اولا الخطة هي اساس لو حد عاوز ياخد شهاده كويسه في التدرسي سواء TEFL او CELTA ، كمان بفترض انك بتعرف انجليزي . مقدرش اقولك هتقدر تخلص الخطة في كام شهر لاني معرفش هتذاكر كام ساعة في اليوم ، مثلا فيه مدرس مستواه قوي جدا جدا في الفهم ممكن يقرأ و يذاكر كتاب في اسبوع و شخص اخر ياخد 5 شهور. المهم “تبدأ صح و تبدأ ع طول ”. هعمل جدول للمبتدئين ، لو مستواك كويس هتمشي اسرع في الجدول. وانت وشطارتك يانجم
دي اسامي الكتب اللي هتذاكرها
(The Teacher’s Grammar Book)
(Oxford Guide to English Grammar)
(English Prepositions Explained)
(Writing Academic English)
(Teach EFL The Complete Guide)
(How to Teach Pronunciation)
(How to Teach English)
(25 Biggest Mistakes Teachers Make and How to Avoid Them)
نصيحه لو مش قد المهمه متكملش ووفر وقتك في حاجه انت كويس فيها
خلي بالك ان الموضوع مش كتب و خلاص ، مكنش حد غولب ، الموضوع هو اسلوب مذاكرتك للكتب. قبل ما نتكلم عن مذاكرة الكتب لازم تجيب كشكول للكلمات الجديدة و كشكول اخر للتعبيرات الجديدة عليك #لازم تنطق كل كلمة في قاموس زي القاموس بالظبط لانك لو مدرس قوي بدون نطق انجليزي سليم تبقي مش مدرس. لو انت زي كتير من خريجي كليات التخصص مستواك في الانجليزي ضعيف يبقي هتتعب في البداية اوي بس النتيجة هتكون روعة و ابصملك بالعشره :D انك لو مشيت علي الخطة هتبقي مدرس ناجح و تقدر تسافر برا كمان. يبقي:
@ هتعمل كشكول للكلمات و هتنطق كل كلمة جديدة في قاموس انجليزي (الرابط في اخر المشاركة)
@ كشكول للتعبيرات الجديدة و الملاحظات زي الفرق بين استخدام المضارع التام و الماضي البسيط مثلا (و انا بنزل علي صفحتي كتير كمان)
@ ممكن الموضوع يوصل انك في البداية تترجم كل كلمة ، عادي مش عيب و مش تيأس ، لازم تتعب علشان مستواك يبقي عالي في اللغة و التدريس.
@ في الاول هتترجم الكلمات في قاموس عربي من اختيارك لغاية ما تجمع حصيلة كلمات كويسة و تقدر تستخدم القاموس الانجليزي انجليزي.
الشهر الاول (مذاكرة لا تقل عن اربع ساعات يوميا)
The Teacher’s Grammar Book
الكتاب دا جميل جدا لانه بيعلمك تعلم الجرامر و كمان لا يفترض ان مستواك عالي فيه ، يعني مقدمة كويسة للموضوعين. انا اخترته في البداية قبل كتاب اكسفورد في الجرامر علشان تفهم ايه المطلوب منك كمدرس الاول وبعدين و انت بتذاكر جرامر تبقي عارف هتستخدمه ازاي في الفصل و في نفس الوقت بتقوي و توسع معرفتك.
الشهر الثاني و الثالث (مذاكرة لا تقل عن خمس ساعات يوميا)
Oxford Guide to English Grammar
الكتاب دا اكثر من رائع في الجرامر و هياخد منك علي الاقل شهر ونص مذاكرة ، مش مهم لو اخد حتي 3 شهور ، المهم تفهم انك مش مجرد بتقرأ الكتاب و خلاص ، لا انت بتذاكر و بتتعلم جمل جديدة ممكن تكتب زيها علشان يبقي فيه ممارسة و ممكن تنطقها في القاموس و ممكن تكون بتكتب ملاحظات علي كل حاجة اتعلمتها طول الطريق. الكتاب هيضع لك قاعدة قوية كمدرس في الجرامر و دا شيء مهم جدا لمهارات اللغة الاربعة.
الشهر الرابع (مذاكرة لا تقل عن خمس ساعات يوميا)
English Prepositions Explained
حروف الجر مشكلة لاغلب الناس ، مش بس لنا ولكن حتي لاهل اللغة ساعات. لازم كمدرس تبقي مستريح معاها جدا ، الكتاب صغير مش كبير ، محتاج تكتب كتير و تنطق في القاموس زي ما قولنا و تقرأ ما كتبته علشان تتعود علي الكلام بالانجليزي.
الشهر الخامس (مذاكرة لا تقل عن خمس ساعات يوميا)
Writing Academic English
كمدرس عايز يحترف المهنة و ياخد دورة متخصصة في التدريس زي TEFL او CELTA لازم بكل تأكيد تطور مهارة الكتابة عندك ، لان بيطلب منك اعتقد
four written assignments (each 1,000 words)
علي اي حال لازم كمدرس تكون عند المهارة انك تكتب صح علشان تعلم الطلاب مهارة الكتابة.
الشهر السادس (مذاكرة لا تقل عن خمس ساعات يوميا)
Teach EFL The Complete Guide
الكتاب دا هيعلمك ازاي تدرس انجليزي للطلاب و ازاي تدير الفصل و تعلم الطلاب عن طريق الامتحانات و تقيم مستواهم ، هيعلمك ازاي تدرسلهم القراءة ، الكتابة ، التحدث ، الاستماع. هيقولك علي الاخطاء الشائعة و هيعلمك كمان ازاي تحضر الدرس بشكل احترافي
الشهر السابع (مذاكرة لا تقل عن خمس ساعات يوميا)
How to Teach Pronunciation
من اسم الكتاب باين اوي انه هيعلمك اسلوب تشرح به النطق في اللغة الانجليزية للطلاب و في نفس الوقت انت هتتعلم ، ولكن خلي بالك انك من اول يوم بتنطق الكلمات في قاموس انجليزي انجليزي و لو متخصص في اللغة اكيد درست صوتيات في الكلية طبعا.
الشهر الثامن (مذاكرة لا تقل عن خمس ساعات يوميا)
How to Teach English
الكتاب دا رائع و هو مثل مواضيع Teach EFL شوية و لكنه بيتوسع ، الكتاب دا مهم جدا.
ممكن توقف الخطة عند الكتاب دا و انك كدا فعلا جاهز تشتغل في مدرسة خاصة او لغات او تستعد لشهادة TEFL او CELTA لو تخصصك انجليزي او لا مش مهم. لو معاك شهادة احترافية في التدريس هتشتغل في التدريس مفيش مشكلة. اخر كتاب هو
25 Biggest Mistakes Teachers Make and How to Avoid Them
انا من وجهه نظري شايف انه مهم لانه بيعلمك ايه هي الاخطاء بتاعت المدرسين ، مش في الانجليزي نفسه لالا ولكن كمدرس ، الكتاب مهم ولكنه غير مرتبط بالخطة ارتباط كبير ركز عليه ، المفروض كل المدرسين تقرأ الكتاب دا. يااريت يعني
دا رابط لافضل قاموس علي الاطلاق اكسفورد 2019
https://www.facebook.com/Michael.Y.Labib/posts/489249984597398
