مين الأشخاص اللي ممكن يعاني منهم النرجسي؟
النرجسي أصلا عايز ايه من اللي حواليه ؟ عايز اهتمام ووقود وبس طيب لو ملقاش دة حيمشي ويشوف حد يديهوله ،لكن لو هو مجبر على البقاء في مكان مع حد مش بيديله اللي هو عايزه فهو في الحالة دي حتبدأ معاناته
مين بقى الأشخاص دي ؟ او بالاصح ازاي تكوني واحد منهم ؟
لما تفهمي شخصيته تماما وتفهمي اضطرابه كويس جدا ،يعني ايه شخصيته واضطرابه مش شخصيته هي اضطرابه؟ لا طبعا الاضطراب هو اضطراب في الشخصية الاصلية بتاعته يعني ايه ،يعني هو شخصيته أصلا ضعيفة سواء بسبب الجينات او سبب دوره في الاسرة النرجسية(كبش فدا ولا طفل دهبي) المهم لو شخصيته ضعيفة حيكون نرجسي خفي ولو شخصيته قوية شوية حيكون ظاهر ، ولو الشخصية أصلا مهزوزة حيكون ضحية ،يعني الشخصية الاصلية هي اللي بيصيبها الاضطراب ، طيب انتي بقى مفروض تفهمي شخصيته كويس انهي نوع من دول وتفهمي الاضطراب كله وبكدة حتتكشف لك كل الاعيبه وحتكوني فاهماه كويس جدا في الحالة دي مش حيعرف يتلاعب بيكي وهنا حتكون المعاناة ليه؟ لان النرجسي بيكتسب احترامه واحساسه بذاته من خلالك انتي ومن خلال ردود افعالك العاطفية وشعوره بالاهتمام والانتباه سواء سلبي او إيجابي وكمان هو بيقدر يعرف انتي متعلقة بيه اد ايه عن طريق انفعالاتك معاه واهتمامك برأيه فيكي وبمشاعره تجاهك ودة طبعا بيشوفه في انهيارك وبكائك وتفاجئك بندالته ( حالة بتواجه جوزها بخيانته لها يقول لها جملة عجيبة :هو دة اللي انا بموت واشوفه اندهاشك دة هو اللي انا عايزه )كالعادة النرجسي بيطلع كدة بحاجات من جواه من غير مايحس من شدة النشوة اللي عنده نطق .
طيب مين كمان ممكن النرجسي يعاني منه ويهرب من التواجد معاه ؟
الشخص اللي عنده مناعة ضد النرجسي ودة اتكلمنا عنه في حلقة كاملة شوفوها في القناة
كمان الشخص اللي اقوى من النرجسي او بمعنى ادق الشخص اللي قدر يحقق نجاح في حاجة النرجسي فشل فيها ،لان الشخص دة دايما حيفكر النرجسي انه فاشل وفشل في الجزئية دي حتى لو كان نجح في جزئية تانية الا انه معندوش المنطقية اللي تهديه في الحتة دي
كمان الشخص اللي عنده مميزات شخصية مش عند النرجسي يعني ايه يعني الشخص السوي اللي قادر يحافظ على السواء ومايتأثرش بمحاولات النرجسي في هدمه ، يعني الشخص اللي بيقدر يبتهج ويفرح ويعيش السعادة صح واللي بيقدر يتجاوز الازمات ويتعلم منها ويكبر وينموا اكتر ،الشخص اللي عنده ثبات انفعالي ومش بينهار في الازمات ولا بيقع زي النرجسي ،الشخص اللي بيقدر يحل المشاكل بهدوء ومش بيحصل له ذعر وهلع زي النرجسي ،الشخص اللي الناس بتحبه بدون مجهود منه هم بيحبوه من غير سبب مش عشان بيديهم فلوس او أي منفعة هم بيحبوه عشان هو محب ودة النرجسي مش بيكون فاهمه هم ليه وازاي بيحبوك كدة من غير ماتعمل لهم حاجة ولا تديهم حاجة ، الشخص اللي بيقدر يتأقلم في الحياة مع الصعوبات ودايما شايف نث الكوباية مليان ودايما متفائل وشايف اموره كلها خير سواء كانت سعيدة ولا حزينة ومسلم امره كله لله ومفوض امره لله ودة اكتر شخص بيموت النرجسي من الغيظ لدرجة ان بعض الحالات بتقول ان النرجسي بيقول لها انتيب تخدعي نفسك بالكلام دة انتي فاكرة نفسك كدة قريبة من ربنا دة وهم اللي انتي فيه وفي نفس الوقت لو قالت ادامه وافوض امري الى الله ان الله بصير بالعباد بيتكهرب ويترعب لانه عارف من جواه ان الله بصير بالعباد وعارف من جواه انها لما تفوض ربنا حيحيب لها حقها منه ودي بتكون مصدر ازعاج دائم للنرجسي وبيحاول يكسرها بكل الطرق ومش بيقدر فقطعا بيعاني منها ، حالة بتقول سألت النرجسي حاول كدة تطلع لي غلطة او أي حاجة ضايقتك بيها من ساعة ماعرفتني يقول لها طول عمرك بتعامليني بندية وهي كانت منتهى الطاعة له لكن طبعا هو كان بيقصد انا مش عارف اكسرك