامره بالنسبة للزواج التاني والرابع وانه خلاكي تهتدي وتبقي بتعرفي ربنا وحاجات كتير من هذا القبيل فبيركب جناحات الملايكة عشان توافقي
٣- لو النرجسي خاف تفضحيه حيركب جناحات الملايكة ، طيب ايه اللي حيخوفه ؟ لو انتي حكيتي لحد والحد وصل له حالة بتقول انها اتكلمت مع حد عن النرجسية وفضحته ادامه والحد دة وصل له فما كان منه الا انه بقى ملاك فجأة معاها ومع أولادها وفي نفس الوقت مع المعاملة المثالية اللي بيتعاملها معاهم بدأ يقول انها مريضة نفسيا ومش متدينة وبتكذب وانه لازم تراجع نفسها وانه احسن زوج في الدنيا وهي محتارة هو ازاي عامل ملاك وبيقول عليها كدة ، طبعا هو عامل ملاك عشان خاف من الفضيحة وفي نفس الوقت حابب يلخبطها ويلخبط العيال فهي لما تتلخبط تبطل تتكلم عنه ولما العيال تتلخبط يقفوا ضدها وفي نفس الوقت هو ينشر للناس انها مش طبيعية ومريضة نفسيا وخصوصا انها ممكن فعلا ترجع تقول لا دة بقى كويس دا انا كنت ظالماه ودة حيخلي الناس فعلا تصدق انها مش طبيعية وخصوصا ان هو خفي وكل الناس علطول شايفاه ملاك أصلا ، والكلام دة بيوصلنا لرقم ٤
٤- النرجسي قرر يحط خطة لتشويه السمعة ، طيب حيعملها ازاي؟ اول حاجة حيبدأ من البيت والأولاد هم اهم حد يشهد وهم اهم حد حتكون شهادتهم قاتلة للام فيبدأ يركب الجناحات وطبعا يلبي كل الطلبات ويبدأ يحضن ويبوس ويعمل هوفرينج للكل حتى كبش الفدا حيهدي معاه تماما ويبدأ يدعي انه كان عصبي ويعتذر ويقول انا عاذرها اصلي كنت عصبي انا بحبها ومقدرش أعيش من غيرها ، ويبدأ طول الوقت يشكر فيها ادام الأولاد وهي في نفس التوقيت بتذم فيه كل الذم اللي في الدنيا فطبعا الأولاد لو مكانوش مدركين انه نرجسي وفاهمين أساليب التلاعب حيتلخبطوا ويبدأوا يشوفوا انه بيحاول يصلح وهي اللي قلبها اسود ومش عايزة تقبل اعتذاره وان هي اللي بتعمل المشاكل وعايزة تخرب البيت وشوية شوية الأولاد ينفروا منها وياخدوا صفه ولما يبدأ هو يتكلم عليها برة البيت يستشهد بالاولاد وبتبقى حملة تشويه في منتهى القسوة والقذارة والنجاح في نفس الوقت ، وبمجرد ماتنجح الحملة وياخد الأولاد او هي تستسلم وترجع له خوفا من فقدان أولادها بيرجع تاني يكسر الجناحات ويرجع لطبيعته
٥- لو النرجسي ضعف سواء ماديا او صحيا او جاله مرض موت ومعندوش حد يصرف عليه غيرها ولا يراعيه غيرها او انه كبر في السن وملوش مكان يعيش فيه غير بيتهم ومحدش برضه حيخدمه ولا يراعي شئونه غيرها ومش حيقدر يلاقي او يحصل على مصدر وقود جديد في الحالة دي لو هي قوية مش طيبة ومتعاطفة وصعبان عليها ، لو هي قوية وعرفت تتعافي وتبني لنفسها حدود صحية وعارفة توقفه عند حده بيركب الجناحات ويعيش بيها وكل كام شهر يقلعها مرة ويعمل له حادثة ولما هي تهبشه هبشة صح بيرجع يركب الجناحات تاني وبيعيش ذليل وربنا بيوريها كل اللي عمله فيها ادام عنيها مش على ايديها خالص على ايدين غيرها او على ايدين المرض او بأي شكل بتشوف جزء من انتقام ربنا واللهم لا شماتة ، لكن أحيانا بيكون بكل الضعف دة وبيفضل متجبر طب ليه وازاي؟ لانها سايبة حدودها مفتوحة خايفة تغضب ربنا ومش عارفة حقوقها وواجباتها وبتعمل حاجات مش واجبة عليها ولو ماعملتهاش مش حتتحاسب لكن هي متعاطفة وخايفة وممكن تكون بتتقي الله بس بدون علم يعني مش عارفة ايه اللي لو عملته يبقى حرام وايه اللي مش حرام ، مش فاهمة انها لما تؤذي صحتها دة حرام لما تشيله وتسنده وهي عندها انزلاق غضروفي ربنا حيحاسبها على نفسها وخصوصا اذا هو يقدر يجيب حد يخدمه ومش بيجيب استخسار ونكاية فيها واستغلال لها خدمة ببلاش في الحالة دي مش بيركب جناحات الملايكة بيركب قرون الشيطان وهي اللي بتساعده على كدة لانها سايبة حدودها مفتوحة ، ربنا مايرضاش الظلم ولا الأذي لحد ربنا لايكلف نفسا الا وسعها نقوم احنا نكلف نفسنا فوق طاقتنا ونؤذي نفسنا ونقول عشان ربنا؟ماظنش ان دة صح