دول 45 فكرة ممكن تعملهم السنة الجديدة، منهم أفكار متقالتش قبل كده وحجات هنفكر بعض بيها، احتفظ بالبوست وابقى ارجعله كل ما تفضى:
1- مترميش مشاعرك بدون مقابل لحد ميستاهلش، استنزاف المشاعر ميفرقش عن استنزاف الجهد والصحة والمال
2- الكلام في عصر وسائل التواصل الاجتماعي بقى شهوة زي الأكل والشرب، اتعود تضبطها، وحاول تسمع وتقرأ أكتر ما تتكلم
3- ذاكر مش علشان المذاكرة حلوة، لكن لأن الحياة أقصر من إن أنت تضيعها في صراع نفسي بين نفسك وبين وبين الكتاب، في معارك تانية أهم مستنياك في المستقبل
4- متنساش فكرة الصندوق الصغير، هات صندوق ولما يحصلك حاجة تفرحك اكتبها على ورقة وحطها في الصندوق ده، وافتحه آخر السنة هتبقى عندك ذكريات كتير حلوة.
5- احتفظ ب20% من مرتبك في أول كل شهر فردي، 1،3،7،وهكذا وخليه للزمن، محدش عارف هيحصل إيه
6- في شغلك تجنب الدخول في 3 صراعات: الدين والسياسة والحب، خلي وقت شغلك للشغل وبس
7- خش على موقع مرجع واختار 3 منح مناسبين ليك، متقدمش عليهم السنادي، خلي 2020 سنة تظبيط مجهودك وعلمك على ال3 منح دول، وقدم السنة الجاية فيهم
8- الأيلتس والتويفل هيوفروا عليك 3 أرباع مشوار السفر، خدهم في آخر سنة من الجامعة، هتلاقي لينك فيه كل ما يتعلق بيهم في التعليقات
9- صديق الكل ليس له صديق، حاول تتخذ صديق ليك يقدر يشيل عنك كل همومك كتير منا يعرف ناس ولما بيقع فى موقف صعب مبيلاقيش حد يقف جمبه
10- لو ليك صاحب طلعت بيه من 2019 خش دلوقتي بعد ما تخلص البوست قوله إنه مهم في حياتك وإنك بتحبه
11- اعمل محفظة إلكترونية (فودافون كاش، أورانج موني، اتصالات كاش)، أو حساب في البنك لأنك هتحتاجهم بعدين
12- بعد ما تخلص البوست ابعت رسالة امتنان لأكتر حد أثر فيك في 2019
13- ابعت بعدها رسالة لأكتر حد تتمنى تتعرف عليه واعزمه على كوباية قهوة ")
14- الفلسفة مش تضييع وقت والمنطق لازم تتعلمه وعلم النفس هينورلك معرفتك بنفسك وباللي حواليك، خد فكرة بسيطة عن ال3 حجات دول
15- أوقات كتير بنحتاج نحكي، متحكيش همومك لحد يعرفك، احكي لحد غريب مش هتقابله تاني، زي صديق القطر مثلا
16- 2019 ما هي إلا رقم، زي ما هتكون 2020 إحنا اللي بنخلق وقتنا وسنين عمرنا وبنديلهم قيمة بالحجات اللي بنعملها فيهم
17- القراءة مش اختيار، اقرأ في المواصلات وفي وقت الفراغ وفي الحمام وفي أي مكان
18- مستشفى 57357 مش هتقفل بابها في وشك لما تزورها، روحها يوم في السنة الجديدة وقضيه مع الأطفال هناك، تجربة مش هتنساها
19- اتعلم سباحة وطبخ وبرمجة ومن غير ليه
20- الناس مش مطلوب منهم إنهم يحبوك فمتدورش على حبهم، المطلوب إنهم يعاملوك كويس، وده أنت اللي بتفرضه عليهم
21- لو عندك وقت فراغ يبقى اتعلم ألماني، أو صيني،أو إسباني، كل لغة من دول ممكن تفتحلك أبواب تانية كتير في 2020
22- اعمل حساب على لينكد إن، واهتم بيه، وانشر عليه، ده بقى البطاقة بتاعتك اللي بتتعرف بيها
23- اتعلم مهارة واحدة في السنة الجديدة بعيدة عن مجال تخصصك أو دراستك وخليها للظروف (برمجة، ترجمة، تصميم، كتابة، إنشاء محتوى)
24- نصيحة متعلقة باللي قبلها: المستقبل دلوقتي للفريلانس (العمل الحر)، هتلاقي هنا كل ما يتعلق بيه
25- خليك ذكي في الحب، متقربش أوي لحد ما تغرق ولا تبعد أوي لحد ما تبقى جافي، خليك وسط
26- الحياة بتتعاش مبتتحكيش
27- علشان كده متهتمش بتصوير كل ثانية في حياتك، ومتكتبش كل موقف حصل معاك للناس، ركز في إنك تحسن من ظروفك وتستمتع بنجاحك وبس
28- الكلمة الطيبة أفضل من الصدقة المؤذية، اعمل فلتر على كلامك لأن بتوجهه لروح بتحس وبتشعر
29- ساعة واحدة بس في الأسبوع على اليوتيوب هتفيدك كتير
30- بس مش أي ساعة، خد لفة في القنوات دي وسوي صبصقرايب بارك الله فيك وأوعدك مش هتندم (أول كومنت)
31- نزل تطبيق google keep أو ستيكي نوت واكتب فيهم كل حاجة تقابلك وحابب تسجلها
32- روح زور مسجد المؤيد شيخ عند باب زويلة واقعد اتأمل في السقف بتاعة نصف ساعة ومتعملش حاجة تاني
33- خلي 3 أيام آخر كل شهر تقفل فيهم فيسبوك وتقطع النت وتقعد مع نفسك وتراجع حالك
34- اشبع من أبوك وأمك دلوقتي، اقعد معاهم وسجلهم فيديو واتصور معاهم كتير، ومتسألش ليه
35- الحاجة الوحيدة اللي هتخلي كل الناس تصدقك هيا إنك تكون صادق مع نفسك
36- مش هقولك اعمل أن لايك لكل صفحات السياسة والأخبار، أنت عاملها من السنة اللي فاتت، بس خش على الجروبات دي مكانهم (أول تعليق)
37- سافر، مع نفسك، مع أصحابك، مع الجامعة، مع وزارة الشباب والرياضة، المهم تسافر
38- متفاصلش مع الناس اللي محتاجين كل جنيه بتديهولهم
39- الوثائقيات لو مش واخده حقها في حياتك، يبقى شوف وثائقي كل أسبوع من دول (أول تعليق)
40- لو في آخر السنة قولتلي إنك اتفرجت على ال3 وثائقيات دول هفرح أوي والله وأنت كمان هتفرح وطنط ناهد وإحنا كلنا (البشرية قصتنا جميعًا، تاريخ العالم أندرو مار، رحلة البشرية المذهلة)
41- مينفعش تكون عايش في مصر ومجربتش مطعم أسماك الصلاة على النبي وساندويتشات كامبا وحواوشي الرفاعي وكبدة البرنس وملوخية صبحي وكشري أبو طارق فرع التجمع بس
42- جربت يبسي بالتوت؟ وحش متجربوش، متجربش أي حاجة بالتوت عموما، خليه للأكل بس
43- نزل التطبيق ده للقرآن (quran for android) وافتحه ولو كل أسبوع مرة متقرأش فيها غير صفحة، بس تدبرها واقف عند معناها
43- طالما لسه بتدرس في الجامعة متعملش غير 3 حجات، ذاكر واتطوع واتعلم مهارة جديدة
44-متنساش النصيحة رقم 26
45- كعادة كل سنة: قول للناس الحلوة إنهم حلوين
by: mostafa gomaa
