٧ جمل احذري تقوليهم للنرجسي بشكل مباشر والا حتواجهي غضب نرجسي
لان النرجسي هش داخليا وعارف عيوبه ومش عايز حد يعرفها ودايما حريص انه يخبيها ، فاي حاجة تمس العيوب دي من قريب او بعيد حتتسبب في غضب نرجسي احنا في غنى عنه ، طيب خلينا نقول الجمل اللي ممكن لو قلتيها تثير غضبه ومع تكرارها ممكن تخسريه
١- انت عندك مشكلة انت عايز تسيطر لمجرد السيطرة او انت متحكم وبتلكك عشان تضيق عليا ، هنا انتي بتدوسي على نقطة ضعف داخلية عند النرجسي اللي هي احساسه الدفين بالضعف والخوف ان الامور تخرج عن سيطرته ومتمشيش بالشكل اللي هو راسمه وعايزه وعشان كدة هو بيحاول يسيطر بكل قوته عليكي وعلى اولاده فقط ولو حد من اولاده قوي شوية مش حيقدر يسيطر عليه فهو لما بيسيطر عليكي مش بيكون مسيطر ومتحكم عشان هو قوي لا اطلاقا دة عشان انتي ضعيفة واديتيه الفرصة انه يسيطر لكن هو برة البيت مش حتلاقيه مسيطر اطلاقا الا لو كان في منصب او سلطة او صاحب عمل. ،يعني الخلاصة هو ميعرفش يسيطر غير على الضعفاء اللي اضعف منه والدليل على كدة انه بيقف ارنب ادام الاعلى منه في السلطة او في الثروة او في اي حاجة ، المهم انك تفهمي ان الجملة دي بتعري جزء النرجسي عايز يخفيه
٢- حاول تفهم وجهة نظري ، او حاول تبص من المنظور اللي ببص منه او بالبلدي كدة حط نفسك مكاني ، الجملة دي بترعب النرجسي وبتوتره جدا خصوصا لو قلتيها في موقف هو خان فيه اللي هي انتي ممكن تقوليها طب لو انا اللي عملت كدة كنت حتحس بايه او كنت حتعمل ايه ، طبعا انتي هنا بتعفرتيه لاسباب كتيرة جدا : اول حاجة انتي بتحاولي تنزليه لمستواكي وازاي تتجرأي وتفكري انه ممكن يكون زيك او انتي تكوني زيه ، ثاني حاجة انك اصلا ازاي تفكري انك تعملي راسك براسه وتعامليه كند وتقولي له لوانا عملت زيك هو انتي مين اصلا عشان تعملي زيه ومين اداكي الحق انك تحطي نفسك في المكانة دي وثالث حاجة ازاي تفكري اصلا انك تخونيه والفكرة دي طالما جت في بالك يبقى وارد تعمليها (خدي بالك انه بعضهم بيكون عنده بارانويا او الشك المرضي ) غير الاسقاط طبعا ، اخر حاجة بقى انه اصلا ميهمهوش وجهة نظرك وانتي اصلا مش من حقك يكون لكي وجهة نظر طالما هو قرر وحدد واخد قرار فانتي ازاي تتجرأي وصوتك يطلع ويبقى لك وجهة نظر يعني اعتراض ودي كارثة اصلا
٣- “ احنا اتكلمنا في الموضوع دة قبل كدة وحسمناه ومش حنفتحه تاني “ لما يكون بيزن في طلب وانتي رافضاه (عايز فلوس ، عايزك تبيعي دهبك ، تحطي مرتبك كله في البيت ، عايز ميراثك ، عايزك تاخدي له قرض على مرتبك ، عايز حاجة حرام ، عايز يتجوز عليكي بعضهم بيحاول يقنعك بدة وبعضهم من جبروته عايز زوجته تروح تخطب له ، ….. ) انتي بقى تقولي له “ احنا اتكلمنا في الموضوع دة قبل كدة وحسمناه ومش حنفتحه تاني “ انتي كدة بتحطي ايدك على عصب عريان بتكهربيه ليه لان الجملة دي كانت بتتقال له من امه او ابوه لما كان يطلب حق من حقوقه وهو طفل وهم اصلا مفهموهوش لا ليه وما استجابوش لطلبه هم مجرد