باختصار شديد وبتبسيط اعرف انه مخل بس مش عايزة اوجع دماغكم باسماء وتفاصيل انتم في غنى عنها :المخ عبارة عن جزئين منفصلين وجزء ثالث بيوصلهم ببعض ، الجزئين دول جزء مسئول عن العاطفة والذاكرة والاثارة ، والجزء التاني مسئول عن الادراك والتفكير والتخطيط وطبعا حل المشاكل، اما الجزد الثالث دة بقى المهم اللي بيوصل الجزئين ببعض بحيث ان الانسان لما يقع في مشكلة عاطفية بسيطة يقدر يفكر بالجزء المسئول عن الادراك والتخطيط وحل المشاكل بعد مايكون فكر بالجزء المسئول عن العاطفة فالتفكير يكون متزن عقلاني وعاطفي مع بعض والمشكلة تتحل بدون ماتؤذي نفسك ولاتؤذي غيرك ، اما في حالة الصدمة بقى فبيحصل عطل في الجزء المسئول عن التوصيل بين جزئي التفكير فينفصل التفكير العقلاني والتخطيط والادراك العقلاني عن التفكير العاطفي وتلاقي نفسك بتفكري بشكل عاطفي بحت يعني لغيتي مخك تماما وفكرتي بقلبك زي مابنقول وكمان الجزء المسئول عن الذاكرة بيكون مع العاطفي يعني هو كمان شغال فبيكون حال الضحية مجرد تفكير عاطفي مع تجميع الذكريات المؤلمة للصدمة . عشان كدة دايما الناس اللي بتتصدم بيحصل لها عدم قدرة على التفكير وتلاقيها تدور على حد يفكر لها..
طيب بعد الخروج من الصدمة بيحصل لك ايه؟ لو اتعرضتي لمواقف مشابهة للي اتعرضتي لها ساعة الصدمة او حتى صادفتي حد بيحكي حكاية شبه حكايتك بتفتكري وبتتجدد الذكريات وبتلاقي المخ بيتفاعل مع الموقف دة كأنك بتعيدي الصدمة من تاني وممكن تنهاري وتبكي ويبدأ المخ يفرز تاني الادرينالين اللي بيحاول يكون في الجسم مضاد اكتئاب عشان يهديكي وبالتالي يفرز الدوبامين عشان يدعم الهدوء اللي حصل ونبدأ في دورة ادمان تانية وتستمر المعاناة وتفضلي تعاني من الذكريات المؤلمة فترة وكل واحدة على حسب مقاومتها وقوتها
في نفس الوقت المخ بيعمل ميكانيزم دفاعي عشان يحميكي فيعمل حاجة اسمها انفصال . فيقطع المعلومات بتاعة الصدمة لأجزاء عديدة ويخزنها في اماكن منفصلة عشان يشوش القصة اللي حصلت على اساس انك تنسيها وخلاص وتعدي وطبعا هي مش بتعدي خالص بالعكس هي بتعمل امراض نفسية بتخليكي تعبانة ومكتئبة ومش فاهمة السبب لان المخ شوش عليه وفرق المعلومات وبعدها عن بعضها وعشان تجمعيها تاني والصورة توضح ادامك بتحتاجي اما الاستعانة بطبيب او انك تكوني قوية وتعملي لنفسك جلسات استرخاء وتعملي تفريغ وجداني بالكتابة اللي بيها تخرجي المعلومات وترتبيها وتفهمي الصورة شكلها ايه وتعرفي مشكلتك فين عشان تعرفي تواجهيها وتحليها
طيب اللي عانت صدمة الحياة مع النرجسي او صدمة ان النرجسي خانها او تركها ورماها بدون اي ذنب ، بتعاني شوية اعراض حقولها لك باختصار علي اد ما اقدر
١- استرجاع الذكريات العاطفية :
حتلاقي نفسك معظم الوقت بتفتكري المواقف السيئة اللي حصلت معاكي واللي اتعملت فيكي من النرجسي وحتلاقي نفسك بتحسي تاني بالاحساس الفظيع اللي حسيتيه لما سابك او لما خانك او لما كان بيهينك ويستغلك وحتحسي بالخجل والخوف والقهر وقلة الحيلة
