#ترخيص
#سيارات
#مرور
#أفكار_جديدة_جدا

اهلا بكم في قناه افكار جديده جدا ومعكم هاني النهارده هنتكلم على موضوع مهم جدا و غايه في الاهميه بالنسبه لكل واحد عنده عربيه او اي وسيلة نقل النهارده هنتكلم عن فحص وترخيص العربيه

لكن قبل اي حاجه يشرفنا اشتراك في القناه وتفعيل علامه الجرس علشان يوصلك اشعار بكل جديد بينزل عندنا على القناه

وقبل ما ابدأ في الدخول في تفاصيل حلقتنا عندي طلب من كل واحد شايفنا دلوقتي

ارجو الدعاء لوالدي بالرحمة لانه توفى في الفترة الماضية بعد اصابته بفيروس كورونا وعدم تشخيص الإصابة من الاطباء الا بعد اسبوع تقريبا، فرجاء منكم الدعاء بصدق وإخلاص وشكرا ليكم جميعا.

ونرجع تاني لموضوع حلقتنا

اول خطوه هتعملها في تجديد رخصه العربيه انك تروح تجيب براءه الذمه او شهاده المخالفات، وممكن تجيبها من المحكمة او من اي مكتب بريد، وطبعا الاسهل هو مكتب البريد وتكلفتها ٣٠ جنيه بس، ولازم يكون معاك البطاقه ورخصة العربيه وصورة لكل واحدة منهم، اما لو الرخصة مش باسمك هتحتاج طبعا التوكيل وتصوره كمان.

اما بقى لو انت هتنقل من مرور لمرور تاني زي حلاتي يعني لو انت من محافظه ومرور العربيه من محافظه ثانيه يبقى هتعمل نقل ملف، قبل الاجراءات كلها، قبل حتى شهادة المخالفات.

هتروح المرور القديم و هتطلب ملف نقل ورق عربيه ملاكي تقريبا سعره 10 جنيه وهتطلع فوق تخلص بعض الاجراءات كده وهستنى بتاع كم يوم او اسبوع على ما الملف بتاع العربيه بتاعتك يوصل المرور الجديد بتاعك بس برده لازم يكون معك الرخصه والبطاقه وتكون مصور كل واحده صورتين معك

الخطوه اللي بعد كده انك هتطلع تفحص بقى ويكون معاك طفايه تاريخها مش قبل ٢٠١٦ او تشتري من هناك طفاية تقريبا من ٣٠٠ ل ٥٠٠ جنيه ويكون برده معاك الرخصه والبطاقه وصوره البطاقه وصوره الرخصه كذا نسخة ثلاث او اربع مرات علشان ما تتزنقش هناك وتضيع وقت طويل في حاجات بسيطة

هتدخل بقى المرور بتاعك الجديد او اللي هترخص تبعه وتطلب ملف تجديد ملاكي سنة او اتنين او تلاتة حسب ظروفك.

سعره في المرور عندي كان ٣٤٥ ومعاه ملف تاني كمان ب ١٣٠ ده لسنة واحدة بس، يعني ٤٧٥ ولو عايز تزود سنة بتدفع ٣٠ جنيه بس زيادة، يعني سنتين ب ٥٠٥ و٣ سنين ب ٥٣٥.

لو هتنقل من مرور لمرور تاني يبقى هتحل اللوحات وتخليها في العربية عشان هتسلمها في الاخر.

شوف بقى اللي هياخد بصمة الموتور والشاسيه، وطبعا هتدفع، على الاقل ١٠ ولا ٢٠ جنيه، سواء هو طلب او مطلبش، عشان امورك تمشي.

هتطلع بقى بالملف للمهندس في شباك الملاكي.
ويكون معاك كل ورقك ومن ضمنهم براءة الذمة.

خلصت بقى استعد تدفع ارقام كبيرة دلوقتي
١٩٠ جنيه أمان، معرفش ليه وامتى وازاي
٥٩٠ جنيه شنطة اسعافات ولا تسوى ٥٠ جنيه
وهتدفع فكة برضو بعدهم وانت بتستلم يجي ٣٠ او ٤٠ جنيه.

لو المرور بتاعك جديد هتدفع ٣٠٠ جنيه تحيا مصر اجباري، ١٠٠ جنيه على كل سنة، بس انا الحمد لله دفعت ٣٠٠ رغم اني فحصت ورخصت سنة واحدة بس، الله اعلم بقى ليه.

هتدفع ٣٠ جنيه ٢ طابع شرطة، انا شايف انهم يخلوها ٥٠ احسن عشان لو حد مفيش معاه فكة.

هترجع تركب عربيتك وتعدي على الظابط عشان يبص عليها وانت معدي، عشان لو مش عاجباه يرفضها وترجع تصرف عليها وتصرف فحص جديد كمان.

بعد كده
نيجي بقى للضريبة، وما ادراك ما الضريبة.
الضريبة كانت معايا لعربية قديمة موديل ٧٦ موتور ١٦٠٠ ٧٥٠ جنيه بس في السنة

واتأخرت كام شهر فدفعت تلت ضريبة زيادة
فكانت الحصيلة ١٠٥٠ بس على السنة اليتيمة دي.

دفعت ١٠ جنيه للطفاية بتاعتي معرفش ليه تبقى ١٠ بس، ممكن نخليها ٣٠ او ٥٠ المرة الجاية

دفعت ١٠ جنيه للركنة في مرور اجا رغم اني بركن في المنصورة والمحلة ب٥ جنيه بس، ومفيش مقارنة بين اجا والمنصورة للي عارفهم او ميعرفهمش.

بس كده؟
لا لسه كمان
تأمين سنة واحدة ٢٩٧ جنيه
مش عارف ال٣ جنيه دي مالها يعني لو اتقفلت ٣٠٠ كمان.

سلمت اللوحات القديمة الحمد لله ببلاش ودي الخطوة الوحيدة المجانية.

وخدت اللوحات الجديدة والرخصة ودفعت بس ٢٠ جنيه.

الحمد لله ربنا سترها وقدرت ارخص العربية البورش بتاعتي سنة بحالها بمبلغ بسيط خالص موصلش ٤٠٠٠ جنيه، بالظبط ٣١٧٠ بالشاي والقهوة غير بنزين للعربية.