قالوا له لا ولا اتكلموا ولا اتناقشوا ولا ريحوه وبعدين يقولوا له الجملة دي ، يعني بيقفلوا عليه طريق تحقيق اي حاجة عايزها وخصوصا ان دة كان بيحصل في قرارات مصيرية بالنسبة له زي مثلا انه يشترك في فريق رياضي او انه يدرس في كلية معينة او انه يكمل دراسته او لا او انه يدخل علمي او ادبي وطبعا في الطلبات العادية اللي ممكن اي ولد يطلبها زي انه يروح رحلة مع مدرسته او يخرج مع اصحابه او انه يعمل اي حاجة فيها ترفيه او اسعاد له كانت بتترفض منهم (طبعا بسبب نرجسيتهم مش بسبب التربية) المهم انك فكرتيه بنقطة سوداء بيهرب منها ومش عايز يفتكرها ومرعوب من تكرارها تاني في حياته وماصدق اتخلص منها ، شوفي بقى انتي عملتي فيه ايه وتوقعي حيردها لك ازاي
٤- هو انت شايفني دمية تحركها زي ما انت عايز ؟ طبعا دي معناها انك فهمتي انك مش دمية وفهمتي انه عايز يحركك زي الدمية ، يعني انتي حصل لك صحوة مفاجئة ومفجعة بالنسبة له لانك كدة حتبوظي له الخطط الحياتية اللي تعب فيها وحتهدمي كل المجهود اللي عمله معاكي عشان يحولك لدمية ودة معناه خطير ان انتي مفاهيمك بتتغير وحد بيلعب في دماغك وكمان معناه ان فيه حد جديد دخل حياتك او انك رجعتي للناس اللي عزلك عنهم وهم اللي غيروا المفاهيم وصحوكي ، انتي كدة هديتي الدنيا فوق دماغه
٥- “ طيب خلينا نتكلم عن اخر خطأ فادح انت عملته” وتسميه الخطأ دة (مثلا خيانة او كدب او ضيع فلوس او سرق حاجة من دهبك او كدب عليكي كدبة كبيرة او وقع بينك وبين حد وانتي قفشتيه ) ، الجملة دي بتلاقي نفسك بتقوليها لما يكون قاعد يحقر فيكي ويهينك ويوجه لك اتهامات او ماسك لك غلطة هايفة وقاعد يؤنبك عليها ويحسسك بالذنب ويقول لك انك طلعتي شخصية زبالة وانه مصدوم فيكي والكلام السيء اللي هو بيقوله طول الوقت ، طبعا مجرد ماتقولي الجملة دي انتي بتقلبي الترابيزة بنفس الطريقة اللي هو بيعملها معاكي وبتعملي ازاحة اللوم اللي هو بيعمله معاكي ودة بيوصل له رسالة انك فهمتي الاعيبه او ان انتي بتقوي عليه وبيحصل عندك تغير في شخصيتك لانه متعود انك تاخدي على دماغك وتسكتي ودلوقتي بتردي وكمان بتتلاعبي بطريقته فلازم يمنعك من التلاعب دة ويحرمك تعمليه لانه اترعب منك ، ايوة فعلا اترعب وخاف لانك حتخرجي من سيطرته وحتحاولي تسيطري عليه لانه فاهم انه بيعمل الالعيب عشان يسيطر عليكي فبالتالي انتي بالنسبة له كدة بتحاولي تسيطري عليه مش بتدافعي عن نفسك ، واحنا اتفقنا قبل كدة ان الغضب النرجسي بيكون ناتج عن الخوف والرعب عشان كدة هو لو سمع الجملة دي حيخاف وحيعمل غضب نرجسي طبعا
٦- انت فيك حاجة غلط او انت ايه اللي جرى لك ، او انت مش شايف انت عامل ازاي ؟ النوع دة من الجمل بتخليه يحس انه انكشف وانك بدأتي تشوفيه على حقيقته وهو بيكون متخيل انه بالذكاء لدرجة ان مستحيل حد يكشفه ، (احد النرجسيين بيقول لزوجته انا اقعد مع الناس اسمع بس وقليل لو اتكلمت وممكن يفكروني سرحان ، لكن انا بكون مركز معاهم جدا وقاعد اراقبهم وادرس كلامهم