٢- كوابيس
بعض الناس بيجي لها كوابيس كنوع من استرجاع حي للذكريات الاليمة والمواقف المخزية والمخزلة اللي كانت بتحصل من الشريك النرجسي
٣- نقد الذات بشكل غير صحي
حتلاقي نفسك طول الوقت تقولي لنفسك انتي غبية عشان مفهمتيهوش طول الوقت اللي فات دة وانتي ازاي قبلتي انه يتعمل فيكي كدة او انتي اصلا ضعيفة وبلا حيلة عشان كدة قدر يحطمك ،….. وكلام كتير سلبي من دة بتلومي بيه نفسك طول اليوم وكل يوم
٤- التجنب
حتتجنبي التفكير العملي ، وحتتجنبي الناس و الاماكن والنشاطات اليومية ، حتحسي انك مش عايزة تشوفي حد وحتحسي ان كل الناس بتشاور عليكي وتقول العبيطة المغفلة اللي انضحك عليها اهيه ، الضعيفة اللي معندهاش كرامة اهيه ودة بيكون ناتج كمان عن تعليقات بعض الناس الجهلة اللي بتيجي في عز ازمتك وتقول لك انتي اللي غلطانة انك استحملتي كل دة ، او انا لو مكانك كنت سبته من اول يوم ، فبيكون الحل اللي بتعمليه انك بتتجنبي الناس تماما
٥- جمود عاطفي مؤقت :
بتحسي ان عواطفك كلها متجمدة ومشلولة مش عارفة تتواصلي عاطفيا وممكن تكوني مش قادرة تتعاطفي مع حد ومحدش بيصعب عليكي ومشاعرك متجمدة وسطحية
٦- القلق الاجتماعي
حتلاقي نفسك بتعزلي نفسك عن مجتمعك وعن الناس بسبب احساسك بالخجل والنقص وخوفك من انك حتظهري كحد مختلف عنهم وكمان مش حتكوني قادرة تثقي في حد ولا اقرب الناس لكي
٧- الارق وفرط اليقظة
بانيك اتاك(نوبات الهلع) وانفجارات عاطفية ( بكاء هستيري و انهيار ومشاعر مؤلمة ) احساس بغصة في القلب بشكل مستمر ودائم
٨- صعوبة التركيز
طبعا مفيش تركيز بسبب ان كل التركيز بيكون على التفكير العاطفي اللي قلنا كله
٩- خجل سُمي وتخلي عن الذات
انتي بتبقي خارجة من العلاقة أو حتى لو مستمرة فيها بيكون معاكي احساس انك معيوبة من كتر الكلام اللي كان بيكسرك بيه النرجسي ، حاسة انك ملكيش اي قيمة وعندك شعور بالعار بسبب معرفتك بيه وبسبب كلامه برضه وبتبدأي تتخلي عن نفسك وكأنك بتتبري منها وحاسة انها متستحقش الرعاية والعناية والحماية ولا الحب ولا الاحترام
١٠- التفكك :
بعد فترة قصيرة من اكتشاف المشكلة اللي سببت الصدمة ممكن تبدأي تنسي احداث الصدمة او احداث الاساءة والاستغلال اللي كنتي فيه زي ماقلنا المخ بيعمل ميكانيزم الدفاع بيفكك بيه الاحداث ويبعترها عشان تتلاشى وتنسيها وتلاقي مخك اصلا في حالة شلل وتوقف تماما عن التفكير
١١- تشوه معرفي يعني يا ابيض يا اسود مفيش وسط يا اما كله صح يا اما كله غلط وطبعا بتبصي لنفسك بنفس الطريقة وبالتالي بتشوفيها عديمة الفائدة وسيئة وضعيفة ومبتعرفيش تشوفي فيها اي مميزات
١٢- التفكير الانتحاري
رابط صفحة الفيس
https://www.facebook.com/kawthrsanad
رابط مجموعة الفيس : ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest