ليه طول الوقت عايزة تعرفيه انه عنده مشكلة وانه محتاج علاج او انه نرجسي
١- حاسة طول الوقت ان اللي بيحصل دة مش عدل انه عايش حياته بالشكل دة وعمال يؤذيكي ويؤذي اولادك واي حد حواليه ومعندوش اي تعاطف وشغال عليكم غضب نرجسي وصمت عقابي وتلاعب وانتي متعذبة في الحياة دي ، اللي انتي متعرفيهوش انه اصلا هو عايش حياة فارغة وعنده خواء داخلي انتي متخيلة انه سعيد وهو ممكن يحاول يبين لك انه سعيد لكن هو حقيقي ميعرفش السعادة اصلا ولا عمره حسها هو حاسس انه مش كافي ومش محبوب ومش بيحب نفسه ومش راضي عن نفسه ، هو حياته مفهاش سعادة ومفهاش حب هو عايش في اكتئاب دائم وعد رضا ، هو مش عايش الحياة زي ما انتي فاكرة هو عامل زي الغني اللي عنده كل حاجة الا الصحة هل بيستفيد بأي حاجة عنده؟ حياته عبارة عن حسد وكره وغضب و مفهاش حب ولا تعاطف ولا حياة اصلا
٢- انتي عندك امل تكوني مَدرسة للنرجسي او معالج ودة مش حيحصل لانه اصلا مش بيسمعك ، انتي بتعلميه ولا حاجة مفيش حاجة بتدخل ودنه عشان توصل لعقله، انتي كل اللي بتعمليه انك بتنشطي احساسه بالعار لانك بتقولي له بص جواك وشوف ضعفك وهشاشتك لما بتحاولي تفهميه وضعه او تعرفيه انه عنده مشاكل سواء سميتيها او لا ، فيعمل لك غضب نرجسي والمشكلة تتصعد وفي الاخر انتي اللي بتخسري اعصابك وبتخسري الموقف ، عشان تعلمي اي حد اي حاجة لازم يكون الحد دة مهتم وعايز يسمع ويكون عقله منفتح وعايز المعلومة وهو اصلا لا مهتم ولا بيسمع ولا عقله منفتح يبقى ليه توجعي قلبك ؟ انتي عايزة تفهميه انه بيؤذي الاولاداو اي حد وهو مش مهتم بيهم اصلا هو مهتم بنفسه فقط
.خدي بالك فيه غلطة بتعمليها كتير لما تحبي تفهميه مشاكله ، تلاقي نفسك بتقولي له حط نفسك مكاني وشوف حتحس بإيه او لو انت مكان فلان كنت حتحس بإيه ، انتي كدة بتحاولي تستخرجي منه التعاطف اللي هو مش موجود خالص فبتحطي ايدك ع الجرح يعني بتنشطي احساسه بالعار اللي هو عايش فيه ، هو عارف انه مش متعاطف ومش بيحس بحد ودة من ضمن اسباب احساسه الدائم بالعار ولو كان بشكل غير واعي ، المهم انك لما بتنشطي الاحساس بالعار دة بيعصل طبعا غضب نرجسي وانتي تبقي مش فاهمة ليه غضب انا مقلتش حاجة تزعل ، لكن الواقع انك فعلا حطيتي ملح ع الجرح ، كمان لو قلتي له انا شفت فيديو عن النرجسية بيتكلم عن حالتك بالظبط وتصرفاتك وبيقول انك عندك مشكلة ممكن لو شفته تقدر تعرف حالتك وتعالجها ، للاسف فيه ناس عملت كدة وفعلا كأنها نزعت فتيل قنبلة وانفجرت في وشها ، امسكي نفسك وبلاش تتكلمي في الموضوع دة
٣- انتي عايزة تعلميه درس وخصوصا لو لقيتي نفسك في وسط اهلك او اي ناس انتي ضامنة مساندتهم لكي فانتي كدة بتعرضي نفسك لحاجة من اتنين ، اما الناس حيغلطوكي عشان بتناقش مشاكلكم على الملأ وهو حيعمل نفسه ضحية وممكن يعيط لهم عشان يبقى قضى عليكي قضاء مبرم ، او انهم يساندوكي ويعاتبوه وبعد كدة هو حينتقم منك اسوأ انتقام بقى من غضب نرجسي كل شوية ، لصمت عقابي لاساءة ادب والفاظ عليكي وعلى الناس اللي ساندوكي ، يعني حيعيشك في جحيم ، الحكمة بتقول انك ابدا متواجهيش النرجسي ادام حد الا اذا انتي مقررة انفصال ، اوعي تفضحيه اذا انتي مش ناوية تسيبيه ، وبعدين انتبهي النرجسي حساس جدا للنقد خصوصا الخفي هو حساس للنقد ادامك ادام شخص واحد فما بالك بالنقد ادام اكتر من حد ولا ادام تجمع عائلي ، انتي بتبقي بتفتحي على نفسك النار ، مينفعش تعلمي النرجسي درس ادام الناس ابدا
٤- انتي فاكره ممكن يتغير لو فهم انه عنده مشكلة ودة مش حيحصل ، انتي مهما شرحتي وفهمتي وحاولتي تعالجي من مساعدة طبيب مش حتستفيدي غير انه حيفهم منك الحكاية كلها بتاعة النرجسية دي وبعدين في اول خناقة حيقول لك انتي نرجسية
٥- بعض الحالات بتحاول تتنصح وتسحب منه العواطف والمشاعر برضه بطريقة ذكية زي انها تقول له انا شايفة جواك حاجات حلوة لكن انت بتصرفاتك الغريبة دي بتضيعها ، طبعا انتي متخيلة انه عشان عنده شوية مشاعر ضئيلة فانتي حتقدري تسحبيها وتطلعيها ع السطح عشان تفهميه نفسه على اساس انه يفهم بقى وييجي يقولك انا اسف اني ظلمتك وعذبتك وخنتك ، للاسف كل دة مش بيحصل ومش حيحصل ، اللي انتي بتعمليه دة بيعرضك للخطر لان اللي مفروض يعمله الطبيب النفسي هو عارف بيعمله ازاي وبيوصل ازاي لموضع العار اللي جواه من غير مايحصل انفجار وان كان احيانا يحصل انفجار مع الطبيب نفسه لكن هو بيعرف يسيطر عليه ، انتي ماينفعش تعملي دة لان الانفجارات دي ممكن تكون فعلا خطر عليكي ، اذا عايزة تعالجيه وعندك امل لازم يكون بمساعدة دكتور يقول لك تتصرفي ازاي وتعملي ايه
٦- لو عايزة تحمي اطفالك برضه مينفعش الطريقة دي لانك حتعرفيه نقطة ضعف لكي اللي هي الاطفال وحيبدأ يؤذيهم عمدا نكاية فيكي ، هو مش بيهتم بيهم ولا فارقين معاه هو ممكن يستغلهم زي مابيستغلك بالظبط ، ياريت تبعدي الاولاد عن اي حوار بينك وبينه ولا تلفتي نظره لهم ابدا وافصلي بينه وبينهم ومتحاوليش تسحب منه العواطف عشانهم
٧- لو انتي عايزاه يحس بالسوء زي ماانتي حاسة فمش بالطريقة دي خالص مش بانك تعرفيه انه عنده مشكلة لانه مش حيعرف غير انك بتنتقديه لكن انتي ممكن تحسسيه بالسوء لما يشوفك احسن منه مستغنية عنه ومش عارف لك نقطة ضعف وبدأ يفقد السيطرة عليكي ودة يحصل لما يكون لك مصدر رزق. وتفكي التعلق المرضي وتكوني واثقة من نفسك ومتتجاوبيش لاساليب التلاعب بتاعته ، خدي بالك تاني من نقطة هنا : انتي لما تعملي كل دة هو بيشوفه انتي مش محتاجة تروحي تهبشيه بقى ولا تقولي له انا احسن منك او انت مش هاممني او تردي عليه ردود مستفزة لان دة بيخليه يعرف انك شايفة كل العيوب والسواد اللي جواه ودة زي ماقلنا بينشط احساسه بانه غير كافي ومش مناسب ولا ملائم لكي ولا لغيرك وبيؤكد المشاعر المدفونة في النفس السرية بتاعته ويخرجها المشاعر دي للسطح ويبدأ يحس انه سيء وكل دة مش مفروض يحصل غير في وجود معالج نفسي
انتبهي لنفسك ومتستخدميش المعلومات اللي وصلتك بطريقة غلط تؤذيكي بدل ماتفيدك