× ×

كيف تكتب مقالة؟


إزاي تكتب أول مقال ليك؟ 
في ناس كتير بيبقى نفسها تكتب وحاسه بالرغبة من جواها لكن مش بيعرفوا يبدؤوا منين.
القاعدة الأولى: لا توجد قاعدة. 
الكتابة والأدب كما الرسم ملهمش قواعد، مش مسألة رياضية فيها 1+1 بيساوي 2، معاك مجال واسع جدا ممكن تكتب فيه، وتدور بخيالك في كل مكان، أمر بيشبهه د محمد أبو الغيط بالطبخة، على حسب ذوق وفن كل إنسان وباختلاف المقادير. 
.
2- اللغة. 
مش هنبالغ لو قلنا إنها بتمثل كل شيء في المقال تقريبًا، اللغة العربية السليمة والصحيحة والأسلوب الجيد البعيد عن الخواطر الشخصية أو القصص القصيرة أو السجع القديم، ببساطة يفهمها القارئ علطول.
ممكن تكون عندك موهبة كبيرة في الكتابة لكن معندكش ريشة الرسام اللي بيرسم بيها اللوحة، والريشة في الأدب هي اللغة. 
.
3- تجنب الملل. 
في ناس هتكسل تكمل تقرأ البوست ده لحد النقطة دي أصلًا، فما بالك بمقال كامل بيناقش موضوع مستقل. 
لازم تجذب القارئ معاك وتاخد حواسه بالكتابة من زاوية أخرى ومن مكان آخر غير اللي كل الناس بيكتبوا فيه. موضوع يذهله وياخد اهمتامه مجرد ما يقرأ العنوان. 
.
4- القراءة. 
أنا مؤمن يقينًا إن ما نكتبه ما هو إلا انعكاس كبير لما قرأناه سابقًا، فعلى قدر جودة قراءتك ستكون كتابتك. 
مش هتلاقي أي كلمات جديدة تكتبها إذا لم يكن ما تقرؤه، يساوي أضعاف ما تكتبه. اقرأ كثيرًا وكثيرًا. وصحيح إن مش كل قارئ جيد هو كاتب جيد، لكن كل كاتب جيد هو قارئ جيد بالضرورة. 
.
5- اللي فات ده كله كان بشكل عام، تعالى نتكلم في نقط سريعة عن الفنيّات الأخرى:
اختار زاوية مختلفة للموضوع اللي هتكتب فيه. (متكتبش فيما يكتب أو كتب عنه الجميع) 
علامات الترقيم مهمة جدًا. (هتلاقيها كلها على جوجل)
مقدمة المقال مهمة لجذب انتباه القارئ لاستكمال المقال وكذلك خاتمته لأن الخواتيم هي اللي بتفضل في الذاكرة دايمًا. 
متتطولش، متبالغش، متتعمدش العمق، متكلكعش بكلام صعب فهمه في العنوان أو المحتوى، تمرّن أكتر على الكتابة، مستواك هيتطور طول ما أنت بتكتب، راجع المقال الأول ليك مع شخص تثق في ذوقه وحُكمه.

 

Mostafa Gomaa

تكملة القراءة

أفضل قنوات التليجرام لمختلف المجالات
قنوات تساعدك بكل سهولة على الوصول للمصادر التعليمية و الوظائف و النصائح المهنية و المنح الدراسية

اشترك الآن مجانا
اقرأ ايضا
15 قاعدة لعيبة تخليك تكتب دون أخطاء مريبة