تعملي ايه لما النرجسي يقول لك انتي السبب في اي كارثة هو عاملها
لما النرجسي يقولك انتي السبب في اي تصرف كريه عمله او اصلا قال لك انتي اللي عملتيه يعني يكذب ويقولك انتي اللي كذابة ، يلف ويدور ويقولك انك بتلفي وتدوري ( يعني بتحوري الكلام ) اعرفي انه عايز يهرب من المسئولية ومن نتيجة عمله وفي نفس الوقت يحقرك ويقلل من احترامك لنفسك ، طبعا النرجسي لما بيقول لك انتي السبب وانتي اللي عملتي بيكون عايز يشكك في نفسك اولا ، ويستفزك ثانيا وبيكون كداب طبعا ومفبرك الموضوع كله على بعضه ، فانتي لما يعمل معاكي الحكاية دي :
١- كوني هادية تماما ومتدخليش في المناقشة ، انا عارفة ان الحكاية مش بتكون سهلة لكن كفاية انك عارفة ومتأكدة انه بيكذب وانه غلطان وعارف انه غلطان وقاصد يلفق لك غلطه فدة كافي انه يخليكي متديلوش اللي هو عايزه ، هو عايزك تدخلي في الحوار ، اقفلي عليه الطريق، ومتقوليش له انا فاهمة الاعيبك انت بتعكس على اخطائك ولا انت بتسقط علي ، كدة حققتي له هدفه هو عايزك تردي عشان يتلكك ويزيد غضبه ويرعبك وياخد وقود.
٢-متقبليش اللوم ولا تحسسيه انك مهتمة اصلا بيه يعني لاتردي عليه وتدافعي عن نفسك ولا تقولي له صح عندك حق انا غلطت لان انتي فعلا مغلطتيش ، فسكوتك بثقة في نفسك وعدم ردك عليه لا بالسلب ولا بالايجاب حيحسسه انك رافضة الموضوع على بعضه ودايما تحطي في دماغك انه المشكلة فيه مش فيكي وانه مضطرب وان انتي معندكيش اي مشكلة ولا عملتي حاجة و اوعي تصدقي اي كلام يقوله عليكي ، كان فيه حالة من كتر ماكان زوجها يقول لها انتي مستفزة صدقت انها مستفزة وبقت متتكلمش نهائيا معاه عشان متستفزوش سبحان الله هنا بقى استفزته بجد . فأبدا متصدقيش اي كلمة يقولها عليكي
٣- ممكن تقولي الحقيقة اللي حصلت فعلا مرة واحدة وتسكتي بعدها ، يعني لو هو بيتهمك بحاجة هو اللي عملها زي مثلا حالة طالعة عمرة مع زوجها النرجسي ومفروض انه حيقابلها في المطار قبل موعد الطيارة بساعتين وهي وصلت في ميعادها وهو اتأخر وراحت عليهم الطيارة واضطروا يسافروا تاني يوم ، وبعد كذا سنة هو بيقول لها فاكرة لما ضيعتي علينا الطيارة واحنا رايحين العمرة انتي عمرك مابتحافظي على مواعيدك . المفروض في الحالة دي تقولي انت اللي اتأخرت يومها لانك معملتش حساب الطريق مثلا وبس وتسكتي ومتكرريش الكلام ولا تحلفي ولا تنفعلي بمنتهى الهدوء هي كلمة ونص وخلصنا . هو طبعا مش حيسمع لك وحيتظاهر انه مش مصدقك وهكذا بس مش مهم ملكيش فيه انتي قلتي اللي عندك وبس عشان ترضي نفسك وبس انك وضحتي موقفك ، وكمان لو فيه حد موجود اثناء المناقشة دي فيكون موقفك واضح ،
٤- اوعي تمتصي طاقة اللوم اللي بيوجها لك لان دة بيقلل احترامك لذاتك وهو دة اللي هو عايزه وانتي عارفة انه موقفه مش معتمد على اي حقيقة بالرغم من انه يبدو بيدافع عن حقه الصميم ويبدو انه على حق لدرجة انك ممكن تشكي في ذاكرتك ودة كل الحالات بيقولوه ، هو اصلا بيعمل كدة وبيلومك عشان يحسن احساسه بنفسه لما يخليكي انتي تحسي احساس سيء تجاه نفسك ، انتي مسئولة عن نفسك وفهمتي يبقى حافظي على نفسك
٥- اوعي تغيري اسلوبك وتصرفاتك وردود افعالك بناء علي اللي النرجسي بيعكسه عليكي لان هو غلط وانتي صح ولانه لو لاحظ ان اللي بيعمله دة جاب نتيجة وانتي بدأتي تتغيري وترضحي و ان احترامك لنفسك بيقل فهو حيفضل يتبع الاسلوب دة معاكي طول الوقت وعمره ما حيتوقف ابدا
٦-بمنتهى الهدود انهي المحادثة وانسحبي وبكدة انتي بتمنعي الوقود النرجسي اللي هو عايزه منك ودة حيخليه يوقف ويسكت لانه مش حياخد حاجة فمش حيهدر طاقة .

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11