#أفكار_جديدة_جدا
#سيارات
#بنزين

ليه العربية بتقطع والجو برد
العربيه بتقطع معاه والجو برد او بتدور بصعوبه شويه، او بتدور بسهوله بس بتبطل لو شال رجله من على دواسة البنزين.
او لازم بفضل يكارك على البنزين عشان متبطلش

نرجع لموضوعنا بقى وهو ليه العربيه بتقطع او بتبطل لما يكون الجو برد الموضوع ده له اسباب كثيره جدا هنحاول اننا نقول اهمها في الكام دقيقة الجاية دي، ونقول الحل للمشكلة في اخر الفيديو.

وباختصار كده الاسباب هي
برودة غرف الاحتراق
برودة الهوا والبنزين
وبطء تبخر البنزين استعدادا لاحتراقه
وجود رطوبة مع الهوا
وجود رطوبة داخل الاسبراتير
ضيق مجاري البنزين والبيكات
تقل الزيت وبطء حركته

وهنشرح الاسباب دي بالتفصيل

اول سبب منطقي ان الجو برد و غرف الاحتراق كمان هتكون بارده وبالتالي حرق البنزين هيكون ابطأ سنه واضعف سنه يعني البنزين هيتاخر شويه على ما يتحرق وكمان مش هيتحرق بالكامل زي ما بيتحرق والجو حر ومع سخونه العربيه واحده بواحده كده بيبدا الحرق ينتظم ويتحسن ولو في ريحه بنزين ني بتبدا تروح.

ثاني سبب هو برودة الهواء والبنزين مع بعض يعني الهواء اللي جاي من بره بيكون بارد عن الطبيعي والبنزين برده بيكون بارد، وبالتالي تبخر جزيئات البنزين وانتشارها وسط جزيئات الهوا بتكون بطيئة ومش على المستوى الطبيعي، خاصة ان البرودة بتزود كثافة المادة، سواء كانت صلبة او سائلة او غازية.

اه طبيعه البنزين ان هو بارد او ساقع لكن بيزيد مع البرد اكثر وكمان الهواء البارد بيكثف اي رطوبه معاه وبالتالى بيكون في نسبه ميه اكتر مع الهواء وهو داخل غرف الاحتراق، وال ميه دي بتقف على اقطاب البوجيهات وبتقلل قوة الشراره اللي خارجه او بتضعفها وبتضعف كمان قوة الانفجار داخل الغرف، لانها ببساطة ميه وسط النار،

و كثافه الهواء بتكون اعلى من الطبيعي او من وقت الحر بالتالي حركته بتكون ابطأ شوية.

لما يكون الهواء بطيء و غرف الاحتراق جواها ميه، وال شراره ضعيفه بالتالي اقطاب البوجيهات مش هتسخن بسهوله ومش هتنضف وتكون زي العادي لان الشراره لما تكون قويه والانفجار يكون قوي بينظف الاقطاب بتاعه البوجيهات بالتالي الشراره بتعلي اكثر انما في الظروف الجوية الباردة والرطوبه، اقطاب البوجيهات بتاخد وقت اطول علشان تنظف وتطلع الشراره الطبيعية بتاعتها.

وجود رطوبة داخل الاسبراتير
الميه معروفة انها بتعمل ماس كهربي، وبالتالي لو دخلت جوه الاسبراتير مع الجهد العالي على الشاكوش، والجهد القليل على الأبلاتين جوه الاسبراتير بيحصل لخبطة في انتقال التيار الكهربائي.

بعد كده عندنا ضيق في مجاري البنزين والبيكات بسبب البرد، لان الناس معادن، والكربيراتير برضو معادن، والمعادن بتنكمش بالبرودة وتتمدد بالحرارة.

تقل الزيت وبطء حركته.
طبعا لما الجو يكون بارد، اي مادة سائلة بتكون اكثر لزوجة، وبالتالي بيكون صعب تحريكها ودفعها في مجاري ضيقة، والحركة بتكون بطيئة مقارنة بظروف الاجواء الحارة.

الحل بقى
حاول قدر الامكان تركن العربية في مكان دافي، وممكن تغطيها بغطا ووتر بروف ضد الميه، فلتر الهوا لازم يكون حاكم في مكانه ومفيش تسريب حواليه عشان يقلل من الرطوبة والاتربة اللي داخلة غرف الاحتراق، واخيرا متحطش زيت تقيل في الشتا، يعني متحطش زيت لزوجته 20w50 لو الجو عندك في الشتا اقل من ٢٠ درجة، يعني هتختار الزيت الانسب حسب الجو وحسب نوع عربيتك وحالة موتورك