هل يشعر النرجسي بالندم ؟
سؤال دايما زوجة النرجسي بتسأله
اول كلمة قالها تيودور في الموضوع دة : “ نحن لا نتورط في اظهار الندم “ يعني عمرنا ماحنحسسك اننا ندمانين ، بالرغم من ان النرجسي بيعرف كويس اوي يقول اسف ،، وطبيعي جدا انه يعرف يقول اسف لانه سمعها منك الف مرة لكن عمره ماحسها يعني يعرف يتلفظ بيها بس من باب التمثيل وانقاذ الموقف .لكن خير ان شاء الله يحس بالاسف ليه وهو اصلا مش بيعمل اي حاجة غلط (من وجهة نظره ) ؟ دائما وابدا كل حاجة غلط هي غلطة حد تاني غيره ، وعادة غلطتك انتي . ( حالة من الحالات كانت بتقول أي حاجة تحصل في الدنيا يعنفني كأني انا اللي عملتها سواء تخصني او تخص الشرق الوسط بأكمله لغاية ماحسيت ان انا السبب في ثقب الاوزون)
وبما ان النرجسي حد مميز ويستحق كل شيء فمن حقه يعمل اي حاجة تسعده و بالتالي مفيش حاجة اسمها هو غلطان لانه مش بيعمل غير اللي يسعده ودة من حقه ففين الغلط هنا؟
فلو انتي طلبتي منه انه يعتذر ممكن يحصل غضب نرجسي لان طلبك دة بالنسبة له اهانة مقصودة ليه ؟ لخمس اسباب
١- انتي مين اصلا عشان البيه العظيم دة يعتذر لك؟ انتي اصلا اقل منه وانتي اصلا مفروض تعملي اللي هو عايزك تعمليه فمينفعش تعكسي الصورة وتطلبي منه يعتذر لك عمرك شفتي سيد يعتذر لعبده
٢- كون النرجسي يعتذر دة معناه انه عمل حاجة غلط وانتي اكيد فهمتي انه ابدا مبيعملش اي حاجة غلط
٣-الندم يظهر الضعف والنرجسي مش ضعيف ، انتي اللي ضعيفة ولما تطلبي منه اعتذار فدة معناه انك شايفاه ضعيف
٤- لما بتطلبي انه يعتذر وبتكوني حاسمة دة بيديه احساس بالتهديد انه حيفقد السيطرة عليكي ودة شيء هو مستحيل يقبل بيه فبالتالي يهب فيكي شوية غضب نرجسي يرجعوكي مكانك تاني
٥- اذا كنتي متخيلة او مستنية انه ممكن يعتذر ادام حد فغالبا كدة حتستني كتير ، مش كدة وبس دة هو مش حيعتذر وفي نفس الوقت حينتقم منك مجرد مايكون معاكي لوحده وراء الابواب المغلقة زي مابيقولوا
كمان دلوقتي اللي بيندم دة بيندم علشان هو اتسبب في اذى لحد وفهم ان الحد دة حصل له ضرر واذى فإذا النرجسي اصلا معندوش مجال يشوف حد ولا حتى انتي هو مش فاضي غير لنفسه يادوب يلحق يجمع شوية وقود نرجسي يعيش بيه ، فمش في مجال بصره ولا تفكيره مين اتأذى ولا مين حصل له ضرر وفي نفس الوقت هو مش حيفهم مشاعر الاخرين زي ما احنا عارفين هو اخره يحس بآلامه واحزانه هو فقط ودة من فرط الانانية
طيب ازاي هو بيستغلك في الجزئية دي ؟
طبعا انتي بصفتك انسان طبيعي بتحسي باللي حواليكي وبتعرفي مشاعر الندم واذا غلطتي في حد واعترض او زعل منك بتتفهمي وبتعتذري ببساطة وبالتالي بتتوقعي من الناس نفس الكلام انهم لما يغلطوا يندموا ويعتذروا لكن بتيجي عند النرجسي وتلاقي نفسك مش فاهمة هو ليه مش زي بقيت الناس وطبعا تقعي في فخ محاولة تغييره وافهامه انه لازم يحس باللي حواليه وانه لازم يتغير وطبعا هو يبدأ يستغل محاولاتك دي في انه ياخد وقود نرجسي وازاي الكلام دة ؟
انتي اولا لما تحاولي تفهميه وتوجهيه فدة معناه انك مهتمة بيه والاهتمام وقود نرجسي ،
كمان هو ممكن يتلكك علي اي كلمة بتقوليها اثناء محاولتك اقناعه انه لازم يتعلم ثقافة الاعتذار، ويبدأ يتهمك انك بتهينيه وتغلطي فيه وشوية غضب نرجسي مفاجيء يخليكي تنهاري وبكدة برضه وقود نرجسي ،
والاخبث من كدة بقى زي ماقلت مرة قبل كدة حيستدرجك في الكلام ويهد حيلك كلام كتير تقوليه له ويحسسك انه قرب يقتنع بكلامك وفجأة يقول لك جملة معناها انه مش فاهم حاجة او معناها ان انتي مش فاهمة حاجة اصلا او انه مش مقتنع بأي حاجة من اللي بتقوليها ويرجع يستدرجك تاني لدرجة ان بعض الحالات بتقول ان الحوار ممكن يستمر بالطريقة دي لمدة ثلاث اربع ساعات ويختم بخناقة عظيمة او انهيار تام منها او انها تشتمه في الاخر وتصرخ ويطلعها مجنونة .
عشان كدة لازم تفهمي انك مينفعش تحاولي تغيريه ولا تفهميه ولا توجهيه لانه فاهم كل حاجة ومش عاجبه غير نفسه ومبسوط كدة وحيهد حيلك ويستغلك وانتي بس اللي حتخسري بدل ماتحاولي تغيريه حاولي تغيري نفسك وتقوي نفسك وتطوري شخصيتك وتعتمدي على نفسك
من وجهة نظر تيودور انه النرجسي اصلا بيتصرف معاكي كل التصرفات السيئة والخداع والخيانة والاهانات والسيطرة كل دة لانه محتاج للوقود منك ولو معملش كدة مش حيكون فيه وقود ولو مفيش وقود هو حينهار لان الوقود بالنسبة له زي التنفس والاكل والشرب والنوم وهو فيه حد بيعتذر عن انه يتنفس او ياكل او يشرب او نام ( فيه كتاب كامل لسام فاكنين بيتكلم عن الوقود النرجسي واهميته للنرجسي وعواقب فقد الوقود دة عليه واد ايه بتكون وخيمة فعلا وبتسبب انهياره عضويا ونفسيا وعقليا ).
لكن طبعا لانغفل ان فيه لحظات النرجسي بيعتذر فيها ويبدي كل الندم ودي لحظة مايحس انك حتسيبيه وتمشي بس اللحظة حيدعي الندم ويمثل الاعتذار وحيوهمك انه حيموت نفسه من الالم لانه زعلك ، بس متفرحيش اوي لان هو لو كان عنده بديل جاهز ومتدرب زيك على طاعته وخدمته فتأكدي انه حيسيبك تمشي ومش حيعتذر ولا يبدي الندم
تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest